5. เอกญฺชลิกตฺเถรอปทานํ

[19]

‘‘อุทุมฺพเร วสนฺตสฺส, นิยเต ปณฺณสนฺถเร;

วุตฺโถกาโส มยา ทินฺโน, สมณสฺส มเหสิโนฯ

[20]

‘‘ติสฺสสฺส ทฺวิปทินฺทสฺส, โลกนาถสฺส ตาทิโน;

อญฺชลิํ ปคฺคเหตฺวาน, สนฺถริํ ปุปฺผสนฺถรํฯ

[21]

‘‘ทฺเวนวุเต อิโต กปฺเป, ยํ กริํ ปุปฺผสนฺถรํ;

ทุคฺคติํ นาภิชานามิ, สนฺถรสฺส อิทํ ผลํฯ

[22]

‘‘อิโต จุทฺทสกปฺปมฺหิ, อโหสิํ มนุชาธิโป;

เอกอญฺชลิโก นาม, จกฺกวตฺตี มหพฺพโลฯ

[23]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกญฺชลิโก เถโร อิมา คาถาโย อภาสิตฺถาติฯ

เอกญฺชลิกตฺเถรสฺสาปทานํ ปญฺจมํฯ

6. โปตฺถกทายกตฺเถรอปทานํ

[24]

‘‘สตฺถารํ ธมฺมมารพฺภ, สงฺฆญฺจาปิ มเหสินํ;

โปตฺถทานํ มยา ทินฺนํ, ทกฺขิเณยฺเย อนุตฺตเรฯ

[25]

‘‘เอกนวุติโต กปฺเป, ยํ กมฺมมกริํ ตทา;

ทุคฺคติํ นาภิชานามิ, โปตฺถทานสฺสิทํ ผลํฯ

[26]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โปตฺถกทายโก เถโร อิมา คาถาโย อภาสิตฺถาติฯ

โปตฺถกทายกตฺเถรสฺสาปทานํ ฉฏฺฐํฯ

7. จิตกปูชกตฺเถรอปทานํ

[27]

‘‘จนฺทภาคานทีตีเร, อนุโสตํ วชามหํ;

สตฺต มาลุวปุปฺผานิ, จิตมาโรปยิํ อหํฯ

[28]

‘‘จตุนฺนวุติโต กปฺเป, จิตกํ ยมปูชยิํ;

ทุคฺคติํ นาภิชานามิ, จิตปูชายิทํ ผลํฯ

[29]

‘‘สตฺตสฏฺฐิมฺหิโต กปฺเป, ปฏิชคฺคสนามกา;

สตฺตรตนสมฺปนฺนา, สตฺตาสุํ จกฺกวตฺติโน [ปฏิชคฺคสนามโก; สตฺตรตนสมฺปนฺโน, จกฺกวตฺตี มหพฺพโล (สฺยา.)]ฯ

[30]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา จิตกปูชโก เถโร อิมา คาถาโย อภาสิตฺถาติฯ

จิตกปูชกตฺเถรสฺสาปทานํ สตฺตมํฯ

8. อาลุวทายกตฺเถรอปทานํ

[31]

‘‘ปพฺพเต หิมวนฺตมฺหิ, มหาสินฺธุ สุทสฺสนา;

ตตฺถทฺทสํ วีตราคํ, สุปฺปภาสํ สุทสฺสนํฯ

[32]

‘‘ปรโมปสเม ยุตฺตํ, ทิสฺวา วิมฺหิตมานโส;

อาลุวํ ตสฺส ปาทาสิํ, ปสนฺโน เสหิ ปาณิภิฯ

[33]

‘‘เอกตฺติํเส อิโต กปฺเป, ยํ ผลมททิํ ตทา;

ทุคฺคติํ นาภิชานามิ, อาลุวสฺส อิทํ ผลํฯ

[34]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อาลุวทายโก เถโร อิมา คาถาโย อภาสิตฺถาติฯ

อาลุวทายกตฺเถรสฺสาปทานํ อฏฺฐมํฯ

9. เอกปุณฺฑรีกตฺเถรอปทานํ

[35]

‘‘โรมโส นาม นาเมน, สยมฺภู สุพฺพโต [สปฺปโภ (สฺยา.)] ตทา;

ปุณฺฑรีกํ มยา ทินฺนํ, วิปฺปสนฺเนน เจตสาฯ

[36]

‘‘จตุนฺนวุติโต กปฺเป, ปุณฺฑรีกมทํ ตทา;

ทุคฺคติํ นาภิชานามิ, ปุณฺฑรีกสฺสิทํ ผลํฯ

[37]