‘‘อิโต เตสตฺตติกปฺเป, เอโก อาสิํ มหีปติ;
โชติโย นาม นาเมน, จกฺกวตฺตี มหพฺพโลฯ
[27]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา มญฺชริปูชโก เถโร อิมา คาถาโย อภาสิตฺถาติฯ
มญฺชริปูชกตฺเถรสฺสาปทานํ สตฺตมํฯ
8. ปณฺณทายกตฺเถรอปทานํ
[28]
‘‘ปพฺพเต หิมวนฺตมฺหิ, วากจีรธโร อหํ;
อโลณปณฺณภกฺโขมฺหิ, นิยเมสุ จ สํวุโตฯ
[29]
‘‘ปาตราเส อนุปฺปตฺเต, สิทฺธตฺโถ อุปคจฺฉิ มํ;
ตาหํ พุทฺธสฺส ปาทาสิํ, ปสนฺโน เสหิ ปาณิภิฯ
[30]
‘‘จตุนฺนวุติโต กปฺเป, ยํ ปณฺณมททิํ ตทา;
ทุคฺคติํ นาภิชานามิ, ปณฺณทานสฺสิทํ ผลํฯ
[31]
‘‘สตฺตวีสติกปฺปมฺหิ , ราชา อาสิํ สทตฺถิโย [ยทตฺถิโย (สี. สฺยา.)];
สตฺตรตนสมฺปนฺโน, จกฺกวตฺตี มหพฺพโลฯ
[32]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปณฺณทายโก เถโร อิมา คาถาโย อภาสิตฺถาติฯ
ปณฺณทายกตฺเถรสฺสาปทานํ อฏฺฐมํฯ
9. กุฏิทายกตฺเถรอปทานํ
[33]
‘‘วิปินจารี สมฺพุทฺโธ, รุกฺขมูเล วสี ตทา;
ปณฺณสาลํ กริตฺวาน, อทาสิํ อปราชิเตฯ
[34]
‘‘เอกนวุติโต กปฺเป, ยํ ปณฺณกุฏิกํ อทํ;
ทุคฺคติํ นาภิชานามิ, กุฏิทานสฺสิทํ ผลํฯ
[35]
‘‘อฏฺฐวีเส [อฏฺฐติํเส (สฺยา.)] อิโต กปฺเป, โสฬสาสิํสุ ราชาโน;
สพฺพตฺถ อภิวสฺสีติ, วุจฺจเร จกฺกวตฺติโนฯ
[36]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กุฏิทายโก เถโร อิมา คาถาโย อภาสิตฺถาติฯ
กุฏิทายกตฺเถรสฺสาปทานํ นวมํฯ
10. อคฺคปุปฺผิยตฺเถรอปทานํ
[37]
‘‘สุวณฺณวณฺณํ สมฺพุทฺธํ, นิสินฺนํ ปพฺพตนฺตเร;
โอภาสยนฺตํ รํเสน [รํสิยา (สฺยา.)], สิขินํ สิขินํ ยถาฯ
[38]
‘‘อคฺคชํ ปุปฺผมาทาย, อุปาคจฺฉิํ นรุตฺตมํ;
ปสนฺนจิตฺโต สุมโน, พุทฺธสฺส อภิโรปยิํฯ
[39]
‘‘เอกตฺติํเส อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[40]
‘‘ปญฺจวีสติกปฺปมฺหิ, อโหสิ อมิโตคโต [อมิตวฺหโย (สี.)];
สตฺตรตนสมฺปนฺโน, จกฺกวตฺตี มหพฺพโลฯ
[41]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อคฺคปุปฺผิโย เถโร อิมา คาถาโย อภาสิตฺถาติฯ
อคฺคปุปฺผิยตฺเถรสฺสาปทานํ ทสมํฯ
โถมกวคฺโค ฉพฺพีสติโมฯ
ตสฺสุทฺทานํ –
โถมเกกาสนจิตกํ, จมฺปโก สตฺตปาฏลิ;
ปานธิ [ปาหโน (สี.), ปาทุ (สฺยา.)] มญฺชรี ปณฺณํ, กุฏิโท อคฺคปุปฺผิโย;
คาถาโย คณิตา เจตฺถ, เอกตาลีสเมว จาติฯ
27. ปทุมุกฺขิปวคฺโค