‘‘ภควา ตมฺหิ สมเย, ภิกฺขุสงฺฆปุรกฺขโต;

มหตา อานุภาเวน, นิยฺยาติ โลกนายโกฯ

[144]

‘‘ทิสฺวาน โลกปชฺโชตํ, วิปสฺสิํ โลกตารณํ;

ปุปฺผํ ปคฺคยฺห อุจฺฉงฺคา, พุทฺธเสฏฺฐํ อปูชยิํฯ

[145]

‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[146]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[147]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[148]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อุจฺฉงฺคปุปฺผิโย เถโร อิมา คาถาโย อภาสิตฺถาติฯ

อุจฺฉงฺคปุปฺผิยตฺเถรสฺสาปทานํ สตฺตมํฯ

8. ยาคุทายกตฺเถรอปทานํ

[149]

‘‘อติถิํ [อตีตํ (ก.)] เม คเหตฺวาน, อคจฺฉิํ คามกํ ตทา;

สมฺปุณฺณนทิกํ ทิสฺวา, สงฺฆารามํ อุปาคมิํฯ

[150]

‘‘อารญฺญกา ธุตธรา, ฌายิโน ลูขจีวรา;

วิเวกาภิรตา ธีรา, สงฺฆาราเม วสนฺติ เตฯ

[151]

‘‘คติ เตสํ อุปจฺฉินฺนา, สุวิมุตฺตาน ตาทินํ;

ปิณฺฑาย เต น คจฺฉนฺติ, โอรุทฺธนทิตาย หิ [โอรุทฺธนทิกายติํ (สฺยา.)]ฯ

[152]

‘‘ปสนฺนจิตฺโต สุมโน, เวทชาโต กตญฺชลี;

ตณฺฑุลํ เม คเหตฺวาน, ยาคุทานํ อทาสหํฯ

[153]

‘‘ปญฺจนฺนํ ยาคุํ ทตฺวาน, ปสนฺโน เสหิ ปาณิภิ;

สกกมฺมาภิรทฺโธหํ, ตาวติํสมคจฺฉหํฯ

[154]

‘‘มณิมยญฺจ เม พฺยมฺหํ, นิพฺพตฺติ ติทเส คเณ;

นารีคเณหิ สหิโต, โมทามิ พฺยมฺหมุตฺตเมฯ

[155]

‘‘เตตฺติํสกฺขตฺตุํ เทวินฺโท, เทวรชฺชมการยิํ;

ติํสกฺขตฺตุํ จกฺกวตฺตี, มหารชฺชมการยิํฯ

[156]

‘‘ปเทสรชฺชํ วิปุลํ, คณนาโต อสงฺขิยํ;

เทวโลเก มนุสฺเส วา, อนุโภตฺวา สยํ [ยสํ (สฺยา.)] อหํฯ

[157]

‘‘ปจฺฉิเม ภเว สมฺปตฺเต, ปพฺพชิํ อนคาริยํ;

สห โอโรปิเต เกเส, สพฺพํ สมฺปฏิวิชฺฌหํฯ

[158]

‘‘ขยโต วยโต จาปิ, สมฺมสนฺโต กเฬวรํ;

ปุเร สิกฺขาปทาทานา, อรหตฺตมปาปุณิํฯ

[159]

‘‘สุทินฺนํ เม ทานวรํ, วาณิชฺชํ สมฺปโยชิตํ;

เตเนว ยาคุทาเนน, ปตฺโตมฺหิ อจลํ ปทํฯ

[160]

‘‘โสกํ ปริทฺทวํ พฺยาธิํ, ทรถํ จิตฺตตาปนํ;

นาภิชานามิ อุปฺปนฺนํ, ยาคุทานสฺสิทํ ผลํฯ

[161]

‘‘ยาคุํ สงฺฆสฺส ทตฺวาน, ปุญฺญกฺเขตฺเต อนุตฺตเร;

ปญฺจานิสํเส อนุโภมิ, อโห ยาคุสุยิฏฺฐตาฯ

[162]

‘‘อพฺยาธิตา รูปวตา, ขิปฺปํ ธมฺมนิสนฺติตา [นิพุชฺฌิตา (สฺยา.)];

ลาภิตา อนฺนปานสฺส, อายุ ปญฺจมกํ มมฯ

[163]

‘‘โย โกจิ เวทํ ชนยํ, สงฺเฆ ยาคุํ ทเทยฺย โส;

อิมานิ ปญฺจ ฐานานิ, ปฏิคณฺเหยฺย ปณฺฑิโตฯ

[164]

‘‘กรณียํ กตํ สพฺพํ, ภวา อุคฺฆาฏิตา มยา;

สพฺพาสวา ปริกฺขีณา, นตฺถิ ทานิ ปุนพฺภโวฯ

[165]

‘‘โส อหํ วิจริสฺสามิ, คามา คามํ ปุรา ปุรํ;

นมสฺสมาโน สมฺพุทฺธํ, ธมฺมสฺส จ สุธมฺมตํฯ

[166]

‘‘ติํสกปฺปสหสฺสมฺหิ, ยํ ทานมททิํ ตทา;

ทุคฺคติํ นาภิชานามิ, ยาคุทานสฺสิทํ ผลํฯ

[167]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[168]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[169]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ยาคุทายโก เถโร อิมา คาถาโย อภาสิตฺถาติฯ

ยาคุทายกตฺเถรสฺสาปทานํ อฏฺฐมํฯ

9. ปตฺโถทนทายกตฺเถรอปทานํ

[170]

‘‘วนจารี ปุเร อาสิํ, สตตํ วนกมฺมิโก;

ปตฺโถทนํ คเหตฺวาน, กมฺมนฺตํ อคมาสหํฯ

[171]

‘‘ตตฺถทฺทสาสิํ สมฺพุทฺธํ, สยมฺภุํ อปราชิตํ;

วนา ปิณฺฑาย นิกฺขนฺตํ, ทิสฺวา จิตฺตํ ปสาทยิํฯ

[172]

‘‘ปรกมฺมายเน [วยกมฺมายเน (ก.)] ยุตฺโต, ปุญฺญญฺจ เม น วิชฺชติ;

อยํ ปตฺโถทโน อตฺถิ, โภชยิสฺสามหํ [โภชยิสฺสามิ มํ (สฺยา.)] มุนิํฯ

[173]

‘‘ปตฺโถทนํ คเหตฺวาน, สยมฺภุสฺส อทาสหํ;

มม นิชฺฌายมานสฺส, ปริภุญฺชิ ตทา มุนิฯ

[174]

‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวติํสมคจฺฉหํฯ

[175]

‘‘ฉตฺติํสกฺขตฺตุํ เทวินฺโท, เทวรชฺชมการยิํ;

เตตฺติํสกฺขตฺตุํ ราชา จ, จกฺกวตฺตี อโหสหํฯ

[176]

‘‘ปเทสรชฺชํ วิปุลํ, คณนาโต อสงฺขิยํ;

สุขิโต ยสวา โหมิ, ปตฺโถทนสฺสิทํ ผลํฯ

[177]

‘‘ภวาภเว สํสรนฺโต, ลภามิ อมิตํ ธนํ;

โภเค เม อูนตา นตฺถิ, ปตฺโถทนสฺสิทํ ผลํฯ

[178]