3. อฑฺฒจนฺทิยตฺเถรอปทานํ

[10]

‘‘ติสฺสสฺส โข ภควโต, โพธิยา ปาทปุตฺตเม;

อฑฺฒจนฺทํ มยา ทินฺนํ, ธรณีรุหปาทเปฯ

[11]

‘‘ทฺเวนวุเต อิโต กปฺเป, ยํ จนฺท [ยํ ปุปฺผ (ก.)] มภิโรปยิํ;

ทุคฺคติํ นาภิชานามิ, โพธิปูชายิทํ ผลํฯ

[12]

‘‘ปญฺจวีเส อิโต กปฺเป, เทวโล นาม ขตฺติโย;

สตฺตรตนสมฺปนฺโน, จกฺกวตฺตี มหพฺพโลฯ

[13]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อฑฺฒจนฺทิโย เถโร อิมา คาถาโย อภาสิตฺถาติฯ

อฑฺฒจนฺทิยตฺเถรสฺสาปทานํ ตติยํฯ

4. ปทีปทายกตฺเถรอปทานํ

[14]

‘‘เทวภูโต อหํ สนฺโต, โอรุยฺห ปถวิํ ตทา;

ปทีเป ปญฺจ ปาทาสิํ, ปสนฺโน เสหิ ปาณิภิฯ

[15]

‘‘จตุนฺนวุติโต กปฺเป, ยํ ปทีปมทํ ตทา;

ทุคฺคติํ นาภิชานามิ, ทีปทานสฺสิทํ ผลํฯ

[16]

‘‘ปญฺจปญฺญาสเก กปฺเป, เอโก อาสิํ มหีปติ;

สมนฺตจกฺขุนาเมน, จกฺกวตฺตี มหพฺพโลฯ

[17]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปทีปทายโก [อปณฺณทีปิโย (สี. ก.)] เถโร อิมา คาถาโย อภาสิตฺถาติฯ

ปทีปทายกตฺเถรสฺสาปทานํ จตุตฺถํฯ

5. พิฬาลิทายกตฺเถรอปทานํ

[18]

‘‘หิมวนฺตสฺสาวิทูเร , โรมโส นาม ปพฺพโต;

ตมฺหิ ปพฺพตปาทมฺหิ, สมโณ ภาวิตินฺทฺริโยฯ

[19]

‘‘พิฬาลิโย คเหตฺวาน, สมณสฺส อทาสหํ;

อนุโมทิ มหาวีโร, สยมฺภู อปราชิโตฯ

[20]

‘‘พิฬาลี เต มม ทินฺนา, วิปฺปสนฺเนน เจตสา;

ภเว นิพฺพตฺตมานมฺหิ, ผลํ นิพฺพตฺตตํ ตวฯ

[21]

‘‘จตุนฺนวุติโต กปฺเป, ยํ พิฬาลิมทาสหํ;

ทุคฺคติํ นาภิชานามิ, พิฬาลิยา อิทํ ผลํฯ

[22]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา พิฬาลิทายโก เถโร อิมา คาถาโย อภาสิตฺถาติฯ

พิฬาลิทายกตฺเถรสฺสาปทานํ ปญฺจมํฯ

6. มจฺฉทายกตฺเถรอปทานํ

[23]

‘‘จนฺทภาคานทีตีเร, อุกฺกุโส อาสหํ ตทา;

มหนฺตํ มจฺฉํ ปคฺคยฺห, สิทฺธตฺถมุนิโน อทํฯ

[24]

‘‘จตุนฺนวุติโต กปฺเป, ยํ มจฺฉมททิํ ตทา;

ทุคฺคติํ นาภิชานามิ, มจฺฉทานสฺสิทํ ผลํฯ

[25]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา มจฺฉทายโก เถโร อิมา คาถาโย อภาสิตฺถาติฯ

มจฺฉทายกตฺเถรสฺสาปทานํ ฉฏฺฐํฯ

7. ชวหํสกตฺเถรอปทานํ

[26]

‘‘จนฺทภาคานทีตีเร, อาสิํ วนจโร ตทา;

สิทฺธตฺถํ อทฺทสํ พุทฺธํ, คจฺฉนฺตํ อนิลญฺชเสฯ

[27]

‘‘อญฺชลิํ ปคฺคเหตฺวาน, อุลฺโลเกนฺโต มหามุนิํ;

สกํ จิตฺตํ ปสาเทตฺวา, อวนฺทิํ นายกํ อหํฯ

[28]