เมนู

1. ปณฺณทายกตฺเถรอปทานํ

[1]

‘‘ปณฺณสาเล นิสินฺโนมฺหิ, ปณฺณโภชนโภชโน;

อุปวิฏฺฐญฺจ มํ สนฺตํ, อุปาคจฺฉิ มหาอิสิ [มหามุนิ (สี.)]

[2]

‘‘สิทฺธตฺโถ โลกปชฺโชโต, สพฺพโลกติกิจฺฉโก;

ตสฺส ปณฺณํ มยา ทินฺนํ, นิสินฺนํ [นิสินฺนสฺส (สฺยา. อฏฺฐ.)] ปณฺณสนฺถเรฯ

[3]

‘‘จตุนฺนวุติโต กปฺเป, ยํ ปณฺณมททิํ ตทา;

ทุคฺคติํ นาภิชานามิ, ปณฺณทานสฺสิทํ ผลํฯ

[4]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา ปณฺณทายโก เถโร อิมา คาถาโย อภาสิตฺถาติฯ

ปณฺณทายกตฺเถรสฺสาปทานํ ปฐมํฯ

2. ผลทายกตฺเถรอปทานํ

[5]

‘‘สิเนรุสมสนฺโตโส , ธรณีสม [ธรณีธร (สี. สฺยา.)] สาทิโส;

วุฏฺฐหิตฺวา สมาธิมฺหา, ภิกฺขาย มมุปฏฺฐิโตฯ

[6]

‘‘หรีตกํ [หรีตกิํ (สฺยา.)] อามลกํ, อมฺพชมฺพุวิภีตกํ;

โกลํ ภลฺลาตกํ พิลฺลํ, ผารุสกผลานิ จฯ

[7]

‘‘สิทฺธตฺถสฺส มเหสิสฺส, สพฺพโลกานุกมฺปิโน;

ตญฺจ สพฺพํ มยา ทินฺนํ, วิปฺปสนฺเนน เจตสาฯ

[8]

‘‘จตุนฺนวุติโต กปฺเป, ยํ ผลํ อททิํ ตทา;

ทุคฺคติํ นาภิชานามิ, ผลทานสฺสิทํ ผลํฯ

[9]

‘‘สตฺตปญฺญาสิโต กปฺเป, เอกชฺโฌ นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[10]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ผลทายโก เถโร อิมา คาถาโย อภาสิตฺถาติฯ

ผลทายกตฺเถรสฺสาปทานํ ทุติยํฯ

3. ปจฺจุคฺคมนิยตฺเถรอปทานํ

[11]

‘‘สีหํ ยถา วนจรํ, นิสภาชานิยํ ยถา;

กกุธํ วิลสนฺตํว, อาคจฺฉนฺตํ นราสภํฯ

[12]

‘‘สิทฺธตฺถํ โลกปชฺโชตํ, สพฺพโลกติกิจฺฉกํ;

อกาสิํ ปจฺจุคฺคมนํ, วิปฺปสนฺเนน เจตสาฯ

[13]

‘‘จตุนฺนวุติโต กปฺเป, ปจฺจุคฺคจฺฉิํ นราสภํ;

ทุคฺคติํ นาภิชานามิ, ปจฺจุคฺคมเน อิทํ ผลํฯ

[14]

‘‘สตฺตติํเส [สตฺตวีเส (สี. สฺยา.)] อิโต กปฺเป, เอโก อาสิํ ชนาธิโป;

สปริวาโรติ นาเมน, จกฺกวตฺตี มหพฺพโลฯ

[15]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปจฺจุคฺคมนิโย เถโร อิมา คาถาโย อภาสิตฺถาติฯ

ปจฺจุคฺคมนิยตฺเถรสฺสาปทานํ ตติยํฯ

4. เอกปุปฺผิยตฺเถรอปทานํ

[16]

‘‘ทกฺขิณมฺหิ ทุวารมฺหิ, ปิสาโจ อาสหํ ตทา;

อทฺทสํ วิรชํ พุทฺธํ, ปีตรํสิํว ภาณุมํฯ

[17]

‘‘วิปสฺสิสฺส นรคฺคสฺส, สพฺพโลกหิเตสิโน;

เอกปุปฺผํ มยา ทินฺนํ, ทฺวิปทินฺทสฺส ตาทิโนฯ

[18]

‘‘เอกนวุติโต กปฺเป, ยํ ปุปฺผมททิํ ตทา;

ทุคฺคติํ นาภิชานามิ, พุทฺธปูชายิทํ ผลํฯ

[19]