‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปุปฺผธารโก เถโร อิมา คาถาโย อภาสิตฺถาติฯ
ปุปฺผธารกตฺเถรสฺสาปทานํ ทุติยํฯ
3. ฉตฺตทายกตฺเถรอปทานํ
[11]
‘‘ปุตฺโต มม ปพฺพชิโต, กาสายวสโน ตทา;
โส จ พุทฺธตฺตํ สมฺปตฺโต, นิพฺพุโต โลกปูชิโตฯ
[12]
‘‘วิจินนฺโต สกํ ปุตฺตํ, อคมํ ปจฺฉโต อหํ;
นิพฺพุตสฺส มหนฺตสฺส, จิตกํ อคมาสหํฯ
[13]
‘‘ปคฺคยฺห อญฺชลิํ ตตฺถ, วนฺทิตฺวา จิตกํ อหํ;
เสตจฺฉตฺตญฺจ ปคฺคยฺห, อาโรเปสิํ อหํ ตทาฯ
[14]
‘‘จตุนฺนวุติโต กปฺเป, ยํ ฉตฺตมภิโรปยิํ;
ทุคฺคติํ นาภิชานามิ, ฉตฺตทานสฺสิทํ ผลํฯ
[15]
‘‘ปญฺจวีเส อิโต กปฺเป, สตฺต อาสุํ ชนาธิปา;
มหารหสนามา เต, จกฺกวตฺตี มหพฺพลาฯ
[16]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ฉตฺตทายโก เถโร อิมา คาถาโย อภาสิตฺถาติฯ
ฉตฺตทายกตฺเถรสฺสาปทานํ ตติยํฯ
4. สทฺทสญฺญกตฺเถรอปทานํ
[17]
‘‘อนุคฺคตมฺหิ อาทิจฺเจ, ปนาโท [ปสาโท (สฺยา. อฏฺฐ.)] วิปุโล อหุ;
พุทฺธเสฏฺฐสฺส โลกมฺหิ, ปาตุภาโว มเหสิโนฯ
[18]
‘‘โฆส [สทฺท (สี. สฺยา.)] มสฺโสสหํ ตตฺถ, น จ ปสฺสามิ ตํ ชินํ;
มรณญฺจ อนุปฺปตฺโต, พุทฺธสญฺญมนุสฺสริํฯ
[19]
‘‘จตุนฺนวุติโต กปฺเป, ยํ สญฺญมลภิํ ตทา;
ทุคฺคติํ นาภิชานามิ, พุทฺธปูชายิทํ ผลํฯ
[20]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สทฺทสญฺญโก เถโร อิมา คาถาโย อภาสิตฺถาติฯ
สทฺทสญฺญกตฺเถรสฺสาปทานํ จตุตฺถํฯ
5. โคสีสนิกฺเขปกตฺเถรอปทานํ
[21]
‘‘อารามทฺวารา นิกฺขมฺม, โคสีสํ สนฺถตํ มยา;
อนุโภมิ สกํ กมฺมํ, ปุพฺพกมฺมสฺสิทํ ผลํฯ
[22]
‘‘อาชานิยา วาตชวา, สินฺธวา สีฆวาหนา;
อนุโภมิ สพฺพเมตํ, โคสีสสฺส อิทํ ผลํฯ
[23]
‘‘อโห การํ ปรมการํ, สุขตฺเต สุกตํ มยา;
สงฺเฆ กตสฺส การสฺส, น อญฺญํ กลมคฺฆติฯ
[24]
‘‘จตุนฺนวุติโต กปฺเป, ยํ สีสํ สนฺถริํ อหํ;
ทุคฺคติํ นาภิชานามิ, สนฺถรสฺส อิทํ ผลํฯ
[25]
‘‘ปญฺจสตฺตติกปฺปมฺหิ, สุปฺปติฏฺฐิตนามโก;
เอโก อาสิํ มหาเตโช, จกฺกวตฺตี มหพฺพโลฯ
[26]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา โคสีสนิกฺเขปโก เถโร อิมา คาถาโย อภาสิตฺถาติฯ
โคสีสนิกฺเขปกตฺเถรสฺสาปทานํ ปญฺจมํฯ