‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ผลทายโก เถโร อิมา คาถาโย อภาสิตฺถาติฯ
ผลทายกตฺเถรสฺสาปทานํ ทุติยํฯ
3. ปจฺจุคฺคมนิยตฺเถรอปทานํ
[11]
‘‘สีหํ ยถา วนจรํ, นิสภาชานิยํ ยถา;
กกุธํ วิลสนฺตํว, อาคจฺฉนฺตํ นราสภํฯ
[12]
‘‘สิทฺธตฺถํ โลกปชฺโชตํ, สพฺพโลกติกิจฺฉกํ;
อกาสิํ ปจฺจุคฺคมนํ, วิปฺปสนฺเนน เจตสาฯ
[13]
‘‘จตุนฺนวุติโต กปฺเป, ปจฺจุคฺคจฺฉิํ นราสภํ;
ทุคฺคติํ นาภิชานามิ, ปจฺจุคฺคมเน อิทํ ผลํฯ
[14]
‘‘สตฺตติํเส [สตฺตวีเส (สี. สฺยา.)] อิโต กปฺเป, เอโก อาสิํ ชนาธิโป;
สปริวาโรติ นาเมน, จกฺกวตฺตี มหพฺพโลฯ
[15]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปจฺจุคฺคมนิโย เถโร อิมา คาถาโย อภาสิตฺถาติฯ
ปจฺจุคฺคมนิยตฺเถรสฺสาปทานํ ตติยํฯ
4. เอกปุปฺผิยตฺเถรอปทานํ
[16]
‘‘ทกฺขิณมฺหิ ทุวารมฺหิ, ปิสาโจ อาสหํ ตทา;
อทฺทสํ วิรชํ พุทฺธํ, ปีตรํสิํว ภาณุมํฯ
[17]
‘‘วิปสฺสิสฺส นรคฺคสฺส, สพฺพโลกหิเตสิโน;
เอกปุปฺผํ มยา ทินฺนํ, ทฺวิปทินฺทสฺส ตาทิโนฯ
[18]
‘‘เอกนวุติโต กปฺเป, ยํ ปุปฺผมททิํ ตทา;
ทุคฺคติํ นาภิชานามิ, พุทฺธปูชายิทํ ผลํฯ
[19]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกปุปฺผิโย เถโร อิมา คาถาโย อภาสิตฺถาติฯ
เอกปุปฺผิยตฺเถรสฺสาปทานํ จตุตฺถํฯ
5. มฆวปุปฺผิยตฺเถรอปทานํ
[20]
‘‘นมฺมทานทิยา ตีเร, สยมฺภู อปราชิโต;
สมาธิํ โส สมาปนฺโน, วิปฺปสนฺโน อนาวิโลฯ
[21]
‘‘ทิสฺวา ปสนฺนสุมโน, สมฺพุทฺธํ อปราชิตํ;
ตาหํ มฆวปุปฺเผน, สยมฺภุํ ปูชยิํ ตทาฯ
[22]
‘‘เอกนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[23]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มฆวปุปฺผิโย เถโร อิมา คาถาโย อภาสิตฺถาติฯ
มฆวปุปฺผิยตฺเถรสฺสาปทานํ ปญฺจมํฯ
6. อุปฏฺฐากทายกตฺเถรอปทานํ
[24]
‘‘รถิยํ ปฏิปชฺชนฺตํ, อาหุตีนํ ปฏิคฺคหํ;
ทฺวิปทินฺทํ มหานาคํ, โลกเชฏฺฐํ นราสภํฯ
[25]
‘‘ปกฺโกสาปิย ตสฺสาหํ, สพฺพโลกหิเตสิโน;
อุปฏฺฐาโก มยา ทินฺโน, สิทฺธตฺถสฺส มเหสิโนฯ
[26]
‘‘ปฏิคฺคเหตฺวา [ปฏิคฺคเหสิ (ก.)] สมฺพุทฺโธ, นิยฺยาเทสิ มหามุนิ [มหาอิสิ (ก.)];
อุฏฺฐาย อาสนา ตมฺหา, ปกฺกามิ ปาจินามุโขฯ
[27]