เมนู

1. สทฺทสญฺญกตฺเถรอปทานํ

[1]

‘‘มิคลุทฺโท ปุเร อาสิํ, อรญฺเญ กานเน อหํ;

ตตฺถทฺทสาสิํ สมฺพุทฺธํ, เทวสงฺฆปุรกฺขตํฯ

[2]

‘‘จตุสจฺจํ ปกาเสนฺตํ, อุทฺธรนฺตํ มหาชนํ;

อสฺโสสิํ มธุรํ วาจํ, กรวีกรุโทปมํ [รุโตปมํ (?)]

[3]

‘‘พฺรหฺมสรสฺส มุนิโน, สิขิโน โลกพนฺธุโน;

โฆเส จิตฺตํ ปสาเทตฺวา, ปตฺโตมฺหิ อาสวกฺขยํฯ

[4]

‘‘เอกตฺติํเส อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, ปสาทสฺส อิทํ ผลํฯ

[5]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา สทฺทสญฺญโก เถโร อิมา คาถาโย อภาสิตฺถาติฯ

สทฺทสญฺญกตฺเถรสฺสาปทานํ ปฐมํฯ

2. ยวกลาปิยตฺเถรอปทานํ

[6]

‘‘นคเร อรุณวติยา, อาสิํ ยวสิโก ตทา;

ปนฺเถ ทิสฺวาน สมฺพุทฺธํ, ยวกลาปํ สนฺถริํ [ยวกลาปมวตฺถริํ (สี.)]

[7]

‘‘อนุกมฺปโก การุณิโก, สิขี โลกคฺคนายโก;

มม สงฺกปฺปมญฺญาย, นิสีทิ ยวสนฺถเรฯ

[8]

‘‘ทิสฺวา นิสินฺนํ วิมลํ, มหาฌายิํ วินายกํ;

ปาโมชฺชํ ชนยิตฺวาน, ตตฺถ กาลงฺกโต อหํฯ

[9]

‘‘เอกตฺติํเส อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, ยวตฺถเร อิทํ ผลํฯ

[10]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ยวกลาปิโย เถโร อิมา คาถาโย อภาสิตฺถาติฯ

ยวกลาปิยตฺเถรสฺสาปทานํ ทุติยํฯ

3. กิํสุกปูชกตฺเถรอปทานํ

[11]

‘‘กิํสุกํ ปุปฺผิตํ ทิสฺวา, ปคฺคเหตฺวาน อญฺชลิํ;

พุทฺธํ สริตฺวา สิทฺธตฺถํ, อากาเส อภิปูชยิํฯ

[12]

‘‘จตุนฺนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[13]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา กิํสุกปูชโก เถโร อิมา คาถาโย อภาสิตฺถาติฯ

กิํสุกปูชกตฺเถรสฺสาปทานํ ตติยํฯ

4. สโกสกโกรณฺฑทายกตฺเถรอปทานํ

[14]

‘‘อกฺกนฺตญฺจ ปทํ ทิสฺวา, สิขิโน โลกพนฺธุโน;

เอกํสํ อชินํ กตฺวา, ปทเสฏฺฐํ อวนฺทหํฯ

[15]

‘‘โกรณฺฑํ ปุปฺผิตํ ทิสฺวา, ปาทปํ ธรณีรุหํ;

สโกสกํ [สโกฏกํ (สี. สฺยา.)] คเหตฺวาน, ปทจกฺกํ อปูชยิํฯ

[16]

‘‘เอกตฺติํเส อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, ปทปูชายิทํ ผลํฯ

[17]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สโกสก [สโกฏก (สี. สฺยา.)] โกรณฺฑทายโก เถโร อิมา คาถาโย อภาสิตฺถาติฯ

สโกสกโกรณฺฑทายกตฺเถรสฺสาปทานํ จตุตฺถํฯ