เมนู

6. ปาทปูชกตฺเถรอปทานํ

[27]

‘‘ปพฺพเต หิมวนฺตมฺหิ, อโหสิํ กินฺนโร ตทา;

อทฺทสํ วิรชํ พุทฺธํ, ปีตรํสิํว ภาณุมํฯ

[28]

‘‘อุเปตํ ตมหํ [อุเปโตปิ ตทา (สฺยา.), อุเปสิํ ตมหํ (?)] พุทฺธํ, วิปสฺสิํ โลกนายกํ;

จนฺทนํ ตครญฺจาปิ, ปาเท โอสิญฺจหํ ตทาฯ

[29]

‘‘เอกนวุติโต กปฺเป, ยํ ปาทํ อภิปูชยิํ;

ทุคฺคติํ นาภิชานามิ, ปาทปูชายิทํ ผลํฯ

[30]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปาทปูชโก เถโร อิมา คาถาโย อภาสิตฺถาติฯ

ปาทปูชกตฺเถรสฺสาปทานํ ฉฏฺฐํฯ

7. เทสกิตฺตกตฺเถรอปทานํ

[31]

‘‘อุปสาลกนาโมหํ , อโหสิํ พฺราหฺมโณ ตทา;

กานนํ วนโมคาฬฺหํ, โลกเชฏฺฐํ นราสภํฯ

[32]

‘‘ทิสฺวาน วนฺทิํ ปาเทสุ, โลกาหุติปฏิคฺคหํ;

ปสนฺนจิตฺตํ มํ ญตฺวา, พุทฺโธ อนฺตรธายถฯ

[33]

‘‘กานนา อภินิกฺขมฺม, พุทฺธเสฏฺฐมนุสฺสริํ;

ตํ เทสํ กิตฺตยิตฺวาน, กปฺปํ สคฺคมฺหิ โมทหํฯ

[34]

‘‘ทฺเวนวุเต อิโต กปฺเป, ยํ เทสมภิกิตฺตยิํ;

ทุคฺคติํ นาภิชานามิ, กิตฺตนาย อิทํ ผลํฯ

[35]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เทสกิตฺตโก เถโร อิมา คาถาโย อภาสิตฺถาติฯ

เทสกิตฺตกตฺเถรสฺสาปทานํ สตฺตมํฯ

8. สรณคมนิยตฺเถรอปทานํ

[36]

‘‘ปพฺพเต หิมวนฺตมฺหิ, อโหสิํ ลุทฺทโก ตทา;

วิปสฺสิํ อทฺทสํ พุทฺธํ, โลกเชฏฺฐํ นราสภํฯ

[37]

‘‘อุปาสิตฺวาน สมฺพุทฺธํ, เวยฺยาวจฺจมกาสหํ;

สรณญฺจ อุปาคจฺฉิํ, ทฺวิปทินฺทสฺส ตาทิโนฯ

[38]

‘‘เอกนวุติโต กปฺเป, สรณํ อุปคจฺฉหํ;

ทุคฺคติํ นาภิชานามิ, สรณาคมนปฺผลํฯ

[39]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สรณคมนิโย เถโร อิมา คาถาโย อภาสิตฺถาติฯ

สรณคมนิยตฺเถรสฺสาปทานํ อฏฺฐมํฯ

9. อมฺพปิณฺฑิยตฺเถรอปทานํ

[40]

‘‘โรมโส นาม นาเมน, ทานโว อิติ วิสฺสุโต;

อมฺพปิณฺฑี มยา ทินฺนา [อมฺพปิณฺโฑ มยา ทินฺโน (สฺยา.)], วิปสฺสิสฺส มเหสิโนฯ

[41]

‘‘เอกนวุติโต กปฺเป, ยมมฺพมททิํ ตทา;

ทุคฺคติํ นาภิชานามิ, อมฺพทานสฺสิทํ ผลํฯ

[42]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อมฺพปิณฺฑิโย เถโร อิมา คาถาโย อภาสิตฺถาติฯ

อมฺพปิณฺฑิยตฺเถรสฺสาปทานํ นวมํฯ

10. อนุสํสาวกตฺเถรอปทานํ

[43]

‘‘ปิณฺฑาย จรมานาหํ, วิปสฺสิมทฺทสํ ชินํ;

อุฬุงฺคภิกฺขํ ปาทาสิํ, ทฺวิปทินฺทสฺส ตาทิโนฯ

[44]