เมนู

1. เอกปทุมิยตฺเถรอปทานํ

[1]

‘‘ปทุมุตฺตโร นาม ชิโน, สพฺพธมฺมาน ปารคู;

ภวาภเว วิภาเวนฺโต, ตาเรสิ ชนตํ พหุํฯ

[2]

‘‘หํสราชา ตทา โหมิ, ทิชานํ ปวโร อหํ;

ชาตสฺสรํ สโมคยฺห, กีฬามิ หํสกีฬิตํฯ

[3]

‘‘ปทุมุตฺตโร โลกวิทู, อาหุตีนํ ปฏิคฺคโห;

ชาตสฺสรสฺส อุปริ, อาคจฺฉิ ตาวเท ชิโนฯ

[4]

‘‘ทิสฺวานหํ เทวเทวํ, สยมฺภุํ โลกนายกํ;

วณฺเฏ เฉตฺวาน ปทุมํ, สตปตฺตํ มโนรมํฯ

[5]

‘‘มุขตุณฺเฑน ปคฺคยฺห, ปสนฺโน โลกนายเก [วิปฺปสนฺเนน เจตสา (สฺยา.)];

อุกฺขิปิตฺวาน คคเณ [อุกฺขิปิตฺวา นลาเฏน (ก.)], พุทฺธเสฏฺฐํ อปูชยิํฯ

[6]

‘‘ปทุมุตฺตโร โลกวิทู, อาหุตีนํ ปฏิคฺคโห;

อนฺตลิกฺเข ฐิโต สตฺถา, อกา เม อนุโมทนํฯ

[7]

‘‘‘อิมินา เอกปทุเมน, เจตนาปณิธีหิ จ;

กปฺปานํ สตสหสฺสํ, วินิปาตํ น คจฺฉสิ’ฯ

[8]

‘‘อิทํ วตฺวาน สมฺพุทฺโธ, ชลชุตฺตมนามโก;

มม กมฺมํ ปกิตฺเตตฺวา, อคมา เยน ปตฺถิตํฯ

[9]

‘‘สตสหสฺสิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, พุทฺธปูชายิทํ ผลํฯ

[10]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกปทุมิโย เถโร อิมา คาถาโย อภาสิตฺถาติฯ

เอกปทุมิยตฺเถรสฺสาปทานํ ปฐมํฯ

2. ตีณุปฺปลมาลิยตฺเถรอปทานํ

[11]

‘‘จนฺทภาคานทีตีเร , อโหสิํ วานโร ตทา;

อทฺทสํ วิรชํ พุทฺธํ, นิสินฺนํ ปพฺพตนฺตเรฯ

[12]

‘‘โอภาเสนฺตํ ทิสา สพฺพา, สาลราชํว ผุลฺลิตํ;

ลกฺขณพฺยญฺชนูเปตํ, ทิสฺวา อตฺตมโน อหุํฯ

[13]

‘‘อุทคฺคจิตฺโต สุมโน, ปีติยา หฏฺฐมานโส;

ตีณิ อุปฺปลปุปฺผานิ, มตฺถเก อภิโรปยิํฯ

[14]

‘‘ปุปฺผานิ อภิโรเปตฺวา, วิปสฺสิสฺส มเหสิโน;

สคารโว ภวิตฺวาน [คมิตฺวาน (สี.), นมิตฺวาน (ก.)], ปกฺกามิํ อุตฺตรามุโขฯ

[15]

‘‘คจฺฉนฺโต ปฏิกุฏิโก, วิปฺปสนฺเนน เจตสา;

เสลนฺตเร ปติตฺวาน [ปปติตฺวา (สฺยา. ก.)], ปาปุณิํ ชีวิตกฺขยํฯ

[16]

‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ [ปุริมํ ชาติํ (?) อุปริ 38 วคฺเค ตติยาปทาเน เอวเมว ทิสฺสติ], ตาวติํสมคจฺฉหํฯ

[17]

‘‘สตานํ ตีณิกฺขตฺตุญฺจ, เทวรชฺชํ อการยิํ;

สตานํ ปญฺจกฺขตฺตุญฺจ, จกฺกวตฺตี อโหสหํฯ

[18]

‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[19]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ตีณุปฺปลมาลิโย [ติอุปฺปลมาลิโย (สี.)] เถโร อิมา คาถาโย อภาสิตฺถาติฯ

ตีณุปฺปลมาลิยตฺเถรสฺสาปทานํ ทุติยํฯ

3. ธชทายกตฺเถรอปทานํ

[20]

‘‘ติสฺโส นาม อหุ สตฺถา, โลกเชฏฺโฐ นราสโภ;

ตโยปธิกฺขเย [ตสฺโสปธิกฺขเย (สี.)] ทิสฺวา, ธชํ อาโรปิตํ มยาฯ

[21]