1. กุณฺฑธานตฺเถรอปทานํ
[1]
‘‘สตฺตาหํ ปฏิสลฺลีนํ, สยมฺภุํ อคฺคปุคฺคลํ;
ปสนฺนจิตฺโต สุมโน, พุทฺธเสฏฺฐํ อุปฏฺฐหิํฯ
[2]
‘‘วุฏฺฐิตํ กาลมญฺญาย, ปทุมุตฺตรํ มหามุนิํ;
มหนฺติํ กทลีกณฺณิํ, คเหตฺวา อุปคจฺฉหํฯ
[3]
‘‘ปฏิคฺคเหตฺวา [ปฏิคฺคเหสิ (สฺยา. ก.)] ภควา, สพฺพญฺญู [ตํ ผลํ (สี.)] โลกนายโก;
มม จิตฺตํ ปสาเทนฺโต, ปริภุญฺชิ มหามุนิฯ
[4]
‘‘ปริภุญฺชิตฺวา สมฺพุทฺโธ, สตฺถวาโห อนุตฺตโร;
สกาสเน นิสีทิตฺวา, อิมา คาถา อภาสถฯ
[5]
‘‘‘เย จ สนฺติ สมิตาโร [เย วสนฺติ สเมตาโร (สี.)], ยกฺขา อิมมฺหิ ปพฺพเต;
อรญฺเญ ภูตภพฺยานิ [ภูตคณา สพฺเพ (สฺยา.)], สุณนฺตุ วจนํ มม’ฯ
[6]
‘‘โย โส พุทฺธํ อุปฏฺฐาสิ, มิคราชํว เกสริํ [มิคราชาว เกสรี (สี.)];
ตมหํ กิตฺตยิสฺสามิ, สุณาถ มม ภาสโตฯ
[7]
‘‘‘เอกาทสญฺจกฺขตฺตุํ, โส [โสยเมกาทสกฺขตฺตุํ (สี.)] เทวราชา ภวิสฺสติ;
จตุติํสติกฺขตฺตุญฺจ, จกฺกวตฺตี ภวิสฺสติฯ
[8]
‘‘‘กปฺปสตสหสฺสมฺหิ, โอกฺกากกุลสมฺภโว;
โคตโม นาม โคตฺเตน, สตฺถา โลเก ภวิสฺสติฯ
[9]
‘‘‘อกฺโกสิตฺวาน สมเณ, สีลวนฺเต อนาสเว;
ปาปกมฺมวิปาเกน, นามเธยฺยํ ลภิสฺสติ [ภวิสฺสติ (ก.)]ฯ
[10]
‘‘‘ตสฺส ธมฺเมสุ ทายาโท, โอรโส ธมฺมนิมฺมิโต;
กุณฺฑธาโนติ นาเมน, สาวโก โส ภวิสฺสติ’ฯ
[11]
‘‘ปวิเวกมนุยุตฺโต, ฌายี ฌานรโต อหํ;
โตสยิตฺวาน สตฺถารํ, วิหรามิ อนาสโวฯ
[12]
‘‘สาวเกหิ [สาวกคฺเคหิ (สี.)] ปริวุโต, ภิกฺขุสงฺฆปุรกฺขโต;
ภิกฺขุสงฺเฆ นิสีทิตฺวา, สลากํ คาหยี ชิโนฯ
[13]
‘‘เอกํสํ จีวรํ กตฺวา, วนฺทิตฺวา โลกนายกํ;
วทตํ วรสฺส ปุรโต, ปฐมํ อคฺคเหสหํฯ
[14]
‘‘เตน กมฺเมน ภควา, ทสสหสฺสีกมฺปโก;
ภิกฺขุสงฺเฆ นิสีทิตฺวา, อคฺคฏฺฐาเน ฐเปสิ มํฯ
[15]
‘‘วีริยํ เม ธุรโธรยฺหํ, โยคกฺเขมาธิวาหนํ;
ธาเรมิ อนฺติมํ เทหํ, สมฺมาสมฺพุทฺธสาสเนฯ
[16]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา กุณฺฑธาโน เถโร อิมา คาถาโย อภาสิตฺถาติฯ
กุณฺฑธานตฺเถรสฺสาปทานํ ปฐมํฯ
2. สาคตตฺเถรอปทานํ
[17]
‘‘โสภิโต นาม นาเมน, อโหสิํ พฺราหฺมโณ ตทา;
ปุรกฺขโต สสิสฺเสหิ, อารามํ อคมาสหํฯ
[18]
‘‘ภควา ตมฺหิ สมเย, ภิกฺขุสงฺฆปุรกฺขโต;
อารามทฺวารา นิกฺขมฺม, อฏฺฐาสิ ปุริสุตฺตโมฯ
[19]
‘‘ตมทฺทสาสิํ สมฺพุทฺธํ, ทนฺตํ ทนฺตปุรกฺขตํ;
สกํ จิตฺตํ ปสาเทตฺวา, สนฺถวิํ โลกนายกํฯ
[20]
‘‘เย เกจิ ปาทปา สพฺเพ, มหิยา เต วิรูหเร;
พุทฺธิมนฺโต ตถา สตฺตา, รุหนฺติ ชินสาสเนฯ
[21]
‘‘สตฺถวาโหสิ สปฺปญฺโญ, มเหสิ พหุเก ชเน;
วิปถา อุทฺธริตฺวาน, ปถํ อาจิกฺขเส ตุวํฯ
[22]