‘‘ปทุโม นาม นาเมน, สยมฺภู สปฺปโภ อหุ;
นิสินฺนํ [นิสินฺโน (ก.)] ปุณฺฑรีกมฺหิ, ฉายา น ชหิ ตํ มุนิํฯ
[19]
‘‘อโสกํ ปุปฺผิตํ ทิสฺวา, ปิณฺฑิภารํ สุทสฺสนํ;
พุทฺธสฺส อภิโรเปสิํ, ชลชุตฺตมนามิโนฯ
[20]
‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[21]
‘‘สตฺตติํสมฺหิโต กปฺเป, โสฬส อรณญฺชหา [อรุณญฺชหา (สี.)];
สตฺตรตนสมฺปนฺนา, จกฺกวตฺตี มหพฺพลาฯ
[22]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา อโสกปูชโก เถโร อิมา คาถาโย อภาสิตฺถาติฯ
อโสกปูชกตฺเถรสฺสาปทานํ จตุตฺถํฯ
5. องฺโกลกตฺเถรอปทานํ
[23]
‘‘องฺโกลํ ปุปฺผิตํ ทิสฺวา, มาลาวรํ สโกสกํ [สโมคธํ (สฺยา.)];
โอจินิตฺวาน ตํ ปุปฺผํ, อคมํ พุทฺธสนฺติกํฯ
[24]
‘‘สิทฺธตฺโถ ตมฺหิ สมเย, ปติลีโน มหามุนิ;
มุหุตฺตํ ปฏิมาเนตฺวา, คุหายํ ปุปฺผโมกิริํฯ
[25]
‘‘จตุนฺนวุติโต กปฺเป, ยํ ปุปฺผมภิปูชยิํ;
ทุคฺคติํ นาภิชานามิ, ปุปฺผทานสฺสิทํ [พุทฺธปูชายิทํ (สี. สฺยา.)] ผลํฯ
[26]
‘‘ฉตฺติํสมฺหิ อิโต กปฺเป, อาเสโก เทวคชฺชิโต;
สตฺตรตนสมฺปนฺโน, จกฺกวตฺตี มหพฺพโลฯ
[27]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา องฺโกลโก เถโร อิมา คาถาโย อภาสิตฺถาติฯ
องฺโกลกตฺเถรสฺสาปทานํ ปญฺจมํฯ
6. กิสลยปูชกตฺเถรอปทานํ
[28]
‘‘นคเร ทฺวารวติยา, มาลาวจฺโฉ มมํ อหุ;
อุทปาโน จ ตตฺเถว, ปาทปานํ วิโรหโนฯ
[29]
‘‘สพเลน อุปตฺถทฺโธ, สิทฺธตฺโถ อปราชิโต;
มมานุกมฺปมาโน โส, คจฺฉเต อนิลญฺชเสฯ
[30]
‘‘อญฺญํ กิญฺจิ น ปสฺสามิ, ปูชาโยคฺคํ มเหสิโน;
อโสกํ ปลฺลวํ ทิสฺวา, อากาเส อุกฺขิปิํ อหํฯ
[31]
‘‘พุทฺธสฺส เต กิสลยา, คจฺฉโต ยนฺติ ปจฺฉโต;
ตาหํ ทิสฺวาน สํวิชิํ [โสหํ ทิสฺวาน ตํ อิทฺธิํ (สี. สฺยา.)], อโห พุทฺธสฺสุฬารตาฯ
[32]
‘‘จตุนฺนวุติโต กปฺเป, ปลฺลวํ อภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[33]
‘‘สตฺตติํเส [สตฺตวีเส (สี. สฺยา.)] อิโต กปฺเป, เอโก เอกิสฺสโร อหุ;
สตฺตรตนสมฺปนฺโน, จกฺกวตฺตี มหพฺพโลฯ
[34]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา กิสลยปูชโก เถโร อิมา คาถาโย อภาสิตฺถาติฯ
กิสลยปูชกตฺเถรสฺสาปทานํ ฉฏฺฐํฯ
7. ตินฺทุกทายกตฺเถรอปทานํ
[35]
‘‘คิริทุคฺคจโร อาสิํ, มกฺกโฏ ถามเวคิโก;
ผลินํ ตินฺทุกํ ทิสฺวา, พุทฺธเสฏฺฐํ อนุสฺสริํฯ
[36]
‘‘นิกฺขมิตฺวา กติปาหํ, วิจินิํ โลกนายกํ;
ปสนฺนจิตฺโต สุมโน, สิทฺธตฺถํ ติภวนฺตคุํฯ
[37]
‘‘มม สงฺกปฺปมญฺญาย, สตฺถา โลเก อนุตฺตโร;
ขีณาสวสหสฺเสหิ, อาคจฺฉิ มม สนฺติกํฯ
[38]