‘‘ทิสฺวา มํ สุปฺปสนฺนตฺตํ [สุปฺปสนฺนนฺตํ (สฺยา. ก.) สุปฺปสนฺนจิตฺตนฺติ อตฺโถ], อิทฺธิยา ปารมิงฺคโต;
นภํ อพฺภุคฺคมี ธีโร, หํสราชาว อมฺพเรฯ
[48]
‘‘จตุนฺนวุติโต กปฺเป, ยํ ทานมททิํ ตทา;
ทุคฺคติํ นาภิชานามิ, สปฺปิเตลสฺสิทํ ผลํฯ
[49]
‘‘อิโต สตฺตรเส กปฺเป, ชุติเทว [ทุติเทว (สฺยา.), ตุติเทว (ก.)] สนามโก;
สตฺตรตนสมฺปนฺโน, จกฺกวตฺตี มหพฺพโลฯ
[50]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สปฺปิทายโก เถโร อิมา คาถาโย อภาสิตฺถาติฯ
สปฺปิทายกตฺเถรสฺสาปทานํ นวมํฯ
10. ปาปนิวาริยตฺเถรอปทานํ
[51]
‘‘ปิยทสฺสิสฺส ภควโต, จงฺกมํ โสธิตํ มยา;
นฬเกหิ ปฏิจฺฉนฺนํ, วาตาตปนิวารณํฯ
[52]
‘‘ปาปํ วิวชฺชนตฺถาย, กุสลสฺสุปสมฺปทา;
กิเลสานํ ปหานาย, ปทหิํ สตฺถุ สาสเนฯ
[53]
‘‘อิโต เอกาทเส กปฺเป, อคฺคิเทโวติ วิสฺสุโต;
สตฺตรตนสมฺปนฺโน, จกฺกวตฺตี มหพฺพโลฯ
[54]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ปาปนิวาริโย [วาตาตปนิวาริโย (?)] เถโร อิมา คาถาโย อภาสิตฺถาติฯ
ปาปนิวาริยตฺเถรสฺสาปทานํ ทสมํฯ
หตฺถิวคฺโค พาวีสติโมฯ
ตสฺสุทฺทานํ –
หตฺถิ ปานธิ สจฺจญฺจ, เอกสญฺญิ จ รํสิโก;
สนฺธิโต ตาลวณฺฏญฺจ, ตถา อกฺกนฺตสญฺญโก;
สปฺปิ ปาปนิวารี จ, จตุปฺปญฺญาส คาถกาติฯ
23. อาลมฺพณทายกวคฺโค
1. อาลมฺพณทายกตฺเถรอปทานํ
[1]
‘‘อตฺถทสฺสิสฺส ภควโต, โลกเชฏฺฐสฺส ตาทิโน;
อาลมฺพณํ มยา ทินฺนํ, ทฺวิปทินฺทสฺส ตาทิโนฯ
[2]
‘‘ธรณิํ ปฏิปชฺชามิ, วิปุลํ สาครปฺปรํ;
ปาเณสุ จ อิสฺสริยํ, วตฺเตมิ วสุธาย จฯ
[3]
‘‘กิเลสา ฌาปิตา มยฺหํ, ภวา สพฺเพ สมูหตา;
ติสฺโส วิชฺชา อนุปฺปตฺตา, กตํ พุทฺธสฺส สาสนํฯ
[4]
‘‘อิโต ทฺเวสฏฺฐิกปฺปมฺหิ, ตโย อาสิํสุ ขตฺติยา;
เอกาปสฺสิตนามา เต, จกฺกวตฺตี มหพฺพลาฯ
[5]
‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;
ฉฬภิญฺญา สจฺฉิกตา, กตํ พุทฺธสฺส สาสนํ’’ฯ
อิตฺถํ สุทํ อายสฺมา อาลมฺพณทายโก เถโร อิมา คาถาโย อภาสิตฺถาติฯ
อาลมฺพณทายกตฺเถรสฺสาปทานํ ปฐมํฯ
2. อชินทายกตฺเถรอปทานํ
[6]
‘‘เอกตฺติํเส อิโต กปฺเป, คณสตฺถารโก อหํ;
อทฺทสํ วิรชํ พุทฺธํ, อาหุตีนํ ปฏิคฺคหํฯ
[7]
‘‘จมฺมขณฺฑํ มยา ทินฺนํ, สิขิโน โลกพนฺธุโน;
เตน กมฺเมน ทฺวิปทินฺท, โลกเชฏฺฐ นราสภฯ
[8]
‘‘สมฺปตฺติํ อนุโภตฺวาน, กิเลเส ฌาปยิํ อหํ;
ธาเรมิ อนฺติมํ เทหํ, สมฺมาสมฺพุทฺธสาสเนฯ
[9]
‘‘เอกตฺติํเส อิโต กปฺเป, อชินํ ยํ อทาสหํ;
ทุคฺคติํ นาภิชานามิ, อชินสฺส อิทํ ผลํฯ
[10]
‘‘อิโต ปญฺจมเก กปฺเป, ราชา อาสิํ สุทายโก;
สตฺตรตนสมฺปนฺโน, จกฺกวตฺตี มหพฺพโลฯ
[11]