‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปุปฺผธารโก เถโร อิมา คาถาโย อภาสิตฺถาติฯ
ปุปฺผธารกตฺเถรสฺสาปทานํ ทุติยํฯ
3. ฉตฺตทายกตฺเถรอปทานํ
[11]
‘‘ปุตฺโต มม ปพฺพชิโต, กาสายวสโน ตทา;
โส จ พุทฺธตฺตํ สมฺปตฺโต, นิพฺพุโต โลกปูชิโตฯ
[12]
‘‘วิจินนฺโต สกํ ปุตฺตํ, อคมํ ปจฺฉโต อหํ;
นิพฺพุตสฺส มหนฺตสฺส, จิตกํ อคมาสหํฯ
[13]
‘‘ปคฺคยฺห อญฺชลิํ ตตฺถ, วนฺทิตฺวา จิตกํ อหํ;
เสตจฺฉตฺตญฺจ ปคฺคยฺห, อาโรเปสิํ อหํ ตทาฯ
[14]
‘‘จตุนฺนวุติโต กปฺเป, ยํ ฉตฺตมภิโรปยิํ;
ทุคฺคติํ นาภิชานามิ, ฉตฺตทานสฺสิทํ ผลํฯ
[15]
‘‘ปญฺจวีเส อิโต กปฺเป, สตฺต อาสุํ ชนาธิปา;
มหารหสนามา เต, จกฺกวตฺตี มหพฺพลาฯ
[16]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ฉตฺตทายโก เถโร อิมา คาถาโย อภาสิตฺถาติฯ
ฉตฺตทายกตฺเถรสฺสาปทานํ ตติยํฯ
4. สทฺทสญฺญกตฺเถรอปทานํ
[17]
‘‘อนุคฺคตมฺหิ อาทิจฺเจ, ปนาโท [ปสาโท (สฺยา. อฏฺฐ.)] วิปุโล อหุ;
พุทฺธเสฏฺฐสฺส โลกมฺหิ, ปาตุภาโว มเหสิโนฯ
[18]