‘‘จตุนฺนวุติโต กปฺเป, จิตกํ ยมปูชยิํ;
ทุคฺคติํ นาภิชานามิ, จิตปูชายิทํ ผลํฯ
[29]
‘‘สตฺตสฏฺฐิมฺหิโต กปฺเป, ปฏิชคฺคสนามกา;
สตฺตรตนสมฺปนฺนา, สตฺตาสุํ จกฺกวตฺติโน [ปฏิชคฺคสนามโก; สตฺตรตนสมฺปนฺโน, จกฺกวตฺตี มหพฺพโล (สฺยา.)]ฯ
[30]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา จิตกปูชโก เถโร อิมา คาถาโย อภาสิตฺถาติฯ
จิตกปูชกตฺเถรสฺสาปทานํ สตฺตมํฯ
8. อาลุวทายกตฺเถรอปทานํ
[31]
‘‘ปพฺพเต หิมวนฺตมฺหิ, มหาสินฺธุ สุทสฺสนา;
ตตฺถทฺทสํ วีตราคํ, สุปฺปภาสํ สุทสฺสนํฯ
[32]
‘‘ปรโมปสเม ยุตฺตํ, ทิสฺวา วิมฺหิตมานโส;
อาลุวํ ตสฺส ปาทาสิํ, ปสนฺโน เสหิ ปาณิภิฯ
[33]
‘‘เอกตฺติํเส อิโต กปฺเป, ยํ ผลมททิํ ตทา;
ทุคฺคติํ นาภิชานามิ, อาลุวสฺส อิทํ ผลํฯ
[34]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อาลุวทายโก เถโร อิมา คาถาโย อภาสิตฺถาติฯ
อาลุวทายกตฺเถรสฺสาปทานํ อฏฺฐมํฯ
9. เอกปุณฺฑรีกตฺเถรอปทานํ
[35]
‘‘โรมโส นาม นาเมน, สยมฺภู สุพฺพโต [สปฺปโภ (สฺยา.)] ตทา;
ปุณฺฑรีกํ มยา ทินฺนํ, วิปฺปสนฺเนน เจตสาฯ
[36]
‘‘จตุนฺนวุติโต กปฺเป, ปุณฺฑรีกมทํ ตทา;
ทุคฺคติํ นาภิชานามิ, ปุณฺฑรีกสฺสิทํ ผลํฯ
[37]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกปุณฺฑรีโก เถโร อิมา คาถาโย อภาสิตฺถาติฯ
เอกปุณฺฑรีกตฺเถรสฺสาปทานํ นวมํฯ
10. ตรณียตฺเถรอปทานํ
[38]
‘‘มหาปถมฺหิ วิสเม, เสตุ การาปิโต มยา;
ตรณตฺถาย โลกสฺส, ปสนฺโน เสหิ ปาณิภิฯ
[39]
‘‘เอกนวุติโต กปฺเป, โย เสตุ การิโต มยา;
ทุคฺคติํ นาภิชานามิ, เสตุทานสฺสิทํ ผลํฯ
[40]
‘‘ปญฺจปญฺญาสิโต กปฺเป, เอโก อาสิํ สโมคโธ;
สตฺตรตนสมฺปนฺโน, จกฺกวตฺตี มหพฺพโลฯ
[41]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ตรณีโย เถโร อิมา คาถาโย อภาสิตฺถาติฯ
ตรณียตฺเถรสฺสาปทานํ ทสมํฯ
สุวณฺณพิพฺโพหนวคฺโค อฏฺฐวีสติโมฯ
ตสฺสุทฺทานํ –
สุวณฺณํ ติลมุฏฺฐิ จ, จงฺโกฏพฺภญฺชนญฺชลี;
โปตฺถโก จิตมาลุวา, เอกปุณฺฑรี เสตุนา;
ทฺเวจตฺตาลีส คาถาโย, คณิตาโย วิภาวิภีติฯ
เอกาทสมํ ภาณวารํฯ
29. ปณฺณทายกวคฺโค