‘‘อนุโมทิ มหาวีโร, สาริปุตฺโต มหากถี;

สุตฺวานุโมทนํ ตสฺส, ปุพฺพกมฺมมนุสฺสริํฯ

[99]

‘‘อญฺชลิํ ปคฺคเหตฺวาน, สกํ จิตฺตํ ปสาทยิํ;

สริตฺวา ปุริมํ กมฺมํ, อรหตฺตมปาปุณิํฯ

[100]

‘‘อุฏฺฐาย อาสนา ตมฺหา, สิเร กตฺวาน อญฺชลิํ;

สมฺพุทฺธํ อภิวาเทตฺวา, อิมํ วาจํ อุทีริยิํฯ

[101]

‘‘สตสหสฺสิโต กปฺเป, พุทฺโธ โลเก อนุตฺตโร;

ปทุมุตฺตโร โลกวิทู, อาหุตีนํ ปฏิคฺคโหฯ

[102]

‘‘ตสฺส ฉตฺตํ มยา ทินฺนํ, วิจิตฺตํ สมลงฺกตํ;

อุโภ หตฺเถหิ ปคฺคณฺหิ, สยมฺภู อคฺคปุคฺคโลฯ

[103]

‘‘อโห พุทฺโธ อโห ธมฺโม, อโห โน สตฺถุสมฺปทา;

เอกจฺฉตฺตสฺส ทาเนน, ทุคฺคติํ นุปปชฺชหํฯ

[104]

‘‘กิเลสา ฌาปิตา มยฺหํ, ภวา สพฺเพ สมูหตา;

สพฺพาสเว ปริญฺญาย, วิหรามิ อนาสโวฯ

[105]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สปริวารฉตฺตทายโก เถโร อิมา คาถาโย อภาสิตฺถาติฯ

สปริวารฉตฺตทายกตฺเถรสฺสาปทานํ ทสมํฯ

อุมาปุปฺผิยวคฺโค เตตฺติํสติโมฯ

ตสฺสุทฺทานํ –

อุมาปุปฺผญฺจ ปุลินํ, หาโส ยญฺโญ นิมิตฺตโก;

สํสาวโก นิคฺคุณฺฑี จ, สุมนํ ปุปฺผฉตฺตโก;

สปริวารฉตฺโต จ, คาถา สตฺตสตุตฺตราติฯ

34. คนฺโธทกวคฺโค

1. คนฺธธูปิยตฺเถรอปทานํ

[1]

‘‘สิทฺธตฺถสฺส ภควโต, คนฺธธูปํ อทาสหํ;

สุมเนหิ ปฏิจฺฉนฺนํ, พุทฺธานุจฺฉวิกญฺจ ตํฯ

[2]

‘‘กญฺจนคฺฆิยสงฺกาสํ, พุทฺธํ โลกคฺคนายกํ;

อินฺทีวรํว ชลิตํ, อาทิตฺตํว หุตาสนํฯ

[3]

‘‘พฺยคฺฆุสภํว ปวรํ, อภิชาตํว เกสริํ;

นิสินฺนํ สมณานคฺคํ, ภิกฺขุสงฺฆปุรกฺขตํฯ

[4]

‘‘ทิสฺวา จิตฺตํ ปสาเทตฺวา, ปคฺคเหตฺวาน อญฺชลิํ;

วนฺทิตฺวา สตฺถุโน ปาเท, ปกฺกามิํ อุตฺตรามุโขฯ

[5]

‘‘จตุนฺนวุติโต กปฺเป, ยํ คนฺธมททิํ ตทา;

ทุคฺคติํ นาภิชานามิ, คนฺธปูชายิทํ ผลํฯ

[6]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา คนฺธธูปิโย เถโร อิมา คาถาโย อภาสิตฺถาติฯ

คนฺธธูปิยตฺเถรสฺสาปทานํ ปฐมํฯ

2. อุทกปูชกตฺเถรอปทานํ

[7]

‘‘สุวณฺณวณฺณํ สมฺพุทฺธํ, คจฺฉนฺตํ อนิลญฺชเส;

ฆตาสนํว ชลิตํ, อาทิตฺตํว หุตาสนํฯ

[8]

‘‘ปาณินา อุทกํ คยฺห, อากาเส อุกฺขิปิํ อหํ;

สมฺปฏิจฺฉิ มหาวีโร, พุทฺโธ การุณิโก อิสิฯ

[9]

‘‘อนฺตลิกฺเข ฐิโต สตฺถา, ปทุมุตฺตรนามโก;

มม สงฺกปฺปมญฺญาย, อิมํ คาถมภาสถฯ

[10]

‘‘‘อิมินา ทกทาเนน, ปีติอุปฺปาทเนน จ;

กปฺปสตสหสฺสมฺปิ, ทุคฺคติํ นุปปชฺชสิ’ฯ

[11]