5. กุฏิธูปกตฺเถรอปทานํ
[17]
‘‘สิทฺธตฺถสฺส ภควโต, อโหสิํ กุฏิโคปโก;
กาเลน กาลํ ธูเปสิํ, ปสนฺโน เสหิ ปาณิภิฯ
[18]
‘‘จตุนฺนวุติโต กปฺเป, ยํ กมฺมมกริํ ตทา;
ทุคฺคติํ นาภิชานามิ, ธูปทานสฺสิทํ [พุทฺธปูชายิทํ (สี.)] ผลํฯ
[19]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กุฏิธูปโก เถโร อิมา คาถาโย อภาสิตฺถาติฯ
กุฏิธูปกตฺเถรสฺสาปทานํ ปญฺจมํฯ
6. ปตฺตทายกตฺเถรอปทานํ
[20]
‘‘ปรเมน ทมเถน, สิทฺธตฺถสฺส มเหสิโน;
ปตฺตทานํ มยา ทินฺนํ, อุชุภูตสฺส ตาทิโนฯ
[21]
‘‘จตุนฺนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, ปตฺตทานสฺสิทํ ผลํฯ
[22]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปตฺตทายโก เถโร อิมา คาถาโย อภาสิตฺถาติฯ
ปตฺตทายกตฺเถรสฺสาปทานํ ฉฏฺฐํฯ
7. ธาตุปูชกตฺเถรอปทานํ
[23]
‘‘นิพฺพุเต โลกนาถมฺหิ, สิทฺธตฺถมฺหิ นรุตฺตเม;
เอกา ธาตุ มยา ลทฺธา, ทฺวิปทินฺทสฺส ตาทิโนฯ
[24]
‘‘ตาหํ ธาตุํ คเหตฺวาน, พุทฺธสฺสาทิจฺจพนฺธุโน;
ปญฺจวสฺเส ปริจริํ, ติฏฺฐนฺตํว นรุตฺตมํฯ
[25]
‘‘จตุนฺนวุติโต กปฺเป, ยํ ธาตุํ ปูชยิํ ตทา;
ทุคฺคติํ นาภิชานามิ, ธาตุปฏฺฐหเน ผลํฯ
[26]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ธาตุปูชโก เถโร อิมา คาถาโย อภาสิตฺถาติฯ
ธาตุปูชกตฺเถรสฺสาปทานํ สตฺตมํฯ
8. สตฺตลิปุปฺผปูชกตฺเถรอปทานํ
[27]
‘‘สตฺต สตฺตลิปุปฺผานิ, สีเส กตฺวานหํ ตทา;
พุทฺธสฺส อภิโรเปสิํ, เวสฺสภุมฺหิ นรุตฺตเม [วิภตฺติวิปลฺลาโส จินฺเตตพฺโพ]ฯ
[28]
‘‘เอกตฺติํเส อิโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[29]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สตฺตลิปุปฺผปูชโก เถโร อิมา คาถาโย อภาสิตฺถาติฯ
สตฺตลิปุปฺผปูชกตฺเถรสฺสาปทานํ อฏฺฐมํฯ
9. พิมฺพิชาลิยตฺเถรอปทานํ
[30]
‘‘ปทุมุตฺตโร นาม ชิโน, สยมฺภู อคฺคปุคฺคโล;
จตุสจฺจํ ปกาเสติ, ทีเปติ อมตํ ปทํฯ
[31]
‘‘พิมฺพิชาลกปุปฺผานิ [พิมฺพชาลกปุปฺผานิ (ก.)], ปุถุ กตฺวานหํ ตทา;
พุทฺธสฺส อภิโรเปสิํ, ทฺวิปทินฺทสฺส ตาทิโนฯ
[32]
‘‘อฏฺฐสฏฺฐิมฺหิโต กปฺเป, จตุโร กิญฺชเกสรา;
สตฺตรตนสมฺปนฺนา, จกฺกวตฺตี มหพฺพลาฯ
[33]