‘‘ขาริโย ปูรยิตฺวาน, สงฺฆารามมคจฺฉหํ;
หฏฺโฐ หฏฺเฐน จิตฺเตน, สงฺฆสฺส ลสุณํ อทํฯ
[91]
‘‘วิปสฺสิสฺส นรคฺคสฺส, สาสเน นิรตสฺสหํ;
สงฺฆสฺส ลสุณํ ทตฺวา, กปฺปํ สคฺคมฺหิ โมทหํฯ
[92]
‘‘เอกนวุติโต กปฺเป, ลสุณํ ยมทํ ตทา;
ทุคฺคติํ นาภิชานามิ, ลสุณสฺส อิทํ ผลํฯ
[93]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ลสุณทายโก เถโร อิมา คาถาโย อภาสิตฺถาติ;
ลสุณทายกตฺเถรสฺสาปทานํ สตฺตมํฯ
8. อายาคทายกตฺเถรอปทานํ
[94]
‘‘นิพฺพุเต โลกนาถมฺหิ, สิขิมฺหิ วทตํ วเร;
หฏฺโฐ หฏฺเฐน จิตฺเตน, อวนฺทิํ ถูปมุตฺตมํฯ
[95]
‘‘วฑฺฒกีหิ กถาเปตฺวา, มูลํ ทตฺวานหํ ตทา;
หฏฺโฐ หฏฺเฐน จิตฺเตน, อายาคํ การเปสหํฯ
[96]
‘‘อฏฺฐ กปฺปานิ เทเวสุ, อพฺโพกิณฺณํ [อพฺโพจฺฉินฺนํ (สี.)] วสิํ อหํ;
อวเสเสสุ กปฺเปสุ, โวกิณฺณํ สํสริํ อหํฯ
[97]
‘‘กาเย วิสํ น กมติ, สตฺถานิ น จ หนฺติ เม;
อุทเกหํ น มิยฺยามิ, อายาคสฺส อิทํ ผลํฯ
[98]
‘‘ยทิจฺฉามิ อหํ วสฺสํ, มหาเมโฆ ปวสฺสติ;
เทวาปิ เม วสํ เอนฺติ, ปุญฺญกมฺมสฺสิทํ ผลํฯ
[99]
‘‘สตฺตรตนสมฺปนฺโน, ติสกฺขตฺตุํ อโหสหํ;
น มํ เกจาวชานนฺติ, ปุญฺญกมฺมสฺสิทํ ผลํฯ
[100]
‘‘เอกตฺติํเส อิโต กปฺเป, อายาคํ ยมการยิํ;
ทุคฺคติํ นาภิชานามิ, อายาคสฺส อิทํ ผลํฯ
[101]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อายาคทายโก เถโร อิมา คาถาโย อภาสิตฺถาติฯ
อายาคทายกตฺเถรสฺสาปทานํ อฏฺฐมํฯ
9. ธมฺมจกฺกิกตฺเถรอปทานํ
[102]
‘‘สิทฺธตฺถสฺส ภควโต, สีหาสนสฺส สมฺมุขา;
ธมฺมจกฺกํ เม ฐปิตํ, สุกตํ วิญฺญุวณฺณิตํฯ
[103]
‘‘จารุวณฺโณว โสภามิ, สโยคฺคพลวาหโน;
ปริวาเรนฺติ มํ นิจฺจํ, อนุยนฺตา พหุชฺชนาฯ
[104]
‘‘สฏฺฐิตูริยสหสฺเสหิ, ปริจาเรมหํ สทา;
ปริวาเรน โสภามิ, ปุญฺญกมฺมสฺสิทํ ผลํฯ
[105]
‘‘จตุนฺนวุติโต กปฺเป, ยํ จกฺกํ ฐปยิํ อหํ;
ทุคฺคติํ นาภิชานามิ, ธมฺมจกฺกสฺสิทํ ผลํฯ
[106]
‘‘อิโต เอกาทเส กปฺเป, อฏฺฐาสิํสุ ชนาธิปา;
สหสฺสราชนาเมน, จกฺกวตฺตี มหพฺพลาฯ
[107]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ธมฺมจกฺกิโก เถโร อิมา คาถาโย อภาสิตฺถาติฯ
ธมฺมจกฺกิกตฺเถรสฺสาปทานํ นวมํฯ
10. กปฺปรุกฺขิยตฺเถรอปทานํ
[108]
‘‘สิทฺธตฺถสฺส ภควโต, ถูปเสฏฺฐสฺส สมฺมุขา;
วิจิตฺตทุสฺเส ลเคตฺวา [ลคฺเคตฺวา (สี. สฺยา.)], กปฺปรุกฺขํ ฐเปสหํฯ
[109]