เมนู

‘‘ผุสิตา ปญฺจสหสฺสา, เยหิ ปูเชสหํ ชินํ;

อฑฺฒเตยฺยสหสฺเสหิ, เทวรชฺชํ อการยิํฯ

[44]

‘‘อฑฺฒเตยฺยสหสฺเสหิ, จกฺกวตฺตี อโหสหํ;

อวเสเสน กมฺเมน, อรหตฺตมปาปุณิํฯ

[45]

‘‘เทวราชา ยทา โหมิ [อโหสิํ (สฺยา. ก.)], มนุชาธิปตี ยทา [ตทา (สฺยา. ก.)];

ตเมว นามเธยฺยํ เม, ผุสิโต นาม โหมหํฯ

[46]

‘‘เทวภูตสฺส สนฺตสฺส, อถาปิ มานุสสฺส วา;

สมนฺตา พฺยามโต มยฺหํ, ผุสิตํว ปวสฺสติฯ

[47]

‘‘ภวา อุคฺฆาฏิตา มยฺหํ, กิเลสา ฌาปิตา มม;

สพฺพาสวปริกฺขีโณ, ผุสิตสฺส อิทํ ผลํฯ

[48]

‘‘จนฺทนสฺเสว เม กายา, ตถา คนฺโธ ปวายติ;

สรีรโต มม คนฺโธ, อฑฺฒโกเส ปวายติฯ

[49]

‘‘ทิพฺพคนฺธํ สมฺปวนฺตํ, ปุญฺญกมฺมสมงฺคินํ;

คนฺธํ ฆตฺวาน ชานนฺติ, ผุสิโต อาคโต อิธฯ

[50]

‘‘สาขาปลาสกฏฺฐานิ , ติณานิปิ จ สพฺพโส;

มม สงฺกปฺปมญฺญาย, คนฺโธ สมฺปชฺชเต ขเณฯ

[51]

‘‘สตสหสฺสิโต [สพฺพตฺถปิ เอวเมว ทิสฺสติ] กปฺเป, จนฺทนํ อภิปูชยิํ;

ทุคฺคติํ นาภิชานามิ, ผุสิตสฺส อิทํ ผลํฯ

[52]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ผุสิตกมฺปิโย เถโร อิมา คาถาโย อภาสิตฺถาติฯ

ผุสิตกมฺปิยตฺเถรสฺสาปทานํ ปญฺจมํฯ

6. ปภงฺกรตฺเถรอปทานํ

[53]

‘‘ปทุมุตฺตรภควโต, โลกเชฏฺฐสฺส ตาทิโน;

วิปิเน เจติยํ อาสิ, วาฬมิคสมากุเลฯ

[54]

‘‘น โกจิ วิสหิ คนฺตุํ, เจติยํ อภิวนฺทิตุํ;

ติณกฏฺฐลโตนทฺธํ, ปลุคฺคํ อาสิ เจติยํฯ

[55]

‘‘วนกมฺมิโก ตทา อาสิํ, ปิตุมาตุมเตนหํ [ปิตุเปตามเหนหํ (สี.), ปิตาเปตามเหนหํ (สฺยา.)];

อทฺทสํ วิปิเน ถูปํ, ลุคฺคํ ติณลตากุลํฯ

[56]

‘‘ทิสฺวานาหํ พุทฺธถูปํ, ครุจิตฺตํ อุปฏฺฐหิํ;

พุทฺธเสฏฺฐสฺส ถูโปยํ, ปลุคฺโค อจฺฉตี วเนฯ

[57]

‘‘นจฺฉนฺนํ นปฺปติรูปํ, ชานนฺตสฺส คุณาคุณํ;

พุทฺธถูปํ อโสเธตฺวา, อญฺญํ กมฺมํ ปโยชเยฯ

[58]

‘‘ติณกฏฺฐญฺจ วลฺลิญฺจ, โสธยิตฺวาน เจติเย;

วนฺทิตฺวา อฏฺฐ วารานิ [อฏฺฐ ฐานานิ (ก.)], ปฏิกุฏิโก อคจฺฉหํฯ

[59]

‘‘เตน กมฺเมน สุกเตน, เจตนาปณิธีหิ จ;

ชหิตฺวา มานุสํ เทหํ, ตาวติํสมคจฺฉหํฯ

[60]

‘‘ตตฺถ เม สุกตํ พฺยมฺหํ, โสวณฺณํ สปภสฺสรํ;

สฏฺฐิโยชนมุพฺพิทฺธํ, ติํสโยชนวิตฺถตํฯ

[61]

‘‘ติสตานิ จ วารานิ, เทวรชฺชมการยิํ;

ปญฺจวีสติกฺขตฺตุญฺจ, จกฺกวตฺตี อโหสหํฯ

[62]

‘‘ภวาภเว สํสรนฺโต, มหาโภคํ ลภามหํ;

โภเค เม อูนตา นตฺถิ, โสธนาย อิทํ ผลํฯ

[63]

‘‘สิวิกา หตฺถิขนฺเธน, วิปิเน คจฺฉโต มม;

ยํ ยํ ทิสาหํ คจฺฉามิ, สรณํ สมฺปเต [สิชฺฌเต (ก.)] วนํฯ

[64]

‘‘ขาณุํ วา กณฺฏกํ วาปิ, นาหํ ปสฺสามิ จกฺขุนา;

ปุญฺญกมฺเมน สํยุตฺโต, สยเมวาปนียเรฯ

[65]

‘‘กุฏฺฐํ คณฺโฑ กิลาโส จ, อปมาโร วิตจฺฉิกา;

ททฺทุ กจฺฉุ [กณฺฑุ (สฺยา.)] จ เม นตฺถิ, โสธนาย อิทํ ผลํฯ

[66]

‘‘อญฺญมฺปิ เม อจฺฉริยํ, พุทฺธถูปสฺส โสธเน [พุทฺธถูปมฺหิ โสธิเต (สฺยา.)];

นาภิชานามิ เม กาเย, ชาตํ ปิฬกพินฺทุกํฯ

[67]

‘‘อญฺญมฺปิ เม อจฺฉริยํ, พุทฺธถูปมฺหิ โสธิเต [สพฺพตฺถปิ เอวเมว ทิสฺสติ, ตถา อุปริปิ];

ทุเว ภเว สํสรามิ, เทวตฺเต อถ มานุเสฯ

[68]

‘‘อญฺญมฺปิ เม อจฺฉริยํ, พุทฺธถูปมฺหิ โสธิเต;

สุวณฺณวณฺโณ สพฺพตฺถ, สปฺปภาโส ภวามหํฯ

[69]

‘‘อญฺญมฺปิ เม อจฺฉริยํ, พุทฺธถูปมฺหิ โสธิเต;

อมนาปํ วิวชฺชติ, มนาปํ อุปติฏฺฐติฯ

[70]

‘‘อญฺญมฺปิ เม อจฺฉริยํ, พุทฺธถูปมฺหิ โสธิเต;

วิสุทฺธํ โหติ เม จิตฺตํ, เอกคฺคํ สุสมาหิตํฯ

[71]

‘‘อญฺญมฺปิ เม อจฺฉริยํ, พุทฺธถูปมฺหิ โสธิเต;

เอกาสเน นิสีทิตฺวา, อรหตฺตมปาปุณิํฯ

[72]

‘‘สตสหสฺสิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, โสธนาย อิทํ ผลํฯ

[73]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปภงฺกโร เถโร อิมา คาถาโย อภาสิตฺถาติฯ

ปภงฺกรตฺเถรสฺสาปทานํ ฉฏฺฐํฯ

7. ติณกุฏิทายกตฺเถรอปทานํ

[74]

‘‘นคเร พนฺธุมติยา, อโหสิํ ปรกมฺมิโก;

ปรกมฺมายเน ยุตฺโต, ปรภตฺตํ อปสฺสิโตฯ

[75]

‘‘รโหคโต นิสีทิตฺวา, เอวํ จินฺเตสหํ ตทา;

พุทฺโธ โลเก สมุปฺปนฺโน, อธิกาโร จ นตฺถิ เมฯ

[76]

‘‘กาโล เม คติํ [กาโล คติํ เม (สี. สฺยา.)] โสเธตุํ, ขโณ เม ปฏิปาทิโต;

ทุกฺโข นิรยสมฺผสฺโส, อปุญฺญานญฺหิ ปาณินํฯ

[77]

‘‘เอวาหํ จินฺตยิตฺวาน, กมฺมสามิํ อุปาคมิํ;

เอกาหํ กมฺมํ ยาจิตฺวา, วิปินํ ปาวิสิํ อหํฯ

[78]