เมนู

‘‘ตตฺถ เม สุกตํ พฺยมฺหํ, สตปตฺตนฺติ วุจฺจติ;

สฏฺฐิโยชนมุพฺพิทฺธํ, ติํสโยชนวิตฺถตํฯ

[137]

‘‘สหสฺสกฺขตฺตุํ เทวินฺโท, เทวรชฺชมการยิํ;

ปญฺจสตฺตติกฺขตฺตุญฺจ, จกฺกวตฺตี อโหสหํฯ

[138]

‘‘ปเทสรชฺชํ วิปุลํ, คณนาโต อสงฺขิยํ;

อนุโภมิ สกํ กมฺมํ, ปุพฺเพ สุกตมตฺตโนฯ

[139]

‘‘เตเนเวกปทุเมน, อนุโภตฺวาน สมฺปทา;

โคตมสฺส ภควโต, ธมฺมํ สจฺฉิกริํ อหํฯ

[140]

‘‘กิเลสา ฌาปิตา มยฺหํ, ภวา สพฺเพ สมูหตา;

นาโคว พนฺธนํ เฉตฺวา, วิหรามิ อนาสโวฯ

[141]

‘‘สตสหสฺสิโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, เอกปทุมสฺสิทํ ผลํฯ

[142]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อุกฺขิตฺตปทุมิโย เถโร อิมา คาถาโย อภาสิตฺถาติฯ

อุกฺขิตฺตปทุมิยตฺเถรสฺสาปทานํ ทสมํฯ

คนฺโธทกวคฺโค จตุติํสติโมฯ

ตสฺสุทฺทานํ –

คนฺธธูโป อุทกญฺจ, ปุนฺนาค เอกทุสฺสกา;

ผุสิโต จ ปภงฺกโร, กุฏิโท อุตฺตรียโกฯ

สวนี เอกปทุมี, คาถาโย สพฺพปิณฺฑิตา;

เอกํ คาถาสตญฺเจว, จตุตาลีสเมว จฯ

35. เอกปทุมิยวคฺโค

1. เอกปทุมิยตฺเถรอปทานํ

[1]

‘‘ปทุมุตฺตโร นาม ชิโน, สพฺพธมฺมาน ปารคู;

ภวาภเว วิภาเวนฺโต, ตาเรสิ ชนตํ พหุํฯ

[2]

‘‘หํสราชา ตทา โหมิ, ทิชานํ ปวโร อหํ;

ชาตสฺสรํ สโมคยฺห, กีฬามิ หํสกีฬิตํฯ

[3]

‘‘ปทุมุตฺตโร โลกวิทู, อาหุตีนํ ปฏิคฺคโห;

ชาตสฺสรสฺส อุปริ, อาคจฺฉิ ตาวเท ชิโนฯ

[4]

‘‘ทิสฺวานหํ เทวเทวํ, สยมฺภุํ โลกนายกํ;

วณฺเฏ เฉตฺวาน ปทุมํ, สตปตฺตํ มโนรมํฯ

[5]

‘‘มุขตุณฺเฑน ปคฺคยฺห, ปสนฺโน โลกนายเก [วิปฺปสนฺเนน เจตสา (สฺยา.)];

อุกฺขิปิตฺวาน คคเณ [อุกฺขิปิตฺวา นลาเฏน (ก.)], พุทฺธเสฏฺฐํ อปูชยิํฯ

[6]

‘‘ปทุมุตฺตโร โลกวิทู, อาหุตีนํ ปฏิคฺคโห;

อนฺตลิกฺเข ฐิโต สตฺถา, อกา เม อนุโมทนํฯ

[7]

‘‘‘อิมินา เอกปทุเมน, เจตนาปณิธีหิ จ;

กปฺปานํ สตสหสฺสํ, วินิปาตํ น คจฺฉสิ’ฯ

[8]

‘‘อิทํ วตฺวาน สมฺพุทฺโธ, ชลชุตฺตมนามโก;

มม กมฺมํ ปกิตฺเตตฺวา, อคมา เยน ปตฺถิตํฯ

[9]

‘‘สตสหสฺสิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, พุทฺธปูชายิทํ ผลํฯ

[10]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกปทุมิโย เถโร อิมา คาถาโย อภาสิตฺถาติฯ

เอกปทุมิยตฺเถรสฺสาปทานํ ปฐมํฯ