‘‘นิมฺมโล โหมหํ อชฺช, วิมโล ขีณสํสโย;

ภเว นิพฺพตฺตมานมฺหิ, ผลํ นิพฺพตฺตเต มม [สุภํ (สี.)]ฯ

[27]

‘‘จตุนฺนวุติโต กปฺเป, อุทกํ ยมทาสหํ [ยํ ตทา อทํ (สี.), อททิํ ตทา (สฺยา.)];

ทุคฺคติํ นาภิชานามิ, ทกทานสฺสิทํ ผลํฯ

[28]

‘‘เอกสฏฺฐิมฺหิโต กปฺเป, เอโกว วิมโล อหุ;

สตฺตรตนสมฺปนฺโน, จกฺกวตฺตี มหพฺพโลฯ

[29]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อุทกทายโก เถโร อิมา คาถาโย อภาสิตฺถาติฯ

อุทกทายกตฺเถรสฺสาปทานํ ฉฏฺฐํฯ

7. สลลมาลิยตฺเถรอปทานํ

[30]

‘‘กณิการํว โชตนฺตํ, นิสินฺนํ ปพฺพตนฺตเร;

โอภาเสนฺตํ ทิสา สพฺพา, สิทฺธตฺถํ นรสารถิํฯ

[31]

‘‘ธนุํ อทฺเวชฺฌํ กตฺวาน, อุสุํ สนฺนยฺหหํ ตทา;

ปุปฺผํ สวณฺฏํ เฉตฺวาน, พุทฺธสฺส อภิโรปยิํฯ

[32]

‘‘จตุนฺนวุติโต กปฺเป, ยํ ปุปฺผมภิโรปยิํ;

ทุคฺคติํ นาภิชานามิ, พุทฺธปูชายิทํ ผลํฯ

[33]

‘‘เอกปญฺญาสิโต กปฺเป, เอโก อาสิํ ชุตินฺธโร;

สตฺตรตนสมฺปนฺโน, จกฺกวตฺตี มหพฺพโลฯ

[34]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา สลลมาลิโย เถโร อิมา คาถาโย อภาสิตฺถาติฯ

สลลมาลิยตฺเถรสฺสาปทานํ สตฺตมํฯ

8. โกรณฺฑปุปฺผิยตฺเถรอปทานํ

[35]

‘‘อกฺกนฺตญฺจ ปทํ ทิสฺวา, จกฺกาลงฺการภูสิตํ;

ปเทนานุปทํ ยนฺโต, วิปสฺสิสฺส มเหสิโนฯ

[36]

‘‘โกรณฺฑํ ปุปฺผิตํ ทิสฺวา, สมูลํ ปูชิตํ มยา;

หฏฺโฐ หฏฺเฐน จิตฺเตน, อวนฺทิํ ปทมุตฺตมํฯ

[37]

‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[38]

‘‘สตฺตปญฺญาสกปฺปมฺหิ, เอโก วีตมโล อหุํ;

สตฺตรตนสมฺปนฺโน, จกฺกวตฺตี มหพฺพโลฯ

[39]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โกรณฺฑปุปฺผิโย เถโร อิมา คาถาโย อภาสิตฺถาติฯ

โกรณฺฑปุปฺผิยตฺเถรสฺสาปทานํ อฏฺฐมํฯ

9. อาธารทายกตฺเถรอปทานํ

[40]

‘‘อาธารกํ มยา ทินฺนํ, สิขิโน โลกพนฺธุโน;

ธาเรมิ ปถวิํ สพฺพํ, เกวลํ วสุธํ อิมํฯ

[41]

‘‘กิเลสา ฌาปิตา มยฺหํ, ภวา สพฺเพ สมูหตา;

ธาเรมิ อนฺติมํ เทหํ, สมฺมาสมฺพุทฺธสาสเนฯ

[42]

‘‘สตฺตวีเส อิโต กปฺเป, อเหสุํ จตุโร ชนา;

สมนฺตวรณา นาม, จกฺกวตฺตี มหพฺพลาฯ

[43]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อาธารทายโก [ปริยาทานิโย (ก.)] เถโร อิมา คาถาโย อภาสิตฺถาติฯ

อาธารทายกตฺเถรสฺสาปทานํ นวมํฯ