‘‘สฺวาหํ ยสมนุภวิํ, เตสํ สีลาน วาหสา;
กปฺปโกฏิมฺปิ กิตฺเตนฺโต, กิตฺตเย เอกเทสกํฯ
[149]
‘‘ปญฺจสีลานิ โคเปตฺวา, ตโย เหตู ลภามหํ;
ทีฆายุโก มหาโภโค, ติกฺขปญฺโญ ภวามหํฯ
[150]
‘‘สํกิตฺเตนฺโต จ [ปกิตฺเตนฺโตว (สี.), ปกิตฺเตนฺเต จ (สฺยา.)] สพฺเพสํ, อภิมตฺตญฺจ โปริสํ;
ภวาภเว สํสริตฺวา, เอเต ฐาเน ลภามหํฯ
[151]
‘‘อปริเมยฺยสีเลสุ, วตฺตนฺตา ชินสาวกา;
ภเวสุ ยทิ รชฺเชยฺยุํ, วิปาโก กีทิโส ภเวฯ
[152]
‘‘สุจิณฺณํ เม ปญฺจสีลํ, ภตเกน ตปสฺสินา [วิปสฺสินา (สี.)];
เตน สีเลนหํ อชฺช, โมจยิํ สพฺพพนฺธนาฯ
[153]
‘‘อปริเมยฺเย อิโต กปฺเป, ปญฺจสีลานิ โคปยิํ;
ทุคฺคติํ นาภิชานามิ, ปญฺจสีลานิทํ ผลํฯ
[154]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา ปญฺจสีลสมาทานิโย เถโร อิมา คาถาโย อภาสิตฺถาติฯ
ปญฺจสีลสมาทานิยตฺเถรสฺสาปทานํ จตุตฺถํฯ
5. อนฺนสํสาวกตฺเถรอปทานํ
[155]
‘‘สุวณฺณวณฺณํ สมฺพุทฺธํ, คจฺฉนฺตํ อนฺตราปเณ;
กญฺจนคฺฆิยสํกาสํ, พาตฺติํสวรลกฺขณํฯ
[156]
‘‘สิทฺธตฺถํ โลกปชฺโชตํ, อปฺปเมยฺยํ อโนปมํ;
อลตฺถํ ปรมํ ปีติํ, ทิสฺวา ทนฺตํ ชุตินฺธรํฯ
[157]
‘‘สมฺพุทฺธํ อภินาเมตฺวา, โภชยิํ ตํ มหามุนิํ;
มหาการุณิโก โลเก [นาโถ (สี.)], อนุโมทิ มมํ ตทาฯ
[158]
‘‘ตสฺมิํ มหาการุณิเก, ปรมสฺสาสการเก;
พุทฺเธ จิตฺตํ ปสาเทตฺวา, กปฺปํ สคฺคมฺหิ โมทหํฯ
[159]
‘‘จตุนฺนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, ภิกฺขาทานสฺสิทํ ผลํฯ
[160]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา อนฺนสํสาวโก เถโร อิมา คาถาโย อภาสิตฺถาติฯ
อนฺนสํสาวกตฺเถรสฺสาปทานํ ปญฺจมํฯ
6. ธูปทายกตฺเถรอปทานํ
[161]
‘‘สิทฺธตฺถสฺส ภควโต, โลกเชฏฺฐสฺส ตาทิโน;
กุฏิธูปํ มยา ทินฺนํ, วิปฺปสนฺเนน เจตสาฯ
[162]
ยํ ยํ โยนุปปชฺชามิ, เทวตฺตํ อถ มานุสํ;
สพฺเพสมฺปิ ปิโย โหมิ, ธูปทานสฺสิทํ ผลํฯ
[163]
‘‘จตุนฺนวุติโต กปฺเป, ยํ ธูปมททิํ ตทา [ยํ ธูปนมทาสหํ (ก.)];
ทุคฺคติํ นาภิชานามิ, ธูปทานสฺสิทํ ผลํฯ
[164]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา ธูปทายโก เถโร อิมา คาถาโย อภาสิตฺถาติฯ
ธูปทายกตฺเถรสฺสาปทานํ ฉฏฺฐํฯ
7. ปุลินปูชกตฺเถรอปทานํ
[165]
‘‘วิปสฺสิสฺส ภควโต, โพธิยา ปาทปุตฺตเม;
ปุราณปุลินํ หิตฺวา [ฉฑฺเฑตฺวา (สี. สฺยา.)], สุทฺธปุลินมากิริํฯ
[166]
