เมนู

1. อุทกาสนทายกตฺเถรอปทานํ

[1]

‘‘อารามทฺวารา นิกฺขมฺม, ผลกํ สนฺถริํ อหํ;

อุทกญฺจ อุปฏฺฐาสิํ, อุตฺตมตฺถสฺส ปตฺติยาฯ

[2]

‘‘เอกตฺติํเส อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, อาสเน โจทเก ผลํฯ

[3]

‘‘อิโต ปนฺนรเส กปฺเป, อภิสามสมวฺหโย;

สตฺตรตนสมฺปนฺโน, จกฺกวตฺตี มหพฺพโลฯ

[4]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา อุทกาสนทายโก เถโร อิมา คาถาโย อภาสิตฺถาติฯ

อุทกาสนทายกตฺเถรสฺสาปทานํ ปฐมํฯ

2. ภาชนปาลกตฺเถรอปทานํ

[5]

‘‘นคเร พนฺธุมติยา, กุมฺภกาโร อหํ ตทา;

ภาชนํ อนุปาเลสิํ, ภิกฺขุสงฺฆสฺส ตาวเทฯ

[6]

‘‘เอกนวุติโต กปฺเป, ภาชนํ อนุปาลยิํ;

ทุคฺคติํ นาภิชานามิ, ภาชนสฺส อิทํ ผลํฯ

[7]

‘‘เตปญฺญาเส อิโต กปฺเป, อนนฺตชาลินามโก;

สตฺตรตนสมฺปนฺโน, จกฺกวตฺตี มหพฺพโลฯ

[8]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ภาชนปาลโก [ภาชนทายโก (สี. สฺยา.)] เถโร อิมา คาถาโย อภาสิตฺถาติฯ

ภาชนปาลกตฺเถรสฺสาปทานํ ทุติยํฯ

3. สาลปุปฺผิยตฺเถรอปทานํ

[9]

‘‘อรุณวติยา นคเร, อโหสิํ ปูปิโก ตทา;

มม ทฺวาเรน คจฺฉนฺตํ, สิขินํ อทฺทสํ ชินํฯ

[10]

‘‘พุทฺธสฺส ปตฺตํ ปคฺคยฺห, สาลปุปฺผํ อทาสหํ;

สมฺมคฺคตสฺส พุทฺธสฺส, วิปฺปสนฺเนน เจตสาฯ

[11]

‘‘เอกตฺติํเส อิโต กปฺเป, ยํ ปุปฺผมภิทาสหํ [ยํ ขชฺชกมทาสหํ (สี.), ยํ ขชฺชมภิทาสหํ (ก.) สาลปุปฺผนามกํ ขชฺชกํ วา ภเวยฺย];

ทุคฺคติํ นาภิชานามิ, สาลปุปฺผสฺสิทํ ผลํฯ

[12]

‘‘อิโต จุทฺทสกปฺปมฺหิ, อโหสิํ อมิตญฺชโล;

สตฺตรตนสมฺปนฺโน, จกฺกวตฺตี มหพฺพโลฯ

[13]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สาลปุปฺผิโย เถโร อิมา คาถาโย อภาสิตฺถาติฯ

สาลปุปฺผิยตฺเถรสฺสาปทานํ ตติยํฯ

4. กิลญฺชทายกตฺเถรอปทานํ

[14]

‘‘ติวรายํ ปุเร รมฺเม, นฬกาโร อหํ ตทา;

สิทฺธตฺเถ โลกปชฺโชเต, ปสนฺนา ชนตา ตหิํฯ

[15]

‘‘ปูชตฺถํ โลกนาถสฺส, กิลญฺชํ ปริเยสติ;

พุทฺธปูชํ กโรนฺตานํ, กิลญฺชํ อททิํ อหํฯ

[16]

‘‘จตุนฺนวุติโต กปฺเป, ยํ กมฺมมกริํ ตทา;

ทุคฺคติํ นาภิชานามิ, กิลญฺชสฺส อิทํ ผลํฯ

[17]

‘‘สตฺตสตฺตติกปฺปมฺหิ, ราชา อาสิํ ชลทฺธโร [ชุตินฺธโร (สี.)];

สตฺตรตนสมฺปนฺโน, จกฺกวตฺตี มหพฺพโลฯ

[18]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา กิลญฺชทายโก เถโร อิมา คาถาโย อภาสิตฺถาติฯ

กิลญฺชทายกตฺเถรสฺสาปทานํ จตุตฺถํฯ