เมนู

3. ปรมนฺนทายกตฺเถรอปทานํ

[9]

‘‘กณิการํว โชตนฺตํ, อุทยนฺตํว ภาณุมํ;

วิปสฺสิํ อทฺทสํ พุทฺธํ, โลกเชฏฺฐํ นราสภํฯ

[10]

‘‘อญฺชลิํ ปคฺคเหตฺวาน, อภิเนสิํ สกํ ฆรํ;

อภิเนตฺวาน สมฺพุทฺธํ, ปรมนฺนมทาสหํฯ

[11]

‘‘เอกนวุติโต กปฺเป, ปรมนฺนมทิํ [ปรมนฺนํ ททิํ (สี.), ปรมนฺนมทํ (สฺยา.)] ตทา;

ทุคฺคติํ นาภิชานามิ, ปรมนฺนสฺสิทํ ผลํฯ

[12]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปรมนฺนทายโก เถโร อิมา คาถาโย อภาสิตฺถาติฯ

ปรมนฺนทายกตฺเถรสฺสาปทานํ ตติยํฯ

4. ธมฺมสญฺญกตฺเถรอปทานํ

[13]

‘‘วิปสฺสิโน ภควโต, มหาโพธิมโห อหุ;

รุกฺขฏฺฐสฺเสว สมฺพุทฺโธ, [รุกฺขฏฺเฐเยว สมฺพุทฺเธ (สี.), รุกฺขฏฺโฐ อิว สมฺพุทฺโธ (อฏฺฐ.) เอตฺถ รุกฺขฏฺฐสฺเสว โพธิมหการชนสฺส สมฺพุทฺโธ จตุสจฺจํ ปกาเสตีติ อตฺโถปิ สกฺกา ญาตุํ] โลกเชฏฺโฐ นราสโภ [โลกเชฏฺเฐ นราสเภ (สี.)]

[14]

‘‘ภควา ตมฺหิ สมเย, ภิกฺขุสงฺฆปุรกฺขโต;

จตุสจฺจํ ปกาเสติ, วาจาสภิมุทีรยํฯ

[15]

‘‘สงฺขิตฺเตน จ เทเสนฺโต, วิตฺถาเรน จ เทสยํ [เทสยิ (สฺยา.), ภาสติ (ก.)];

วิวฏฺฏจฺฉโท สมฺพุทฺโธ, นิพฺพาเปสิ มหาชนํฯ

[16]

‘‘ตสฺสาหํ ธมฺมํ สุตฺวาน, โลกเชฏฺฐสฺส ตาทิโน;

วนฺทิตฺวา สตฺถุโน ปาเท, ปกฺกามิํ อุตฺตรามุโขฯ

[17]

‘‘เอกนวุติโต กปฺเป, ยํ ธมฺมมสุณิํ ตทา;

ทุคฺคติํ นาภิชานามิ, ธมฺมสวสฺสิทํ ผลํฯ

[18]

‘‘เตตฺติํสมฺหิ อิโต กปฺเป, เอโก อาสิํ มหีปติ;

สุตวา นาม นาเมน, จกฺกวตฺตี มหพฺพโลฯ

[19]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ธมฺมสญฺญโก เถโร อิมา คาถาโย อภาสิตฺถาติฯ

ธมฺมสญฺญกตฺเถรสฺสาปทานํ จตุตฺถํฯ

5. ผลทายกตฺเถรอปทานํ

[20]

‘‘ภาคีรถีนทีตีเร , อโหสิ อสฺสโม ตทา;

ตมหํ อสฺสมํ คจฺฉิํ, ผลหตฺโถ อเปกฺขวาฯ

[21]

‘‘วิปสฺสิํ ตตฺถ อทฺทกฺขิํ, ปีตรํสิํว ภาณุมํ;

ยํ เม อตฺถิ ผลํ สพฺพํ, อทาสิํ สตฺถุโน อหํฯ

[22]

‘‘เอกนวุติโต กปฺเป, ยํ ผลํ อททิํ ตทา;

ทุคฺคติํ นาภิชานามิ, ผลทานสฺสิทํ ผลํฯ

[23]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ผลทายโก เถโร อิมา คาถาโย อภาสิตฺถาติฯ

ผลทายกตฺเถรสฺสาปทานํ ปญฺจมํฯ

6. สมฺปสาทกตฺเถรอปทานํ

[24]

‘‘‘นโม เต พุทฺธ วีรตฺถุ, วิปฺปมุตฺโตสิ สพฺพธิ;

พฺยสนมฺหิ [พฺยสนํ หิ (สี.)] อนุปฺปตฺโต, ตสฺส เม สรณํ ภว’ฯ

[25]

‘‘สิทฺธตฺโถ ตสฺส พฺยากาสิ, โลเก อปฺปฏิปุคฺคโล;

‘มโหทธิสโม สงฺโฆ, อปฺปเมยฺโย อนุตฺตโรฯ

[26]

‘‘‘ตตฺถ ตฺวํ วิรเช เขตฺเต, อนนฺตผลทายเก;

สงฺเฆ จิตฺตํ ปสาเทตฺวา, สุพีชํ วาป [จาปิ (สี.), วาปิ (สฺยา.)] โรปยฯ

[27]