เมนู

‘‘กิเลสา ฌาปิตา มยฺหํ…เป.… วิหรามิ อนาสโวฯ

[328]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[329]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ชตุกณฺณิตฺเถโร อิมา คาถาโย อภาสิตฺถาติฯ

ชตุกณฺณิตฺเถรสฺสาปทานํ นวมํฯ

10. อุเทนตฺเถรอปทานํ

[330]

‘‘หิมวนฺตสฺสาวิทูเร , ปทุโม นาม ปพฺพโต;

อสฺสโม สุกโต มยฺหํ, ปณฺณสาลา สุมาปิตาฯ

[331]

‘‘นทิโย สนฺทเร ตตฺถ, สุปติตฺถา มโนรมา;

อจฺโฉทกา สีตชลา, สนฺทเร นทิโย สทาฯ

[332]

‘‘ปาฐีนา ปาวุสา มจฺฉา, พลชา มุญฺชโรหิตา;

โสเภนฺตา นทิโย เอเต, วสนฺติ นทิยา สทาฯ

[333]

‘‘อมฺพชมฺพูหิ สญฺฉนฺนา, กเรริติลกา ตถา;

อุทฺทาลกา ปาฏลิโย, โสเภนฺติ มม อสฺสมํฯ

[334]

‘‘องฺโกลกา พิมฺพิชาลา, มายาการี จ ปุปฺผิตา;

คนฺเธน อุปวายนฺตา, โสเภนฺติ มม อสฺสมํฯ

[335]

‘‘อติมุตฺตา สตฺตลิกา, นาคา สาลา จ ปุปฺผิตา;

ทิพฺพคนฺธํ สมฺปวนฺตา, โสเภนฺติ มม อสฺสมํฯ

[336]

‘‘โกสมฺพา สฬลา นีปา, อฏฺฐงฺคาปิ จ ปุปฺผิตา [อฏฺฐงฺคา จ สุปุปฺผิตา (สี.), กฏฺฐงฺคา จ สุปุปฺผิตา (ปี.)];

ทิพฺพคนฺธํ สมฺปวนฺตา, โสเภนฺติ มม อสฺสมํฯ

[337]

‘‘หรีตกา อามลกา, อมฺพชมฺพุวิภีตกา;

โกลา ภลฺลาตกา พิลฺลา, ผลานิ พหุ อสฺสเมฯ

[338]

‘‘กลมฺพา กนฺทลี ตตฺถ, ปุปฺผนฺติ มม อสฺสเม;

ทิพฺพคนฺธํ [ทิพฺพคนฺธา (สี. สฺยา. ปี.) เอวํ ปรตฺถปิ] สมฺปวนฺตา, โสเภนฺติ มม อสฺสมํฯ

[339]

‘‘อโสกปิณฺฑิวารี [อโสกปิณฺฑี จ วรี (สี. สฺยา.), อโสกปิณฺฑี จ วารี (ปี.)], นิมฺพรุกฺขา จ ปุปฺผิตา;

ทิพฺพคนฺธํ สมฺปวนฺตา, โสเภนฺติ มม อสฺสมํฯ

[340]

‘‘ปุนฺนาคา คิริปุนฺนาคา, ติมิรา ตตฺถ ปุปฺผิตา;

ทิพฺพคนฺธํ สมฺปวนฺตา, โสเภนฺติ มม อสฺสมํฯ

[341]

‘‘นิคฺคุณฺฑี สิรินิคฺคุณฺฑี, จมฺปรุกฺเขตฺถ ปุปฺผิตา;

ทิพฺพคนฺธํ สมฺปวนฺตา, โสเภนฺติ มม อสฺสมํฯ

[342]

‘‘อวิทูเร โปกฺขรณี, จกฺกวากูปกูชิตา;

มนฺทาลเกหิ สญฺฉนฺนา, ปทุมุปฺปลเกหิ จฯ

[343]

‘‘อจฺโฉทกา สีตชลา, สุปติตฺถา มโนรมา;

อจฺฉา ผลิกสมานา, โสเภนฺติ มม อสฺสมํฯ

[344]

‘‘ปทุมา ปุปฺผเร ตตฺถ, ปุณฺฑรีกา จ อุปฺปลา;

มนฺทาลเกหิ สญฺฉนฺนา, โสเภนฺติ มม อสฺสมํฯ

[345]

‘‘ปาฐีนา ปาวุสา มจฺฉา, พลชา มุญฺชโรหิตา;

วิจรนฺตาว เต ตตฺถ, โสเภนฺติ มม อสฺสมํฯ

[346]

‘‘กุมฺภีลา สุสุมารา จ, กจฺฉปา จ คหา พหู;

โอคหา อชครา จ, โสเภนฺติ มม อสฺสมํฯ

[347]

‘‘ปาเรวตา รวิหํสา, จกฺกวากา นทีจรา;

ทินฺทิภา สาฬิกา เจตฺถ, โสเภนฺติ มม อสฺสมํฯ

[348]

‘‘นยิตา อมฺพคนฺธี จ, เกตกา ตตฺถ ปุปฺผิตา;

ทิพฺพคนฺธํ สมฺปวนฺตา, โสเภนฺติ มม อสฺสมํฯ

[349]

‘‘สีหา พฺยคฺฆา จ ทีปี จ, อจฺฉโกกตรจฺฉกา;

อนุสญฺจรนฺตา ปวเน, โสเภนฺติ มม อสฺสมํฯ

[350]

‘‘ชฏาภาเรน ภริตา, อชินุตฺตรวาสนา;

อนุสญฺจรนฺตา ปวเน, โสเภนฺติ มม อสฺสมํฯ

[351]

‘‘อชินานิธรา เอเต, นิปกา สนฺตวุตฺติโน;

อปฺปาหาราว เต สพฺเพ, โสเภนฺติ มม อสฺสมํฯ

[352]

‘‘ขาริภารํ คเหตฺวาน, อชฺโฌคยฺห วนํ ตทา;

มูลผลานิ ภุญฺชนฺตา, วสนฺติ อสฺสเม ตทาฯ

[353]

‘‘น เต ทารุํ อาหรนฺติ, อุทกํ ปาทโธวนํ;

สพฺเพสํ อานุภาเวน, สยเมวาหรียติฯ

[354]

‘‘จุลฺลาสีติสหสฺสานิ, อิสเยตฺถ สมาคตา;

สพฺเพว ฌายิโน เอเต, อุตฺตมตฺถคเวสกาฯ

[355]

‘‘ตปสฺสิโน พฺรหฺมจารี, โจเทนฺตา อปฺปนาว เต;

อมฺพราวจรา สพฺเพ, วสนฺติ อสฺสเม ตทาฯ

[356]

‘‘ปญฺจาหํ สนฺนิปตนฺติ, เอกคฺคา สนฺตวุตฺติโน;

อญฺโญญฺญํ อภิวาเทตฺวา, ปกฺกมนฺติ ทิสามุขาฯ

[357]

‘‘ปทุมุตฺตโร นาม ชิโน, สพฺพธมฺมาน ปารคู;

ตมนฺธการํ วิธมํ, อุปฺปชฺชิ ตาวเท ชิโนฯ

[358]

‘‘มม อสฺสมสามนฺตา, ยกฺโข อาสิ มหิทฺธิโก;

โส เม สํสิตฺถ สมฺพุทฺธํ, ชลชุตฺตมนายกํฯ

[359]

‘‘เอส พุทฺโธ สมุปฺปนฺโน, ปทุมุตฺตโร มหามุนิ;

ขิปฺปํ คนฺตฺวาน สมฺพุทฺธํ, ปยิรูปาส มาริสฯ

[360]

‘‘ยกฺขสฺส วจนํ สุตฺวา, วิปฺปสนฺเนน เจตสา;

อสฺสมํ สํสาเมตฺวาน, นิกฺขมิํ วิปินา ตทาฯ

[361]

‘‘เจเฬว ฑยฺหมานมฺหิ, นิกฺขมิตฺวาน อสฺสมา;

เอกรตฺติํ นิวาเสตฺวา [นิวสิตฺวา (สี.), นิวาเสน (?)], อุปคจฺฉิํ วินายกํฯ

[362]

‘‘ปทุมุตฺตโร โลกวิทู, อาหุตีนํ ปฏิคฺคโห;

จตุสจฺจํ ปกาเสนฺโต, เทเสสิ อมตํ ปทํฯ

[363]

‘‘สุผุลฺลํ ปทุมํ คยฺห, อุปคนฺตฺวา มเหสิโน;

ปสนฺนจิตฺโต สุมโน, พุทฺธสฺส อภิโรปยิํฯ

[364]

‘‘ปูชยิตฺวาน สมฺพุทฺธํ, ชลชุตฺตมนายกํ;

เอกํสํ อชินํ กตฺวา, สนฺถวิํ โลกนายกํฯ

[365]

‘‘เยน ญาเณน สมฺพุทฺโธ, วสตีห อนาสโว;

ตํ ญาณํ กิตฺตยิสฺสามิ, สุณาถ มม ภาสโตฯ

[366]

‘‘‘สํสารโสตํ ฉินฺทิตฺวา, ตาเรสิ สพฺพปาณินํ;

ตว ธมฺมํ สุณิตฺวาน, ตณฺหาโสตํ ตรนฺติ เตฯ

[367]

‘‘‘ตุวํ สตฺถา จ เกตุ จ, ธโช ยูโป จ ปาณินํ;

ปรายโณ ปติฏฺฐา จ, ทีโป จ ทฺวิปทุตฺตม [ทิปทุตฺตม (สี. สฺยา. ปี.)]

[368]

‘‘‘ยาวตา คณิโน โลเก, สตฺถวาหา ปวุจฺจเร;

ตุวํ อคฺโคสิ สพฺพญฺญุ, ตว อนฺโตคธาว เตฯ

[369]

‘‘‘ตว ญาเณน สพฺพญฺญุ, ตาเรสิ ชนตํ พหุํ;

ตว ทสฺสนมาคมฺม, ทุกฺขสฺสนฺตํ กริสฺสเรฯ

[370]

‘‘‘เย เกจิเม คนฺธชาตา, โลเก วายนฺติ จกฺขุม;

ตว คนฺธสโม นตฺถิ, ปุญฺญกฺเขตฺเต มหามุเน’ฯ

[371]

‘‘‘ติรจฺฉานโยนิํ นิรยํ, ปริโมเจสิ [ปริโมเจหิ (สฺยา. ก.)] จกฺขุม;

อสงฺขตํ ปทํ สนฺตํ, เทเสสิ [เทเสหิ (สฺยา. ก.)] ตฺวํ มหามุเน’ฯ

[372]

‘‘ปทุมุตฺตโร โลกวิทู, อาหุตีนํ ปฏิคฺคโห;

ภิกฺขุสงฺเฆ นิสีทิตฺวา, อิมา คาถา อภาสถฯ

[373]

‘‘‘โย เม ญาณํ อปูเชสิ, ปสนฺโน เสหิ ปาณิภิ;

ตมหํ กิตฺตยิสฺสามิ, สุณาถ มม ภาสโตฯ

[374]

‘‘‘ติํสกปฺปสหสฺสานิ, เทวโลเก รมิสฺสติ;

สหสฺสกฺขตฺตุํ ราชา จ, จกฺกวตฺตี ภวิสฺสติ’ฯ

[375]

‘‘สุลทฺธลาภํ ลทฺโธมฺหิ, โตสยิตฺวาน สุพฺพตํ;

สพฺพาสเว ปริญฺญาย, วิหรามิ อนาสโวฯ

[376]

‘‘กิเลสา ฌาปิตา มยฺหํ…เป.… วิหรามิ อนาสโวฯ

[377]

‘‘สฺวาคตํ วต เม อาสิ…เป.… กตํ พุทฺธสฺส สาสนํฯ

[378]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อุเทโน เถโร อิมา คาถาโย อภาสิตฺถาติฯ

อุเทนตฺเถรสฺสาปทานํ ทสมํฯ

เมตฺเตยฺยวคฺโค เอกจตฺตาลีสโมฯ

ตสฺสุทฺทานํ –

เมตฺเตยฺโย ปุณฺณโก เถโร, เมตฺตคู โธตโกปิ จ;

อุปสิโว จ นนฺโท จ, เหมโก สตฺตโม ตหิํฯ

โตเทยฺโย ชตุกณฺณี จ, อุเทโน จ มหายโส;

ตีณิ คาถาสตาเนตฺถ, อสีติ ตีณิ จุตฺตริํฯ

42. ภทฺทาลิวคฺโค