‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา สีหาสนทายโก เถโร อิมา คาถาโย อภาสิตฺถาติฯ

สีหาสนทายกตฺเถรสฺสาปทานํ ปฐมํฯ

2. เอกตฺถมฺภิกตฺเถรอปทานํ

[13]

‘‘สิทฺธตฺถสฺส ภควโต, มหาปูคคโณ อหุ;

สรณํ คตา จ เต พุทฺธํ, สทฺทหนฺติ ตถาคตํฯ

[14]

‘‘สพฺเพ สงฺคมฺม มนฺเตตฺวา, มาฬํ กุพฺพนฺติ สตฺถุโน;

เอกตฺถมฺภํ อลภนฺตา, วิจินนฺติ พฺรหาวเนฯ

[15]

‘‘เตหํ อรญฺเญ ทิสฺวาน, อุปคมฺม คณํ ตทา;

อญฺชลิํ ปคฺคเหตฺวาน, ปริปุจฺฉิํ คณํ อหํฯ

[16]

‘‘เต เม ปุฏฺฐา วิยากํสุ, สีลวนฺโต อุปาสกา;

มาฬํ มยํ กตฺตุกามา, เอกตฺถมฺโภ น ลพฺภติฯ

[17]

‘‘เอกตฺถมฺภํ มมํ เทถ, อหํ ทสฺสามิ สตฺถุโน;

อาหริสฺสามหํ ถมฺภํ, อปฺโปสฺสุกฺกา ภวนฺตุ เต [ภวนฺตุ โว (สี.), ภวาถ โว (?)]ฯ

[18]

‘‘เต เม ถมฺภํ ปเวจฺฉิํสุ, ปสนฺนา ตุฏฺฐมานสา;

ตโต ปฏินิวตฺติตฺวา, อคมํสุ สกํ ฆรํฯ

[19]

‘‘อจิรํ คเต ปูคคเณ, ถมฺภํ อหาสหํ ตทา;

หฏฺโฐ หฏฺเฐน จิตฺเตน, ปฐมํ อุสฺสเปสหํฯ

[20]

‘‘เตน จิตฺตปฺปสาเทน, วิมานํ อุปปชฺชหํ;

อุพฺพิทฺธํ ภวนํ มยฺหํ, สตฺตภูมํ [สตภูมํ (สี. ก.)] สมุคฺคตํฯ

[21]

‘‘วชฺชมานาสุ เภรีสุ, ปริจาเรมหํ สทา;

ปญฺจปญฺญาสกปฺปมฺหิ, ราชา อาสิํ ยโสธโรฯ

[22]

‘‘ตตฺถาปิ ภวนํ มยฺหํ, สตฺตภูมํ สมุคฺคตํ;

กูฏาคารวรูเปตํ, เอกตฺถมฺภํ มโนรมํฯ

[23]

‘‘เอกวีสติกปฺปมฺหิ, อุเทโน นาม ขตฺติโย;

ตตฺราปิ ภวนํ มยฺหํ, สตฺตภูมํ สมุคฺคตํฯ

[24]

‘‘ยํ ยํ โยนุปปชฺชามิ, เทวตฺตํ อถ มานุสํ;

อนุโภมิ สุขํ สพฺพํ [สพฺพเมตํ (สฺยา.)], เอกตฺถมฺภสฺสิทํ ผลํฯ

[25]

‘‘จตุนฺนวุติโต กปฺเป, ยํ ถมฺภมททํ ตทา;

ทุคฺคติํ นาภิชานามิ, เอกตฺถมฺภสฺสิทํ ผลํฯ

[26]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกตฺถมฺภิโก เถโร อิมา คาถาโย อภาสิตฺถาติฯ

เอกตฺถมฺภิกตฺเถรสฺสาปทานํ ทุติยํฯ

3. นนฺทตฺเถรอปทานํ

[27]

‘‘ปทุมุตฺตรสฺส ภควโต, โลกเชฏฺฐสฺส ตาทิโน;

วตฺถํ โขมํ มยา ทินฺนํ, สยมฺภุสฺส มเหสิโนฯ

[28]

‘‘ตํ เม พุทฺโธ วิยากาสิ, ชลชุตฺตรนามโก;

‘อิมินา วตฺถทาเนน, เหมวณฺโณ ภวิสฺสสิฯ

[29]

‘‘‘ทฺเว สมฺปตฺตี อนุโภตฺวา, กุสลมูเลหิ โจทิโต;

โคตมสฺส ภควโต, กนิฏฺโฐ ตฺวํ ภวิสฺสสิฯ

[30]

‘‘‘ราครตฺโต สุขสีโล, กาเมสุ เคธมายุโต;

พุทฺเธน โจทิโต สนฺโต, ตทา [ตโต (สฺยา.)] ตฺวํ ปพฺพชิสฺสสิฯ

[31]

‘‘‘ปพฺพชิตฺวาน ตฺวํ ตตฺถ, กุสลมูเลน โจทิโต;

สพฺพาสเว ปริญฺญาย, นิพฺพายิสฺสสินาสโว’ฯ

[32]