‘‘อิทํ วตฺวาน สพฺพญฺญู, โลกเชฏฺโฐ นราสโภ;

มเมว อนุสาสิตฺวา, เวหาสํ นภมุคฺคมิฯ

[28]

‘‘อจิรํ คตมตฺตมฺหิ, สพฺพญฺญุมฺหิ นราสเภ;

มรณํ สมนุปฺปตฺโต, ตุสิตํ อุปปชฺชหํฯ

[29]

‘‘ตทาหํ วิรเช เขตฺเต, อนนฺตผลทายเก;

สงฺเฆ จิตฺตํ ปสาเทตฺวา, กปฺปํ สคฺคมฺหิ โมทหํฯ

[30]

‘‘จตุนฺนวุติโต กปฺเป, ปสาทมลภิํ ตทา;

ทุคฺคติํ นาภิชานามิ, ปสาทสฺส อิทํ ผลํฯ

[31]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สมฺปสาทโก เถโร อิมา คาถาโย อภาสิตฺถาติฯ

สมฺปสาทกตฺเถรสฺสาปทานํ ฉฏฺฐํฯ

7. อารามทายกตฺเถรอปทานํ

[32]

‘‘สิทฺธตฺถสฺส ภควโต, อาราโม โรปิโต มยา;

สนฺทจฺฉาเยสุ [สีตฉาเยสุ (สฺยา.), สนฺตจฺฉาเยสุ (ก.)] รุกฺเขสุ, อุปาสนฺเตสุ ปกฺขิสุฯ

[33]

‘‘อทฺทสํ วิรชํ พุทฺธํ, อาหุตีนํ ปฏิคฺคหํ;

อารามํ อภินาเมสิํ, โลกเชฏฺฐํ นราสภํฯ

[34]

‘‘หฏฺโฐ หฏฺเฐน จิตฺเตน, ผลํ ปุปฺผมทาสหํ;

ตโต ชาตปฺปสาโทว, ตํ วนํ ปริณามยิํฯ

[35]

‘‘พุทฺธสฺส ยมิทํ ทาสิํ, วิปฺปสนฺเนน เจตสา;

ภเว นิพฺพตฺตมานมฺหิ, นิพฺพตฺตติ ผลํ มมฯ

[36]

‘‘จตุนฺนวุติโต กปฺเป, ยํ อารามมทํ ตทา;

ทุคฺคติํ นาภิชานามิ, อารามสฺส อิทํ ผลํฯ

[37]

‘‘สตฺตติํเส อิโต กปฺเป, สตฺตาสุํ มุทุสีตลา;

สตฺตรตนสมฺปนฺนา, จกฺกวตฺตี มหพฺพลาฯ

[38]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อารามทายโก เถโร อิมา คาถาโย อภาสิตฺถาติฯ

อารามทายกตฺเถรสฺสาปทานํ สตฺตมํฯ

8. อนุเลปทายกตฺเถรอปทานํ

[39]

‘‘อตฺถทสฺสิสฺส มุนิโน, อทฺทสํ สาวกํ อหํ;

นวกมฺมํ กโรนฺตสฺส, สีมาย อุปคจฺฉหํฯ

[40]

‘‘นิฏฺฐิเต นวกมฺเม จ, อนุเลปมทาสหํ;

ปสนฺนจิตฺโต สุมโน, ปุญฺญกฺเขตฺเต อนุตฺตเรฯ

[41]

‘‘อฏฺฐารเส กปฺปสเต, ยํ กมฺมมกริํ ตทา;

ทุคฺคติํ นาภิชานามิ, อนุเลปสฺสิทํ ผลํฯ

[42]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อนุเลปทายโก เถโร อิมา คาถาโย อภาสิตฺถาติฯ

อนุเลปทายกตฺเถรสฺสาปทานํ อฏฺฐมํฯ

9. พุทฺธสญฺญกตฺเถรอปทานํ

[43]

‘‘อุเทนฺตํ สตรํสิํว, ปีตรํสิํว ภาณุมํ;

วนนฺตรคตํ สนฺตํ, โลกเชฏฺฐํ นราสภํฯ

[44]

‘‘อทฺทสํ สุปินนฺเตน, สิทฺธตฺถํ โลกนายกํ;

ตตฺถ จิตฺตํ ปสาเทตฺวา, สุคติํ อุปปชฺชหํฯ

[45]

‘‘จตุนฺนวุติโต กปฺเป, ยํ สญฺญมลภิํ ตทา;

ทุคฺคติํ นาภิชานามิ, พุทฺธสญฺญายิทํ ผลํฯ

[46]