เมนู

‘‘ปสนฺนจิตฺโต สุมโน, อภิวาเทสหํ ตทา;

อนุสํสาวยิํ พุทฺธํ, อุตฺตมตฺถสฺส ปตฺติยาฯ

[45]

‘‘เอกนวุติโต กปฺเป, อนุสํสาวยิํ อหํ;

ทุคฺคติํ นาภิชานามิ, อนุสํสาวนา ผลํฯ

[46]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อนุสํสาวโก เถโร อิมา คาถาโย อภาสิตฺถาติฯ

อนุสํสาวกตฺเถรสฺสาปทานํ ทสมํฯ

จิตกปูชกวคฺโค ติํสติโมฯ

ตสฺสุทฺทานํ –

จิตกํ ปาริฉตฺโต จ, สทฺทโคสีสสนฺถรํ;

ปาโท ปเทสํ สรณํ, อมฺโพ สํสาวโกปิ จ;

อฏฺฐตาลีส คาถาโย, คณิตาโย วิภาวิภิฯ

อถ วคฺคุทฺทานํ –

กณิกาโร หตฺถิทโท, อาลมฺพณุทกาสนํ;

ตุวรํ โถมโก เจว, อุกฺเขปํ สีสุปธานํฯ

ปณฺณโท จิตปูชี จ, คาถาโย เจว สพฺพโส;

จตฺตาริ จ สตานีห, เอกปญฺญาสเมว จฯ

ปญฺจวีสสตา สพฺพา, ทฺวาสตฺตติ ตทุตฺตริ;

ติสตํ อปทานานํ, คณิตา อตฺถทสฺสิภิฯ

กณิการวคฺคทสกํฯ

ตติยสตกํ สมตฺตํฯ

31. ปทุมเกสรวคฺโค

1. ปทุมเกสริยตฺเถรอปทานํ

[1]

‘‘อิสิสงฺเฆ อหํ ปุพฺเพ, อาสิํ มาตงฺควารโณ;

มเหสีนํ ปสาเทน, ปทฺมเกสรโมกิริํฯ

[2]

‘‘ปจฺเจกชินเสฏฺเฐสุ, ธุตราเคสุ ตาทิสุ;

เตสุ จิตฺตํ ปสาเทตฺวา, กปฺปํ สคฺคมฺหิ โมทหํฯ

[3]

‘‘เอกนวุติโต กปฺเป, เกสรํ โอกิริํ ตทา;

ทุคฺคติํ นาภิชานามิ, พุทฺธปูชายิทํ ผลํฯ

[4]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา ปทุมเกสริโย เถโร อิมา คาถาโย อภาสิตฺถาติฯ

ปทุมเกสริยตฺเถรสฺสาปทานํ ปฐมํฯ

2. สพฺพคนฺธิยตฺเถรอปทานํ

[5]

‘‘คนฺธมาลํ มยา ทินฺนํ, วิปสฺสิสฺส มเหสิโน;

อทาสิํ อุชุภูตสฺส, โกเสยฺยวตฺถมุตฺตมํฯ

[6]

‘‘เอกนวุติโต กปฺเป, ยํ วตฺถมททิํ [คนฺธมททิํ (สฺยา.)] ปุเร;

ทุคฺคติํ นาภิชานามิ, คนฺธทานสฺสิทํ ผลํฯ

[7]

‘‘อิโต ปนฺนรเส กปฺเป, สุเจโฬ นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[8]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สพฺพคนฺธิโย เถโร อิมา คาถาโย อภาสิตฺถาติฯ

สพฺพคนฺธิยตฺเถรสฺสาปทานํ ทุติยํฯ