1. โถมกตฺเถรอปทานํ
[1]
‘‘เทวโลเก ฐิโต สนฺโต, วิปสฺสิสฺส มเหสิโน;
ธมฺมํ สุณิตฺวา มุทิโต, อิมํ วาจํ อภาสหํฯ
[2]
‘‘‘นโม เต ปุริสาชญฺญ, นโม เต ปุริสุตฺตม;
พหุชฺชนํ [พหุํ ชนํ (สี.)] ตารยสิ, เทเสนฺโต อมตํ ปทํ’ฯ
[3]
‘‘เอกนวุติโต กปฺเป, ยํ วาจมภณิํ ตทา;
ทุคฺคติํ นาภิชานามิ, โถมนาย อิทํ ผลํฯ
[4]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา โถมโก เถโร อิมา คาถาโย อภาสิตฺถาติฯ
โถมกตฺเถรสฺสาปทานํ ปฐมํฯ
2. เอกาสนทายกตฺเถรอปทานํ
[5]
‘‘วิชหิตฺวา เทววณฺณํ, สภริโย อิธาคมิํ;
อธิการํ กตฺตุกาโม, พุทฺธเสฏฺฐสฺส สาสเนฯ
[6]
‘‘เทวโล นาม นาเมน, ปทุมุตฺตรสาวโก;
ตสฺส ภิกฺขา มยา ทินฺนา, วิปฺปสนฺเนน เจตสาฯ
[7]
‘‘สตสหสฺสิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ปิณฺฑปาตสฺสิทํ ผลํฯ
[8]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกาสนทายโก เถโร อิมา คาถาโย อภาสิตฺถาติฯ
เอกาสนทายกตฺเถรสฺสาปทานํ ทุติยํฯ
3. จิตกปูชกตฺเถรอปทานํ
[9]
‘‘อานนฺโท นาม สมฺพุทฺโธ, สยมฺภู อปราชิโต;
อรญฺเญ ปรินิพฺพายิ, อมนุสฺสมฺหิ กานเนฯ
[10]
‘‘เทวโลกา อิธาคนฺตฺวา, จิตํ กตฺวานหํ ตทา;
สรีรํ ตตฺถ ฌาเปสิํ, สกฺการญฺจ อกาสหํฯ
[11]
‘‘เอกนวุติโต กปฺเป, ยํ กมฺมมกริํ ตทา;
ทุคฺคติํ นาภิชานามิ, พุทฺธปูชายิทํ ผลํฯ
[12]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา จิตกปูชโก เถโร อิมา คาถาโย อภาสิตฺถาติฯ
จิตกปูชกตฺเถรสฺสาปทานํ ตติยํฯ
4. ติจมฺปกปุปฺผิยตฺเถรอปทานํ
[13]
‘‘หิมวนฺตสฺสาวิทูเร , วิกโต [วิกโน (สี. สฺยา.)] นาม ปพฺพโต;
ตสฺส เวมชฺเฌ วสติ, สมโณ ภาวิตินฺทฺริโยฯ
[14]
‘‘ทิสฺวาน ตสฺโสปสมํ, วิปฺปสนฺเนน เจตสา;
ตีณิ จมฺปกปุปฺผานิ, คเหตฺวาน สโมกิริํฯ
[15]
‘‘เอกนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[16]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ติจมฺปกปุปฺผิโย เถโร อิมา คาถาโย อภาสิตฺถาติฯ
ติจมฺปกปุปฺผิยตฺเถรสฺสาปทานํ จตุตฺถํฯ
5. สตฺตปาฏลิยตฺเถรอปทานํ
[17]
‘‘กณิการํว โชตนฺตํ, นิสินฺนํ ปพฺพตนฺตเร;
สตฺต ปาฏลิปุปฺผานิ, พุทฺธสฺส อภิโรปยิํฯ
[18]