‘‘อารทฺธวีริโย ปหิตตฺโต, สีเลสุ สุสมาหิโต;
โตเสตฺวาน มหานาคํ, อลตฺถํ อุปสมฺปทํฯ
[121]
‘‘จตุนฺนวุติโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ปุปฺผทานสฺสิทํ ผลํฯ
[122]
‘‘จตุนฺนวุติโต กปฺเป, ยํ สญฺญํ ภาวยิํ ตทา;
ตํ สญฺญํ ภาวยนฺตสฺส, ปตฺโต เม อาสวกฺขโยฯ
[123]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา โสปาโก เถโร อิมา คาถาโย อภาสิตฺถาติฯ
โสปากตฺเถรสฺสาปทานํ นวมํฯ
10. สุมงฺคลตฺเถรอปทานํ
[124]
‘‘อาหุติํ ยิฏฺฐุกาโมหํ, ปฏิยาเทตฺวาน โภชนํ;
พฺราหฺมเณ ปฏิมาเนนฺโต, วิสาเล มาฬเก ฐิโตฯ
[125]
‘‘อถทฺทสาสิํ สมฺพุทฺธํ, ปิยทสฺสิํ มหายสํ;
สพฺพโลกวิเนตารํ, สยมฺภุํ อคฺคปุคฺคลํฯ
[126]
‘‘ภควนฺตํ ชุติมนฺตํ, สาวเกหิ ปุรกฺขตํ;
อาทิจฺจมิว โรจนฺตํ, รถิยํ ปฏิปนฺนกํฯ
[127]
‘‘อญฺชลิํ ปคฺคเหตฺวาน, สกํ จิตฺตํ ปสาทยิํ;
มนสาว นิมนฺเตสิํ, ‘อาคจฺฉตุ มหามุนิ’ฯ
[128]
‘‘มม สงฺกปฺปมญฺญาย, สตฺถา โลเก อนุตฺตโร;
ขีณาสวสหสฺเสหิ, มม ทฺวารํ อุปาคมิฯ
[129]
‘‘นโม เต ปุริสาชญฺญ, นโม เต ปุริสุตฺตม;
ปาสาทํ อภิรูหิตฺวา, สีหาสเน นิสีทตํ [นิสีท ตฺวํ (สี.)]ฯ
[130]
‘‘ทนฺโต ทนฺตปริวาโร, ติณฺโณ ตารยตํ วโร;
ปาสาทํ อภิรูหิตฺวา, นิสีทิ ปวราสเนฯ
[131]
‘‘ยํ เม อตฺถิ สเก เคเห, อามิสํ ปจฺจุปฏฺฐิตํ;
ตาหํ พุทฺธสฺส ปาทาสิํ, ปสนฺโน เสหิ ปาณิภิฯ
[132]
‘‘ปสนฺนจิตฺโต สุมโน, เวทชาโต กตญฺชลี;
พุทฺธเสฏฺฐํ นมสฺสามิ, อโห พุทฺธสฺสุฬารตาฯ
[133]
‘‘อฏฺฐนฺนํ ปยิรูปาสตํ, ภุญฺชํ ขีณาสวา พหู;
ตุยฺเหเวโส อานุภาโว, สรณํ ตํ อุเปมหํฯ
[134]
‘‘ปิยทสฺสี จ ภควา, โลกเชฏฺโฐ นราสโภ;
ภิกฺขุสงฺเฆ นิสีทิตฺวา, อิมา คาถา อภาสถฯ
[135]
‘‘‘โย โส สงฺฆํ อโภเชสิ, อุชุภูตํ สมาหิตํ;
ตถาคตญฺจ สมฺพุทฺธํ, สุณาถ มม ภาสโตฯ
[136]
‘‘‘สตฺตวีสติกฺขตฺตุํ โส, เทวรชฺชํ กริสฺสติ;
สกกมฺมาภิรทฺโธ โส, เทวโลเก รมิสฺสติฯ
[137]
‘‘‘ทส อฏฺฐ จกฺขตฺตุํ [ทสญฺจฏฺฐกฺขตฺถุํ (สี.), ทส จฏฺฐกฺขตฺตุํ (สฺยา.)] โส, จกฺกวตฺตี ภวิสฺสติ;
ปถพฺยา รชฺชํ ปญฺจสตํ, วสุธํ อาวสิสฺสติ’ฯ
[138]
‘‘อรญฺญวนโมคฺคยฺห, กานนํ พฺยคฺฆเสวิตํ;
ปธานํ ปทหิตฺวาน, กิเลสา ฌาปิตา มยาฯ
[139]
‘‘อฏฺฐารเส กปฺปสเต, ยํ ทานมททิํ ตทา;
ทุคฺคติํ นาภิชานามิ, ภตฺตทานสฺสิทํ ผลํฯ
[140]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา สุมงฺคโล เถโร อิมา คาถาโย อภาสิตฺถาติฯ
สุมงฺคลตฺเถรสฺสาปทานํ ทสมํฯ
ตสฺสุทฺทานํ –
สีหาสนี เอกถมฺภี, นนฺโท จ จูฬปนฺถโก;
ปิลินฺทราหุโล เจว, วงฺคนฺโต รฏฺฐปาลโกฯ
โสปาโก มงฺคโล เจว, ทเสว ทุติเย วคฺเค;
สตญฺจ อฏฺฐติํส จ, คาถา เจตฺถ ปกาสิตาฯ
สีหาสนิยวคฺโค ทุติโยฯ
3. สุภูติวคฺโค