เมนู

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สทฺทสญฺญโก เถโร อิมา คาถาโย อภาสิตฺถาติฯ

สทฺทสญฺญกตฺเถรสฺสาปทานํ สตฺตมํฯ

8. ติรํสิยตฺเถรอปทานํ

[39]

‘‘เกสริํ อภิชาตํว, อคฺคิกฺขนฺธํว ปพฺพเต;

โอภาเสนฺตํ ทิสา สพฺพา [นิวาเสนฺตํ (ก.), ทิสาสินฺนํ (สฺยา.)], สิทฺธตฺถํ ปพฺพตนฺตเรฯ

[40]

‘‘สูริยสฺส จ อาโลกํ, จนฺทาโลกํ ตเถว จ;

พุทฺธาโลกญฺจ ทิสฺวาน, วิตฺติ เม อุทปชฺชถฯ

[41]

‘‘ตโย อาโลเก ทิสฺวาน, สมฺพุทฺธํ [พุทฺธญฺจ (สี.)] สาวกุตฺตมํ;

เอกํสํ อชินํ กตฺวา, สนฺถวิํ โลกนายกํฯ

[42]

‘‘ตโย หิ อาโลกกรา, โลเก โลกตโมนุทา;

จนฺโท จ สูริโย จาปิ, พุทฺโธ จ โลกนายโกฯ

[43]

‘‘โอปมฺมํ อุปทสฺเสตฺวา, กิตฺติโต เม มหามุนิ;

พุทฺธสฺส วณฺณํ กิตฺเตตฺวา, กปฺปํ สคฺคมฺหิ โมทหํฯ

[44]

‘‘จตุนฺนวุติโต กปฺเป, ยํ พุทฺธมภิกิตฺตยิํ;

ทุคฺคติํ นาภิชานามิ, กิตฺตนาย อิทํ ผลํฯ

[45]

‘‘เอกสฏฺฐิมฺหิโต กปฺเป, เอโก ญาณธโร อหุ;

สตฺตรตนสมฺปนฺโน, จกฺกวตฺตี มหพฺพโลฯ

[46]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติรํสิโย เถโร อิมา คาถาโย อภาสิตฺถาติฯ

ติรํสิยตฺเถรสฺสาปทานํ อฏฺฐมํฯ

9. กนฺทลิปุปฺผิยตฺเถรอปทานํ

[47]

‘‘สินฺธุยา นทิยา ตีเร, อโหสิํ กสฺสโก ตทา;

ปรกมฺมายเน ยุตฺโต, ปรภตฺตํ อปสฺสิโตฯ

[48]

‘‘สินฺธุํ อนุจรนฺโตหํ, สิทฺธตฺถํ ชินมทฺทสํ;

สมาธินา นิสินฺนํว, สตปตฺตํว ปุปฺผิตํฯ

[49]

‘‘สตฺต กนฺทลิปุปฺผานิ, วณฺเฏ เฉตฺวานหํ ตทา;

มตฺถเก อภิโรเปสิํ, พุทฺธสฺสาทิจฺจพนฺธุโนฯ

[50]

‘‘สุวณฺณวณฺณํ สมฺพุทฺธํ, อนุกูเล สมาหิตํ;

ติธาปภินฺนมาตงฺคํ, กุญฺชรํว ทุราสทํฯ

[51]

‘‘ตมหํ อุปคนฺตฺวาน, นิปกํ ภาวิตินฺทฺริยํ;

อญฺชลิํ ปคฺคเหตฺวาน, อวนฺทิํ สตฺถุโน อหํฯ

[52]

‘‘จตุนฺนวุติโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[53]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา กนฺทลิปุปฺผิโย เถโร อิมา คาถาโย อภาสิตฺถาติฯ

กนฺทลิปุปฺผิยตฺเถรสฺสาปทานํ นวมํฯ

10. กุมุทมาลิยตฺเถรอปทานํ

[54]

‘‘อุสภํ ปวรํ วีรํ, มเหสิํ วิชิตาวินํ;

วิปสฺสินํ มหาวีรํ, อภิชาตํว เกสริํฯ

[55]

‘‘รถิยํ ปฏิปชฺชนฺตํ, อาหุตีนํ ปฏิคฺคหํ;

คเหตฺวา กุมุทํ มาลํ, พุทฺธเสฏฺฐํ สโมกิริํฯ

[56]

‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[57]