‘‘นทีโสตปฏิภาคา , โภคา นิพฺพตฺตเร มม;
ปริเมตุํ น สกฺโกมิ, ปตฺโถทนสฺสิทํ ผลํฯ
[179]
‘‘อิมํ ขาท อิมํ ภุญฺช, อิมมฺหิ สยเน สย;
เตนาหํ สุขิโต โหมิ, ปตฺโถทนสฺสิทํ ผลํฯ
[180]
‘‘จตุนฺนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, ปตฺโถทนสฺสิทํ ผลํฯ
[181]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[182]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[183]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปตฺโถทนทายโก เถโร อิมา คาถาโย อภาสิตฺถาติฯ
ปตฺโถทนทายกตฺเถรสฺสาปทานํ นวมํฯ
10. มญฺจทายกตฺเถรอปทานํ
[184]
‘‘ปรินิพฺพุเต การุณิเก, สิทฺธตฺเถ โลกนายเก;
วิตฺถาริเก ปาวจเน, เทวมานุสสกฺกเตฯ
[185]
‘‘จณฺฑาโล อาสหํ ตตฺถ, อาสนฺทิปีฐการโก;
เตน กมฺเมน ชีวามิ, เตน โปเสมิ ทารเกฯ
[186]
‘‘อาสนฺทิํ สุกตํ กตฺวา, ปสนฺโน เสหิ ปาณิภิ;
สยเมวุปคนฺตฺวาน, ภิกฺขุสงฺฆสฺสทาสหํฯ
[187]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[188]
‘‘เทวโลกคโต สนฺโต, โมทามิ ติทเส คเณ;
สยนานิ มหคฺฆานิ, นิพฺพตฺตนฺติ ยทิจฺฉกํฯ
[189]
‘‘ปญฺญาสกฺขตฺตุํ เทวินฺโท, เทวรชฺชมการยิํ;
อสีติกฺขตฺตุํ ราชา จ, จกฺกวตฺตี อโหสหํฯ
[190]
‘‘ปเทสรชฺชํ วิปุลํ, คณนาโต อสงฺขิยํ;
สุขิโต ยสวา โหมิ, มญฺจทานสฺสิทํ ผลํฯ
[191]
‘‘เทวโลกา จวิตฺวาน, เอมิ เจ มานุสํ ภวํ;
มหารหา สุสยนา, สยเมว ภวนฺติ เมฯ
[192]
‘‘อยํ ปจฺฉิมโก มยฺหํ, จริโม วตฺตเต ภโว;
อชฺชาปิ สยเน กาเล [สยนกาเล (สฺยา.)], สยนํ อุปติฏฺฐติฯ
[193]
‘‘จตุนฺนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, มญฺจทานสฺสิทํ ผลํฯ
[194]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[195]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[196]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มญฺจทายโก เถโร อิมา คาถาโย
อภาสิตฺถาติฯ
มญฺจทายกตฺเถรสฺสาปทานํ ทสมํฯ
ภทฺทาลิวคฺโค พาจตฺตาลีสโมฯ
ตสฺสุทฺทานํ –
ภทฺทาลี เอกฉตฺโต จ, ติณสูโล จ มํสโท;
นาคปลฺลวิโก ทีปี, อุจฺฉงฺคิ ยาคุทายโกฯ
ปตฺโถทนี มญฺจทโท, คาถาโย คณิตา จิห;
ทฺเวสตานิ จ คาถานํ, คาถา เจกา ตทุตฺตริฯ