‘‘เตน กมฺมวิเสเสน, น ปสฺสิํ ภยเภรวํ;

กุหิญฺจิ อุปปนฺนสฺส, ตาโส มยฺหํ น วิชฺชติฯ

[21]

‘‘จตุนฺนวุติโต กปฺเป, ยํ เวทิํ การยิํ ปุเร;

ทุคฺคติํ นาภิชานามิ, เวทิกาย อิทํ ผลํฯ

[22]

‘‘อิโต ฉฏฺฐมฺหิ กปฺปมฺหิ, อปสฺเสนสนามโก;

สตฺตรตนสมฺปนฺโน, จกฺกวตฺตี มหพฺพโลฯ

[23]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อารกฺขทายโก เถโร อิมา คาถาโย อภาสิตฺถาติฯ

อารกฺขทายกตฺเถรสฺสาปทานํ จตุตฺถํฯ

5. อพฺยาธิกตฺเถรอปทานํ

[24]

‘‘วิปสฺสิสฺส ภควโต, อคฺคิสาลํ อทาสหํ;

พฺยาธิกานญฺจ อาวาสํ, อุณฺโหทกปฏิคฺคหํฯ

[25]

‘‘เตน กมฺเมนยํ มยฺหํ, อตฺตภาโว สุนิมฺมิโต;

พฺยาธาหํ นาภิชานามิ, ปุญฺญกมฺมสฺสิทํ ผลํฯ

[26]

‘‘เอกนวุติโต กปฺเป, ยํ สาลมททิํ ตทา;

ทุคฺคติํ นาภิชานามิ, อคฺคิสาลายิทํ ผลํฯ

[27]

‘‘อิโต จ สตฺตเม กปฺเป, เอโกสิํ อปราชิโต [เอโก อาสิํ นราธิโป (สฺยา.)];

สตฺตรตนสมฺปนฺโน, จกฺกวตฺตี มหพฺพโลฯ

[28]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อพฺยาธิโก เถโร อิมา คาถาโย อภาสิตฺถาติฯ

อพฺยาธิกตฺเถรสฺสาปทานํ ปญฺจมํฯ