‘‘นาคปลฺลวมาทาย , พุทฺธสฺส อภิโรปยิํ;
ปสนฺนจิตฺโต สุมโน, สุคตํ อภิวาทยิํฯ
[120]
‘‘เอกนวุติโต กปฺเป, ยํ ปลฺลวมปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[121]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[122]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[123]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา นาคปลฺลโว เถโร อิมา คาถาโย อภาสิตฺถาติฯ
นาคปลฺลวตฺเถรสฺสาปทานํ ปญฺจมํฯ
6. เอกทีปิยตฺเถรอปทานํ
[124]
‘‘ปรินิพฺพุเต สุคเต, สิทฺธตฺเถ โลกนายเก;
สเทวมานุสา สพฺเพ, ปูเชนฺติ ทฺวิปทุตฺตมํฯ
[125]
‘‘อาโรปิเต จ จิตเก, สิทฺธตฺเถ โลกนายเก;
ยถาสเกน ถาเมน, จิตํ ปูเชนฺติ สตฺถุโนฯ
[126]
‘‘อวิทูเร จิตกสฺส, ทีปํ อุชฺชาลยิํ อหํ;
ยาว อุเทติ สูริโย, ทีปํ เม ตาว อุชฺชลิฯ
[127]
‘‘เตน กมฺเมน สุกเตน, เจตนาปณิธีหิ จ;
ชหิตฺวา มานุสํ เทหํ, ตาวติํสมคจฺฉหํฯ
[128]
‘‘ตตฺถ เม สุกตํ พฺยมฺหํ, เอกทีปีติ ญายติ;
ทีปสตสหสฺสานิ, พฺยมฺเห ปชฺชลเร มมฯ
[129]
‘‘อุทยนฺโตว สูริโย, เทโห เม โชตเต สทา;
สปฺปภาหิ สรีรสฺส, อาโลโก โหติ เม สทาฯ
[130]
‘‘ติโรกุฏฺฏํ [ติโรกุฑฺฑํ (สี. สฺยา. ก.)] ติโรเสลํ, สมติคฺคยฺห [สพฺพตฺถปิ เอวเมว ทิสฺสติ] ปพฺพตํ;
สมนฺตา โยชนสตํ, ปสฺสามิ จกฺขุนา อหํฯ
[131]
‘‘สตฺตสตฺตติกฺขตฺตุญฺจ , เทวโลเก รมิํ อหํ;
เอกติํสติกฺขตฺตุญฺจ, เทวรชฺชมการยิํฯ
[132]
‘‘อฏฺฐวีสติกฺขตฺตุญฺจ, จกฺกวตฺตี อโหสหํ;
ปเทสรชฺชํ วิปุลํ, คณนาโต อสงฺขิยํฯ
[133]
‘‘เทวโลกา จวิตฺวาน, นิพฺพตฺติํ มาตุกุจฺฉิยํ;
มาตุกุจฺฉิคตสฺสาปิ, อกฺขิ เม น นิมีลติฯ
[134]
‘‘ชาติยา จตุวสฺโสหํ, ปพฺพชิํ อนคาริยํ;
อฑฺฒมาเส อสมฺปตฺเต, อรหตฺตมปาปุณิํฯ
[135]
‘‘ทิพฺพจกฺขุํ วิโสเธสิํ, ภวา สพฺเพ สมูหตา;
สพฺเพ กิเลสา สญฺฉินฺนา, เอกทีปสฺสิทํ ผลํฯ
[136]
‘‘ติโรกุฏฺฏํ ติโรเสลํ, ปพฺพตญฺจาปิ เกวลํ;
สมติกฺกมฺม [สพฺพตฺถปี เอวเมว ทิสฺสติ] ปสฺสามิ, เอกทีปสฺสิทํ ผลํฯ
[137]
‘‘วิสมา เม สมา โหนฺติ, อนฺธกาโร น วิชฺชติ;
นาหํ ปสฺสามิ ติมิรํ, เอกทีปสฺสิทํ ผลํฯ
[138]
‘‘จตุนฺนวุติโต กปฺเป, ยํ ทีปมททิํ ตทา;
ทุคฺคติํ นาภิชานามิ, เอกทีปสฺสิทํ ผลํฯ
[139]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[140]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[141]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกทีปิโย เถโร อิมา คาถาโย อภาสิตฺถาติฯ
เอกทีปิยตฺเถรสฺสาปทานํ ฉฏฺฐํฯ
7. อุจฺฉงฺคปุปฺผิยตฺเถรอปทานํ
[142]
‘‘นคเร พนฺธุมติยา, อโหสิํ มาลิโก ตทา;
อุจฺฉงฺคํ ปูรยิตฺวาน, อคมํ อนฺตราปณํฯ
[143]