เมนู

5. นฬาคาริกตฺเถรอปทานํ

[31]

‘‘หิมวนฺตสฺสาวิทูเร , หาริโต นาม ปพฺพโต;

สยมฺภู นารโท นาม, รุกฺขมูเล วสี ตทาฯ

[32]

‘‘นฬาคารํ กริตฺวาน, ติเณน ฉาทยิํ อหํ;

จงฺกมํ โสธยิตฺวาน, สยมฺภุสฺส อทาสหํฯ

[33]

‘‘จตุทฺทสสุ กปฺเปสุ, เทวโลเก รมิํ อหํ;

จตุสตฺตติกฺขตฺตุญฺจ, เทวรชฺชํ อการยิํฯ

[34]

‘‘จตุสตฺตติ [สตฺตสตฺตติ (สี.)] กฺขตฺตุญฺจ , จกฺกวตฺตี อโหสหํ;

ปเทสรชฺชํ วิปุลํ, คณนาโต อสงฺขิยํฯ

[35]

‘‘อุพฺพิทฺธํ ภวนํ มยฺหํ, อินฺทลฏฺฐีว อุคฺคตํ;

สหสฺสถมฺภํ อตุลํ, วิมานํ สปภสฺสรํฯ

[36]

‘‘ทฺเว สมฺปตฺตี อนุโภตฺวา, สุกฺกมูเลน โจทิโต;

โคตมสฺส ภควโต, สาสเน ปพฺพชิํ อหํฯ

[37]

‘‘ปธานปหิตตฺโตมฺหิ , อุปสนฺโต นิรูปธิ;

นาโคว พนฺธนํ เฉตฺวา, วิหรามิ อนาสโวฯ

[38]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา นฬาคาริโก เถโร อิมา คาถาโย อภาสิตฺถาติฯ

นฬาคาริกตฺเถรสฺสาปทานํ ปญฺจมํฯ

6. จมฺปกปุปฺผิยตฺเถรอปทานํ

[39]

‘‘หิมวนฺตสฺสาวิทูเร, ชาปโล [จาปโล (สี.), ฉาปโล (สฺยา.)] นาม ปพฺพโต;

พุทฺโธ สุทสฺสโน นาม, วิหาสิ ปพฺพตนฺตเรฯ

[40]

‘‘ปุปฺผํ เหมวนฺตํ [เหมวตํ (สี.), เหมวณฺณํ (สฺยา.)] คยฺห, คจฺฉํ เวหายเสนหํ;

อทฺทสํ วิรชํ พุทฺธํ, โอฆติณฺณมนาสวํฯ

[41]

‘‘สตฺต จมฺปกปุปฺผานิ, สีเส กตฺวานหํ ตทา;

พุทฺธสฺส อภิโรเปสิํ, สยมฺภุสฺส มเหสิโนฯ

[42]

‘‘เอกตฺติํเส อิโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[43]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา จมฺปกปุปฺผิโย เถโร อิมา คาถาโย อภาสิตฺถาติฯ

จมฺปกปุปฺผิยตฺเถรสฺสาปทานํ ฉฏฺฐํฯ

7. ปทุมปูชกตฺเถรอปทานํ

[44]

‘‘หิมวนฺตสฺสาวิทูเร , โรมโส นาม ปพฺพโต;

พุทฺโธปิ สมฺภโว นาม, อพฺโภกาเส วสี ตทาฯ

[45]

‘‘ภวนา นิกฺขมิตฺวาน, ปทุมํ ธารยิํ อหํ;

เอกาหํ ธารยิตฺวาน, ปุน ภวนุปาคมิํฯ

[46]

‘‘เอกนวุติโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[47]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปทุมปูชโก เถโร อิมา คาถาโย อภาสิตฺถาติฯ

ปทุมปูชกตฺเถรสฺสาปทานํ สตฺตมํฯ

เตรสมํ ภาณวารํฯ

8. ติณมุฏฺฐิทายกตฺเถรอปทานํ

[48]

‘‘หิมวนฺตสฺสาวิทูเร, ลมฺพโก นาม ปพฺพโต;

อุปติสฺโส นาม สมฺพุทฺโธ, อพฺโภกาสมฺหิ จงฺกมิฯ

[49]