1. ปทุมเกสริยตฺเถรอปทานํ
[1]
‘‘อิสิสงฺเฆ อหํ ปุพฺเพ, อาสิํ มาตงฺควารโณ;
มเหสีนํ ปสาเทน, ปทฺมเกสรโมกิริํฯ
[2]
‘‘ปจฺเจกชินเสฏฺเฐสุ, ธุตราเคสุ ตาทิสุ;
เตสุ จิตฺตํ ปสาเทตฺวา, กปฺปํ สคฺคมฺหิ โมทหํฯ
[3]
‘‘เอกนวุติโต กปฺเป, เกสรํ โอกิริํ ตทา;
ทุคฺคติํ นาภิชานามิ, พุทฺธปูชายิทํ ผลํฯ
[4]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา ปทุมเกสริโย เถโร อิมา คาถาโย อภาสิตฺถาติฯ
ปทุมเกสริยตฺเถรสฺสาปทานํ ปฐมํฯ
2. สพฺพคนฺธิยตฺเถรอปทานํ
[5]
‘‘คนฺธมาลํ มยา ทินฺนํ, วิปสฺสิสฺส มเหสิโน;
อทาสิํ อุชุภูตสฺส, โกเสยฺยวตฺถมุตฺตมํฯ
[6]
‘‘เอกนวุติโต กปฺเป, ยํ วตฺถมททิํ [คนฺธมททิํ (สฺยา.)] ปุเร;
ทุคฺคติํ นาภิชานามิ, คนฺธทานสฺสิทํ ผลํฯ
[7]
‘‘อิโต ปนฺนรเส กปฺเป, สุเจโฬ นาม ขตฺติโย;
สตฺตรตนสมฺปนฺโน, จกฺกวตฺตี มหพฺพโลฯ
[8]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สพฺพคนฺธิโย เถโร อิมา คาถาโย อภาสิตฺถาติฯ
สพฺพคนฺธิยตฺเถรสฺสาปทานํ ทุติยํฯ
3. ปรมนฺนทายกตฺเถรอปทานํ
[9]
‘‘กณิการํว โชตนฺตํ, อุทยนฺตํว ภาณุมํ;
วิปสฺสิํ อทฺทสํ พุทฺธํ, โลกเชฏฺฐํ นราสภํฯ
[10]
‘‘อญฺชลิํ ปคฺคเหตฺวาน, อภิเนสิํ สกํ ฆรํ;
อภิเนตฺวาน สมฺพุทฺธํ, ปรมนฺนมทาสหํฯ
[11]
‘‘เอกนวุติโต กปฺเป, ปรมนฺนมทิํ [ปรมนฺนํ ททิํ (สี.), ปรมนฺนมทํ (สฺยา.)] ตทา;
ทุคฺคติํ นาภิชานามิ, ปรมนฺนสฺสิทํ ผลํฯ
[12]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปรมนฺนทายโก เถโร อิมา คาถาโย อภาสิตฺถาติฯ
ปรมนฺนทายกตฺเถรสฺสาปทานํ ตติยํฯ
4. ธมฺมสญฺญกตฺเถรอปทานํ
[13]
‘‘วิปสฺสิโน ภควโต, มหาโพธิมโห อหุ;
รุกฺขฏฺฐสฺเสว สมฺพุทฺโธ, [รุกฺขฏฺเฐเยว สมฺพุทฺเธ (สี.), รุกฺขฏฺโฐ อิว สมฺพุทฺโธ (อฏฺฐ.) เอตฺถ รุกฺขฏฺฐสฺเสว โพธิมหการชนสฺส สมฺพุทฺโธ จตุสจฺจํ ปกาเสตีติ อตฺโถปิ สกฺกา ญาตุํ] โลกเชฏฺโฐ นราสโภ [โลกเชฏฺเฐ นราสเภ (สี.)]ฯ
[14]
‘‘ภควา ตมฺหิ สมเย, ภิกฺขุสงฺฆปุรกฺขโต;
จตุสจฺจํ ปกาเสติ, วาจาสภิมุทีรยํฯ
[15]
‘‘สงฺขิตฺเตน จ เทเสนฺโต, วิตฺถาเรน จ เทสยํ [เทสยิ (สฺยา.), ภาสติ (ก.)];
วิวฏฺฏจฺฉโท สมฺพุทฺโธ, นิพฺพาเปสิ มหาชนํฯ
[16]
‘‘ตสฺสาหํ ธมฺมํ สุตฺวาน, โลกเชฏฺฐสฺส ตาทิโน;
วนฺทิตฺวา สตฺถุโน ปาเท, ปกฺกามิํ อุตฺตรามุโขฯ
[17]
‘‘เอกนวุติโต กปฺเป, ยํ ธมฺมมสุณิํ ตทา;
ทุคฺคติํ นาภิชานามิ, ธมฺมสวสฺสิทํ ผลํฯ
[18]