‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ยวกลาปิโย เถโร อิมา คาถาโย อภาสิตฺถาติฯ
ยวกลาปิยตฺเถรสฺสาปทานํ ทุติยํฯ
3. กิํสุกปูชกตฺเถรอปทานํ
[11]
‘‘กิํสุกํ ปุปฺผิตํ ทิสฺวา, ปคฺคเหตฺวาน อญฺชลิํ;
พุทฺธํ สริตฺวา สิทฺธตฺถํ, อากาเส อภิปูชยิํฯ
[12]
‘‘จตุนฺนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[13]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กิํสุกปูชโก เถโร อิมา คาถาโย อภาสิตฺถาติฯ
กิํสุกปูชกตฺเถรสฺสาปทานํ ตติยํฯ
4. สโกสกโกรณฺฑทายกตฺเถรอปทานํ
[14]
‘‘อกฺกนฺตญฺจ ปทํ ทิสฺวา, สิขิโน โลกพนฺธุโน;
เอกํสํ อชินํ กตฺวา, ปทเสฏฺฐํ อวนฺทหํฯ
[15]
‘‘โกรณฺฑํ ปุปฺผิตํ ทิสฺวา, ปาทปํ ธรณีรุหํ;
สโกสกํ [สโกฏกํ (สี. สฺยา.)] คเหตฺวาน, ปทจกฺกํ อปูชยิํฯ
[16]
‘‘เอกตฺติํเส อิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ปทปูชายิทํ ผลํฯ
[17]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สโกสก [สโกฏก (สี. สฺยา.)] โกรณฺฑทายโก เถโร อิมา คาถาโย อภาสิตฺถาติฯ
สโกสกโกรณฺฑทายกตฺเถรสฺสาปทานํ จตุตฺถํฯ
5. ทณฺฑทายกตฺเถรอปทานํ
[18]
‘‘กานนํ วนโมคยฺห, เวฬุํ เฉตฺวานหํ ตทา;
อาลมฺพนํ กริตฺวาน, สงฺฆสฺส อททํ อหํฯ
[19]
‘‘เตน จิตฺตปฺปสาเทน, สุพฺพเต อภิวาทิย;
อาลมฺพนมฺปิ ทตฺวาน, ปกฺกามิํ อุตฺตรามุโขฯ
[20]
‘‘จตุนฺนวุติโต กปฺเป, ยํ ทณฺฑมททิํ ตทา;
ทุคฺคติํ นาภิชานามิ, ทณฺฑทานสฺสิทํ ผลํฯ
[21]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ทณฺฑทายโก เถโร อิมา คาถาโย อภาสิตฺถาติฯ
ทณฺฑทายกตฺเถรสฺสาปทานํ ปญฺจมํฯ
6. อมฺพยาคุทายกตฺเถรอปทานํ
[22]
‘‘สตรํสี นาม สมฺพุทฺโธ, สยมฺภู อปราชิโต;
วุฏฺฐหิตฺวา สมาธิมฺหา, ภิกฺขาย มมุปาคมิฯ
[23]
‘‘ปจฺเจกพุทฺธํ ทิสฺวาน, อมฺพยาคุํ อทาสหํ;
วิปฺปสนฺนมนํ ตสฺส, วิปฺปสนฺเนน เจตสาฯ
[24]
‘‘จตุนฺนวุติโต กปฺเป, ยํ กมฺมมกริํ ตทา;
ทุคฺคติํ นาภิชานามิ, อมฺพยาคุยิทํ ผลํฯ
[25]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อมฺพยาคุทายโก เถโร อิมา คาถาโย อภาสิตฺถาติฯ
อมฺพยาคุทายกตฺเถรสฺสาปทานํ ฉฏฺฐํฯ
7. สุปุฏกปูชกตฺเถรอปทานํ
[26]
‘‘ทิวาวิหารา นิกฺขนฺโต, วิปสฺสี โลกนายโก;
ภิกฺขาย วิจรนฺโต โส, มม สนฺติกุปาคมิฯ
[27]