6. วลฺลิผลทายกตฺเถรอปทานํ
[31]
‘‘สพฺเพ ชนา สมาคมฺม, อคมิํสุ วนํ ตทา;
ผลมนฺเวสมานา เต, อลภิํสุ ผลํ ตทาฯ
[32]
‘‘ตตฺถทฺทสาสิํ สมฺพุทฺธํ, สยมฺภุํ อปราชิตํ;
ปสนฺนจิตฺโต สุมโน, วลฺลิผลมทาสหํฯ
[33]
‘‘เอกตฺติํเส อิโต กปฺเป, ยํ ผลมททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[34]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[35]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[36]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา วลฺลิผลทายโก เถโร อิมา คาถาโย อภาสิตฺถาติฯ
วลฺลิผลทายกตฺเถรสฺสาปทานํ ฉฏฺฐํฯ
7. กทลิผลทายกตฺเถรอปทานํ
[37]
‘‘กณิการํว ชลิตํ, ปุณฺณมาเยว [ปุณฺณมาเสว (สี. ก.)] จนฺทิมํ;
ชลนฺตํ ทีปรุกฺขํว, อทฺทสํ โลกนายกํฯ
[38]
‘‘กทลิผลํ ปคฺคยฺห, อทาสิํ สตฺถุโน อหํ;
ปสนฺนจิตฺโต สุมโน, วนฺทิตฺวาน อปกฺกมิํฯ
[39]
‘‘เอกตฺติํเส อิโต กปฺเป, ยํ ผลมททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[40]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[41]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[42]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กทลิผลทายโก เถโร อิมา คาถาโย อภาสิตฺถาติฯ
กทลิผลทายกตฺเถรสฺสาปทานํ สตฺตมํฯ
8. ปนสผลทายกตฺเถรอปทานํ
[43]
‘‘อชฺชุโน นาม สมฺพุทฺโธ, หิมวนฺเต วสี ตทา;
จรเณน จ สมฺปนฺโน, สมาธิกุสโล มุนิฯ
[44]
‘‘กุมฺภมตฺตํ คเหตฺวาน, ปนสํ ชีวชีวกํ [เทวคนฺธิกํ (41 วคฺเค, 5 อปทาเน)];
ฉตฺตปณฺเณ ฐเปตฺวาน, อทาสิํ สตฺถุโน อหํฯ
[45]
‘‘เอกตฺติํเส อิโต กปฺเป, ยํ ผลมททิํ ตทา;
ทุคฺคติํ นาภิชานามิ, ผลทานสฺสิทํ ผลํฯ
[46]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[47]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[48]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปนสผลทายโก เถโร อิมา คาถาโย อภาสิตฺถาติฯ
ปนสผลทายกตฺเถรสฺสาปทานํ อฏฺฐมํฯ
9. โสณโกฏิวีสตฺเถรอปทานํ
[49]
‘‘วิปสฺสิโน ปาวจเน, เอกํ เลณํ มยา กตํ;
จาตุทฺทิสสฺส สงฺฆสฺส, พนฺธุมาราชธานิยาฯ
[50]
‘‘ทุสฺเสหิ ภูมิํ เลณสฺส, สนฺถริตฺวา ปริจฺจชิํ;
อุทคฺคจิตฺโต สุมโน, อกาสิํ ปณิธิํ ตทาฯ
[51]
‘‘อาราธเยยฺยํ สมฺพุทฺธํ, ปพฺพชฺชญฺจ ลเภยฺยหํ;
อนุตฺตรญฺจ นิพฺพานํ, ผุเสยฺยํ สนฺติมุตฺตมํฯ
[52]
‘‘เตเนว สุกฺกมูเลน, กปฺเป [กปฺปํ (สี.), กปฺป (ก.)] นวุติ สํสริํ;
เทวภูโต มนุสฺโส จ, กตปุญฺโญ วิโรจหํฯ
[53]
‘‘ตโต กมฺมาวเสเสน, อิธ ปจฺฉิมเก ภเว;
จมฺปายํ อคฺคเสฏฺฐิสฺส, ชาโตมฺหิ เอกปุตฺตโกฯ
[54]