‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา พุทฺธสญฺญโก เถโร อิมา คาถาโย อภาสิตฺถาติฯ
พุทฺธสญฺญกตฺเถรสฺสาปทานํ นวมํฯ
10. ปพฺภารทายกตฺเถรอปทานํ
[47]
‘‘ปิยทสฺสิโน ภควโต, ปพฺภาโร โสธิโต มยา;
ฆฏกญฺจ อุปฏฺฐาสิํ, ปริโภคาย ตาทิโนฯ
[48]
‘‘ตํ เม พุทฺโธ วิยากาสิ, ปิยทสฺสี มหามุนิ;
สหสฺสกณฺโฑ สตเภณฺฑุ [สตเคณฺฑุ (สฺยา. ก.)], ธชาลุ หริตามโยฯ
[49]
‘‘นิพฺพตฺติสฺสติ โส ยูโป, รตนญฺจ อนปฺปกํ;
ปพฺภารทานํ ทตฺวาน, กปฺปํ สคฺคมฺหิ โมทหํฯ
[50]
‘‘อิโต พาตฺติํสกปฺปมฺหิ, สุสุทฺโธ นาม ขตฺติโย;
สตฺตรตนสมฺปนฺโน, จกฺกวตฺตี มหพฺพโลฯ
[51]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปพฺภารทายโก เถโร อิมา คาถาโย อภาสิตฺถาติฯ
ปพฺภารทายกตฺเถรสฺสาปทานํ ทสมํฯ
ปทุมเกสรวคฺโค เอกติํสติโมฯ
ตสฺสุทฺทานํ –
เกสรํ คนฺธมนฺนญฺจ, ธมฺมสญฺญี ผเลน จ;
ปสาทารามทายี จ, เลปโก พุทฺธสญฺญโก;
ปพฺภารโท จ คาถาโย, เอกปญฺญาส กิตฺติตาฯ
32. อารกฺขทายกวคฺโค
1. อารกฺขทายกตฺเถรอปทานํ
[1]
‘‘ธมฺมทสฺสิสฺส มุนิโน, วติ การาปิตา มยา;
อารกฺโข จ มยา ทินฺโน, ทฺวิปทินฺทสฺส ตาทิโนฯ
[2]
‘‘อฏฺฐารเส กปฺปสเต, ยํ กมฺมมกริํ ตทา;
เตน กมฺมวิเสเสน, ปตฺโต เม อาสวกฺขโยฯ
[3]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา อารกฺขทายโก เถโร อิมา คาถาโย อภาสิตฺถาติฯ
อารกฺขทายกตฺเถรสฺสาปทานํ ปฐมํฯ
2. โภชนทายกตฺเถรอปทานํ
[4]
‘‘สุชาโต สาลลฏฺฐีว, โสภญฺชนมิวุคฺคโต;
อินฺทลฏฺฐิริวากาเส, วิโรจติ สทา ชิโนฯ
[5]
‘‘ตสฺส เทวาติเทวสฺส, เวสฺสภุสฺส มเหสิโน;
อทาสิ โภชนมหํ, วิปฺปสนฺเนน เจตสาฯ
[6]
‘‘ตํ เม พุทฺโธ อนุโมทิ, สยมฺภู อปราชิโต;
ภเว นิพฺพตฺตมานมฺหิ, ผลํ นิพฺพตฺตตู ตวฯ
[7]
‘‘เอกตฺติํเส อิโต กปฺเป, ยํ ทานมททิํ ตทา;
ทุคฺคติํ นาภิชานามิ, โภชนสฺส อิทํ ผลํฯ
[8]
‘‘ปญฺจวีเส อิโต กปฺเป, เอโก อาสิํ อมิตฺตโก;
สตฺตรตนสมฺปนฺโน, จกฺกวตฺตี มหพฺพโลฯ
[9]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โภชนทายโก เถโร อิมา คาถาโย อภาสิตฺถาติฯ
โภชนทายกตฺเถรสฺสาปทานํ ทุติยํฯ