‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ชคติการโก เถโร อิมา คาถาโย อภาสิตฺถาติฯ

ชคติการกตฺเถรสฺสาปทานํ นวมํฯ

10. วาสิทายกตฺเถรอปทานํ

[36]

‘‘กมฺมาโรหํ ปุเร อาสิํ, ติวรายํ ปุรุตฺตเม;

เอกา วาสิ มยา ทินฺนา, สยมฺภุํ อปราชิตํ [สยมฺภุมฺหิปราชิเต (?)]ฯ

[37]

‘‘จตุนฺนวุติโต กปฺเป, ยํ วาสิมททิํ ตทา;

ทุคฺคติํ นาภิชานามิ, วาสิทานสฺสิทํ ผลํฯ

[38]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา วาสิทายโก เถโร อิมา คาถาโย อภาสิตฺถาติฯ

วาสิทายกตฺเถรสฺสาปทานํ ทสมํฯ

อุทกาสนวคฺโค จตุวีสติโมฯ

ตสฺสุทฺทานํ –

อุทกาสนภาชนํ, สาลปุปฺผี กิลญฺชโก;

เวทิกา วณฺณกาโร จ, ปิยาลอมฺพยาคโท;

ชคตี วาสิทาตา จ, คาถา ติํส จ อฏฺฐ จฯ

25. ตุวรทายกวคฺโค

1. ตุวรทายกตฺเถรอปทานํ

[1]

‘‘มิคลุทฺโท ปุเร อาสิํ, อรญฺเญ กานเน อหํ;

ภริตฺวา ตุวรมาทาย [ภริตฺวา ตุรวมาทาย (ก.), ภชฺชิตํ ตุวรมาทาย (?) เอตฺถ ตุวรนฺติ มุคฺคกลายสทิสํ ตุวรฏฺฐินฺติ ตทฏฺฐกถา; ตุวโร ธญฺญเภเทติ สกฺกตาภิธาเน], สงฺฆสฺส อททิํ อหํฯ

[2]

‘‘เอกนวุติโต กปฺเป, ยํ ทานมททิํ ตทา;

ทุคฺคติํ นาภิชานามิ, ตุวรสฺส อิทํ ผลํฯ

[3]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา ตุวรทายโก เถโร อิมา คาถาโย อภาสิตฺถาติฯ

ตุวรทายกตฺเถรสฺสาปทานํ ปฐมํฯ

2. นาคเกสริยตฺเถรอปทานํ

[4]

‘‘ธนุํ อทฺเวชฺฌํ กตฺวาน, วนมชฺโฌคหิํ อหํ;

เกสรํ โอคตํ [โอสรํ (สฺยา.), โอสฏํ (สี.)] ทิสฺวา, ปตปตฺตํ สมุฏฺฐิตํฯ

[5]

‘‘อุโภ หตฺเถหิ ปคฺคยฺห, สิเร กตฺวาน อญฺชลิํ;

พุทฺธสฺส อภิโรเปสิํ, ติสฺสสฺส โลกพนฺธุโนฯ

[6]

‘‘ทฺเวนวุเต อิโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[7]

‘‘เตสตฺตติมฺหิ กปฺปมฺหิ [สตฺตสตฺตติเม กปฺเป (สฺยา.)], สตฺต เกสรนามกา;

สตฺตรตนสมฺปนฺนา, จกฺกวตฺตี มหพฺพลาฯ

[8]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา นาคเกสริโย เถโร อิมา คาถาโย อภาสิตฺถาติฯ

นาคเกสริยตฺเถรสฺสาปทานํ ทุติยํฯ