‘‘อฏฺฐารเส กปฺปสเต, ยํ กมฺมมกริํ ตทา;
ทุคฺคติํ นาภิชานามิ, ตรณาย อิทํ ผลํฯ
[18]
‘‘เตรเสโต กปฺปสเต, ปญฺจ สพฺโพภวา [สพฺโภควา (สี.)] อหุํ;
สตฺตรตนสมฺปนฺนา, จกฺกวตฺตี มหพฺพลาฯ
[19]
‘‘ปจฺฉิเม จ ภเว อสฺมิํ, ชาโตหํ พฺราหฺมเณ กุเล;
สทฺธิํ ตีหิ สหาเยหิ, ปพฺพชิํ สตฺถุ สาสเนฯ
[20]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ตรณิโย เถโร อิมา คาถาโย อภาสิตฺถาติ;
ตรณิยตฺเถรสฺสาปทานํ จตุตฺถํฯ
5. นิคฺคุณฺฑิปุปฺผิยตฺเถรอปทานํ
[21]
‘‘วิปสฺสิสฺส ภควโต, อาสิมารามิโก อหํ;
นิคฺคุณฺฑิปุปฺผํ ปคฺคยฺห, พุทฺธสฺส อภิโรปยิํฯ
[22]
‘‘เอกนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, พุทฺธปูชายิทํ ผลํฯ
[23]
‘‘ปญฺจวีเส [ปญฺจติํเส (สี. สฺยา.)] อิโต กปฺเป, เอโก อาสิํ ชนาธิโป;
มหาปตาปนาเมน, จกฺกวตฺตี มหพฺพโลฯ
[24]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา นิคฺคุณฺฑิปุปฺผิโย เถโร อิมา คาถาโย อภาสิตฺถาติฯ
นิคฺคุณฺฑิปุปฺผิยตฺเถรสฺสาปทานํ ปญฺจมํฯ
6. อุทกทายกตฺเถรอปทานํ
[25]
‘‘ภุญฺชนฺตํ สมณํ ทิสฺวา, วิปฺปสนฺนมนาวิลํ;
ฆเฏโนทกมาทาย, สิทฺธตฺถสฺส อทาสหํฯ
[26]
‘‘นิมฺมโล โหมหํ อชฺช, วิมโล ขีณสํสโย;
ภเว นิพฺพตฺตมานมฺหิ, ผลํ นิพฺพตฺตเต มม [สุภํ (สี.)]ฯ
[27]
‘‘จตุนฺนวุติโต กปฺเป, อุทกํ ยมทาสหํ [ยํ ตทา อทํ (สี.), อททิํ ตทา (สฺยา.)];
ทุคฺคติํ นาภิชานามิ, ทกทานสฺสิทํ ผลํฯ
[28]
‘‘เอกสฏฺฐิมฺหิโต กปฺเป, เอโกว วิมโล อหุ;
สตฺตรตนสมฺปนฺโน, จกฺกวตฺตี มหพฺพโลฯ
[29]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อุทกทายโก เถโร อิมา คาถาโย อภาสิตฺถาติฯ
อุทกทายกตฺเถรสฺสาปทานํ ฉฏฺฐํฯ
7. สลลมาลิยตฺเถรอปทานํ
[30]
‘‘กณิการํว โชตนฺตํ, นิสินฺนํ ปพฺพตนฺตเร;
โอภาเสนฺตํ ทิสา สพฺพา, สิทฺธตฺถํ นรสารถิํฯ
[31]
‘‘ธนุํ อทฺเวชฺฌํ กตฺวาน, อุสุํ สนฺนยฺหหํ ตทา;
ปุปฺผํ สวณฺฏํ เฉตฺวาน, พุทฺธสฺส อภิโรปยิํฯ
[32]
‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[33]
‘‘เอกปญฺญาสิโต กปฺเป, เอโก อาสิํ ชุตินฺธโร;
สตฺตรตนสมฺปนฺโน, จกฺกวตฺตี มหพฺพโลฯ
[34]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา สลลมาลิโย เถโร อิมา คาถาโย อภาสิตฺถาติฯ
สลลมาลิยตฺเถรสฺสาปทานํ สตฺตมํฯ