‘‘เอกตฺติํเส อิโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[26]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อุทฺทาลกปุปฺผิโย เถโร อิมา คาถาโย อภาสิตฺถาติฯ

อุทฺทาลกปุปฺผิยตฺเถรสฺสาปทานํ สตฺตมํฯ

8. เอกจมฺปกปุปฺผิยตฺเถรอปทานํ

[27]

‘‘อุปสนฺโต จ สมฺพุทฺโธ, วสตี ปพฺพตนฺตเร;

เอกจมฺปกมาทาย, อุปคจฺฉิํ นรุตฺตมํฯ

[28]

‘‘ปสนฺนจิตฺโต สุมโน, ปจฺเจกมุนิมุตฺตมํ;

อุโภหตฺเถหิ ปคฺคยฺห, ปูชยิํ อปราชิตํฯ

[29]

‘‘ปญฺจสฏฺฐิมฺหิโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[30]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกจมฺปกปุปฺผิโย เถโร อิมา คาถาโย อภาสิตฺถาติฯ

เอกจมฺปกปุปฺผิยตฺเถรสฺสาปทานํ อฏฺฐมํฯ

9. ติมิรปุปฺผิยตฺเถรอปทานํ

[31]

‘‘จนฺทภาคานทีตีเร, อนุโสตํ วชามหํ;

อทฺทสํ วิรชํ พุทฺธํ, สาลราชํว ผุลฺลิตํฯ

[32]

‘‘ปสนฺนจิตฺโต สุมโน, ปจฺเจกมุนิมุตฺตมํ;

คเหตฺวา ติมิรํ ปุปฺผํ, มตฺถเก โอกิริํ อหํฯ

[33]

‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[34]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติมิรปุปฺผิโย เถโร อิมา คาถาโย อภาสิตฺถาติฯ

ติมิรปุปฺผิยตฺเถรสฺสาปทานํ นวมํฯ

10. สฬลปุปฺผิยตฺเถรอปทานํ

[35]

‘‘จนฺทภาคานทีตีเร , อโหสิํ กินฺนโร ตทา;

ตตฺถทฺทสํ เทวเทวํ, จงฺกมนฺตํ นราสภํฯ

[36]

‘‘โอจินิตฺวาน สฬลํ, ปุปฺผํ พุทฺธสฺสทาสหํ;

อุปสิงฺฆิ มหาวีโร, สฬลํ เทวคนฺธิกํฯ

[37]

‘‘ปฏิคฺคเหตฺวา สมฺพุทฺโธ, วิปสฺสี โลกนายโก;

อุปสิงฺฆิ มหาวีโร, เปกฺขมานสฺส เม สโตฯ

[38]

‘‘ปสนฺนจิตฺโต สุมโน, วนฺทิตฺวา ทฺวิปทุตฺตมํ;

อญฺชลิํ ปคฺคเหตฺวาน, ปุน ปพฺพตมารุหิํฯ

[39]

‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[40]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สฬลปุปฺผิโย เถโร อิมา คาถาโย อภาสิตฺถาติฯ

สฬลปุปฺผิยตฺเถรสฺสาปทานํ ทสมํฯ

มนฺทารวปุปฺผิยวคฺโค สตฺตติํสติโมฯ

ตสฺสุทฺทานํ –

มนฺทารวญฺจ กกฺการุ, ภิสเกสรปุปฺผิโย;

องฺโกลโก กทมฺพี จ, อุทฺทาลี เอกจมฺปโก;

ติมิรํ สฬลญฺเจว, คาถา ตาลีสเมว จฯ

38. โพธิวนฺทนวคฺโค