1. จิตกปูชกตฺเถรอปทานํ
[1]
‘‘อชิโต นาม นาเมน, อโหสิํ พฺราหฺมโณ ตทา;
อาหุติํ ยิฏฺฐุกาโมหํ, นานาปุปฺผํ สมานยิํฯ
[2]
‘‘ชลนฺตํ จิตกํ ทิสฺวา, สิขิโน โลกพนฺธุโน;
ตญฺจ ปุปฺผํ สมาเนตฺวา, จิตเก โอกิริํ อหํฯ
[3]
‘‘เอกตฺติํเส อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[4]
‘‘สตฺตวีเส [สตฺตติํเส (ก.)] อิโต กปฺเป, สตฺตาสุํ มนุชาธิปา;
สุปชฺชลิตนามา เต, จกฺกวตฺตี มหพฺพลาฯ
[5]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา จิตกปูชโก เถโร อิมา คาถาโย อภาสิตฺถาติฯ
จิตกปูชกตฺเถรสฺสาปทานํ ปฐมํฯ
2. ปุปฺผธารกตฺเถรอปทานํ
[6]
‘‘วากจีรธโร อาสิํ, อชินุตฺตรวาสโน;
อภิญฺญา ปญฺจ นิพฺพตฺตา, จนฺทสฺส ปริมชฺชโกฯ
[7]
‘‘วิปสฺสิํ โลกปชฺโชตํ, ทิสฺวา อภิคตํ มมํ;
ปาริจฺฉตฺตกปุปฺผานิ, ธาเรสิํ สตฺถุโน อหํฯ
[8]
‘‘เอกนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, ธารณาย อิทํ ผลํฯ
[9]
‘‘สตฺตาสีติมฺหิโต กปฺเป, เอโก อาสิํ มหีปติ;
สมนฺตธารโณ นาม, จกฺกวตฺตี มหพฺพโลฯ
[10]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปุปฺผธารโก เถโร อิมา คาถาโย อภาสิตฺถาติฯ
ปุปฺผธารกตฺเถรสฺสาปทานํ ทุติยํฯ
3. ฉตฺตทายกตฺเถรอปทานํ
[11]
‘‘ปุตฺโต มม ปพฺพชิโต, กาสายวสโน ตทา;
โส จ พุทฺธตฺตํ สมฺปตฺโต, นิพฺพุโต โลกปูชิโตฯ
[12]
‘‘วิจินนฺโต สกํ ปุตฺตํ, อคมํ ปจฺฉโต อหํ;
นิพฺพุตสฺส มหนฺตสฺส, จิตกํ อคมาสหํฯ
[13]
‘‘ปคฺคยฺห อญฺชลิํ ตตฺถ, วนฺทิตฺวา จิตกํ อหํ;
เสตจฺฉตฺตญฺจ ปคฺคยฺห, อาโรเปสิํ อหํ ตทาฯ
[14]
‘‘จตุนฺนวุติโต กปฺเป, ยํ ฉตฺตมภิโรปยิํ;
ทุคฺคติํ นาภิชานามิ, ฉตฺตทานสฺสิทํ ผลํฯ
[15]
‘‘ปญฺจวีเส อิโต กปฺเป, สตฺต อาสุํ ชนาธิปา;
มหารหสนามา เต, จกฺกวตฺตี มหพฺพลาฯ
[16]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ฉตฺตทายโก เถโร อิมา คาถาโย อภาสิตฺถาติฯ
ฉตฺตทายกตฺเถรสฺสาปทานํ ตติยํฯ
4. สทฺทสญฺญกตฺเถรอปทานํ
[17]
‘‘อนุคฺคตมฺหิ อาทิจฺเจ, ปนาโท [ปสาโท (สฺยา. อฏฺฐ.)] วิปุโล อหุ;
พุทฺธเสฏฺฐสฺส โลกมฺหิ, ปาตุภาโว มเหสิโนฯ
[18]