‘‘เตน กมฺมวิปาเกน, อจริํ ทุกฺกรํ พหุํ;
ฉพฺพสฺสานุรุเวฬายํ, ตโต โพธิมปาปุณิํฯ
[94]
‘‘นาหํ เอเตน มคฺเคน, ปาปุณิํ โพธิมุตฺตมํ;
กุมฺมคฺเคน คเวสิสฺสํ, ปุพฺพกมฺเมน วาริโตฯ
[95]
‘‘ปุญฺญปาปปริกฺขีโณ, สพฺพสนฺตาปวชฺชิโต;
อโสโก อนุปายาโส, นิพฺพายิสฺสมนาสโวฯ
[96]
‘‘เอวํ ชิโน วิยากาสิ, ภิกฺขุสงฺฆสฺส อคฺคโต;
สพฺพาภิญฺญาพลปฺปตฺโต, อโนตตฺเต มหาสเร’’ติฯ
อิตฺถํ สุทํ ภควา อตฺตโน ปุพฺพจริตํ กมฺมปิโลติกํ นาม พุทฺธาปทานธมฺมปริยายํ อภาสิตฺถาติฯ
ปุพฺพกมฺมปิโลติกํ นาม พุทฺธาปทานํ ทสมํฯ
อวฏผลวคฺโค เอกูนจตฺตาลีสโมฯ
ตสฺสุทฺทานํ –
อวฏํ ลพุชญฺเจว, อุทุมฺพรปิลกฺขุ จ;
ผารุ วลฺลี จ กทลี, ปนโส โกฏิวีสโกฯ
ปุพฺพกมฺมปิโลติ จ, อปทานํ มเหสิโน;
คาถาโย เอกนวุติ, คณิตาโย วิภาวิภิฯ
จุทฺทสมํ ภาณวารํฯ
40. ปิลินฺทวจฺฉวคฺโค
1. ปิลินฺทวจฺฉตฺเถรอปทานํ
[1]
‘‘นคเร หํสวติยา, อาสิํ โทวาริโก อหํ;
อกฺโขภํ อมิตํ โภคํ, ฆเร สนฺนิจิตํ มมฯ
[2]
‘‘รโหคโต นิสีทิตฺวา, ปหํสิตฺวาน มานสํ [สมฺปหํสิตฺว มานสํ (สี.)];
นิสชฺช ปาสาทวเร, เอวํ จินฺเตสหํ ตทาฯ
(จินฺตนากาโร)
[3]
‘‘‘พหู เมธิคตา โภคา, ผีตํ อนฺเตปุรํ มม;
ราชาปิ [ราชิสิ (ก.)] สนฺนิมนฺเตสิ, อานนฺโท ปถวิสฺสโรฯ
[4]
‘‘‘อยญฺจ พุทฺโธ อุปฺปนฺโน, อธิจฺจุปฺปตฺติโก มุนิ;
สํวิชฺชนฺติ จ เม โภคา, ทานํ ทสฺสามิ สตฺถุโนฯ
[5]
‘‘‘ปทุเมน ราชปุตฺเตน, ทินฺนํ ทานวรํ ชิเน;
หตฺถินาเค จ ปลฺลงฺเก, อปสฺเสนญฺจนปฺปกํฯ
[6]
‘‘‘อหมฺปิ ทานํ ทสฺสามิ, สงฺเฆ คณวรุตฺตเม;
อทินฺนปุพฺพมญฺเญสํ, ภวิสฺสํ อาทิกมฺมิโกฯ
[7]
‘‘‘จินฺเตตฺวาหํ พหุวิธํ, ยาเค ยสฺส สุขํผลํ;
ปริกฺขารทานมทฺทกฺขิํ, มม สงฺกปฺปปูรณํฯ
[8]
‘‘‘ปริกฺขารานิ ทสฺสามิ, สงฺเฆ คณวรุตฺตเม;
อทินฺนปุพฺพมญฺเญสํ, ภวิสฺสํ อาทิกมฺมิโก’ฯ
(ทานวตฺถุสมฺปาทนํ)
[9]
‘‘นฬกาเร อุปาคมฺม, ฉตฺตํ กาเรสิ ตาวเท;
ฉตฺตสตสหสฺสานิ, เอกโต สนฺนิปาตยิํฯ
[10]
‘‘ทุสฺสสตสหสฺสานิ, เอกโต สนฺนิปาตยิํ;
ปตฺตสตสหสฺสานิ, เอกโต สนฺนิปาตยิํฯ
[11]