เมนู

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โสวณฺณวฏํสกิโย เถโร อิมา คาถาโย อภาสิตฺถาติฯ

โสวณฺณวฏํสกิยตฺเถรสฺสาปทานํ สตฺตมํฯ

8. มิญฺชวฏํสกิยตฺเถรอปทานํ

[39]

‘‘นิพฺพุเต โลกนาถมฺหิ, สิขิมฺหิ วทตํ วเร;

วฏํสเกหิ อากิณฺณํ, โพธิปูชํ อกาสหํฯ

[40]

‘‘เอกตฺติํเส อิโต กปฺเป, ยํ ปูชมกริํ ตทา;

ทุคฺคติํ นาภิชานามิ, โพธิปูชายิทํ ผลํฯ

[41]

‘‘อิโต ฉพฺพีสติกปฺเป, อหุํ เมฆพฺภนามโก;

สตฺตรตนสมฺปนฺโน, จกฺกวตฺตี มหพฺพโลฯ

[42]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา มิญฺชวฏํสกิโย เถโร อิมา คาถาโย อภาสิตฺถาติฯ

มิญฺชวฏํสกิยตฺเถรสฺสาปทานํ อฏฺฐมํฯ

9. สุกตาเวฬิยตฺเถรอปทานํ

[43]

‘‘อสิโต นาม นาเมน, มาลากาโร อหํ [อหุํ (?)] ตทา;

อาเวฬํ ปคฺคเหตฺวาน, รญฺโญ ทาตุํ วชามหํฯ

[44]

‘‘อสมฺปตฺโตมฺหิ [อสมฺปตฺตมฺหิ (สี.), อสมฺปตฺโตว (?)] ราชานํ, อทฺทสํ สิขินายกํ;

หฏฺโฐ หฏฺเฐน จิตฺเตน, พุทฺธสฺส อภิโรปยิํฯ

[45]

‘‘เอกตฺติํเส อิโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[46]

‘‘ปญฺจวีเส อิโต กปฺเป, ราชาโหสิํ มหพฺพโล;

เวภาโร นาม นาเมน, จกฺกวตฺตี มหพฺพโลฯ

[47]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สุกตาเวฬิโย เถโร อิมา คาถาโย อภาสิตฺถาติฯ

สุกตาเวฬิยตฺเถรสฺสาปทานํ นวมํฯ

10. เอกวนฺทนิยตฺเถรอปทานํ

[48]

‘‘อุสภํ ปวรํ วีรํ, เวสฺสภุํ วิชิตาวินํ;

ปสนฺนจิตฺโต สุมโน, พุทฺธเสฏฺฐมวนฺทหํฯ

[49]

‘‘เอกตฺติํเส อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, วนฺทนาย อิทํ ผลํฯ

[50]

‘‘จตุวีสติกปฺปมฺหิ, วิกตานนฺทนามโก;

สตฺตรตนสมฺปนฺโน, จกฺกวตฺตี มหพฺพโลฯ

[51]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกวนฺทนิโย เถโร อิมา คาถาโย อภาสิตฺถาติฯ

เอกวนฺทนิยตฺเถรสฺสาปทานํ ทสมํฯ

อาลมฺพณทายกวคฺโค เตวีสติโมฯ

ตสฺสุทฺทานํ –

อาลมฺพณญฺจ อชินํ, มํสทารกฺขทายโก;

อพฺยาธิ องฺโกลํ [วกุลํ (สฺยา.), พกุฬํ (ก.)] โสณฺณํ, มิญฺชอาเวฬวนฺทนํ;

ปญฺจปญฺญาส คาถาโย, คณิตา อตฺถทสฺสิภิฯ

24. อุทกาสนวคฺโค