เมนู

6. องฺโกลปุปฺผิยตฺเถรอปทานํ

[29]

‘‘นารโท [วรโท (ก.)] อิติ เม นามํ, กสฺสโป อิติ มํ วิทู;

อทฺทสํ สมณานคฺคํ, วิปสฺสิํ เทวสกฺกตํฯ

[30]

‘‘อนุพฺยญฺชนธรํ พุทฺธํ, อาหุตีนํ ปฏิคฺคหํ;

องฺโกลปุปฺผํ [วกุลปุปฺผํ (สฺยา.), พโกลปุปฺผํ (ก.)] ปคฺคยฺห, พุทฺธสฺส อภิโรปยิํฯ

[31]

‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[32]

‘‘จตุสตฺตติโต กปฺเป, โรมโส นาม ขตฺติโย;

อามุกฺกมาลาภรโณ, สโยคฺคพลวาหโนฯ

[33]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา องฺโกลปุปฺผิโย [วกุลปุปฺผิโย (สฺยา.), พโกลปุปฺผิโย (ก.)] เถโร อิมา คาถาโย อภาสิตฺถาติฯ

องฺโกลปุปฺผิยตฺเถรสฺสาปทานํ ฉฏฺฐํฯ

7. โสวณฺณวฏํสกิยตฺเถรอปทานํ

[34]

‘‘อุยฺยานภูมิํ นิยฺยนฺโต, อทฺทสํ โลกนายกํ;

วฏํสกํ คเหตฺวาน, โสวณฺณํ สาธุนิมฺมิตํฯ

[35]

‘‘สีฆํ ตโต สมารุยฺห, หตฺถิกฺขนฺธคโต อหํ;

พุทฺธสฺส อภิโรเปสิํ, สิขิโน โลกพนฺธุโนฯ

[36]

‘‘เอกตฺติํเส อิโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, ปุปฺผปูชายิทํ ผลํฯ

[37]

‘‘สตฺตวีเส อิโต กปฺเป, เอโก อาสิํ ชนาธิโป;

มหาปตาปนาเมน, จกฺกวตฺตี มหพฺพโลฯ

[38]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โสวณฺณวฏํสกิโย เถโร อิมา คาถาโย อภาสิตฺถาติฯ

โสวณฺณวฏํสกิยตฺเถรสฺสาปทานํ สตฺตมํฯ

8. มิญฺชวฏํสกิยตฺเถรอปทานํ

[39]

‘‘นิพฺพุเต โลกนาถมฺหิ, สิขิมฺหิ วทตํ วเร;

วฏํสเกหิ อากิณฺณํ, โพธิปูชํ อกาสหํฯ

[40]

‘‘เอกตฺติํเส อิโต กปฺเป, ยํ ปูชมกริํ ตทา;

ทุคฺคติํ นาภิชานามิ, โพธิปูชายิทํ ผลํฯ

[41]

‘‘อิโต ฉพฺพีสติกปฺเป, อหุํ เมฆพฺภนามโก;

สตฺตรตนสมฺปนฺโน, จกฺกวตฺตี มหพฺพโลฯ

[42]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา มิญฺชวฏํสกิโย เถโร อิมา คาถาโย อภาสิตฺถาติฯ

มิญฺชวฏํสกิยตฺเถรสฺสาปทานํ อฏฺฐมํฯ

9. สุกตาเวฬิยตฺเถรอปทานํ

[43]

‘‘อสิโต นาม นาเมน, มาลากาโร อหํ [อหุํ (?)] ตทา;

อาเวฬํ ปคฺคเหตฺวาน, รญฺโญ ทาตุํ วชามหํฯ

[44]

‘‘อสมฺปตฺโตมฺหิ [อสมฺปตฺตมฺหิ (สี.), อสมฺปตฺโตว (?)] ราชานํ, อทฺทสํ สิขินายกํ;

หฏฺโฐ หฏฺเฐน จิตฺเตน, พุทฺธสฺส อภิโรปยิํฯ

[45]

‘‘เอกตฺติํเส อิโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[46]