‘‘ปญฺจสฏฺฐิมฺหิโต กปฺเป, จตฺตาโรสุํ มหทฺธนา;
สตฺตรตนสมฺปนฺนา, จกฺกวตฺตี มหพฺพลาฯ
[11]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ติณสนฺถารโก เถโร อิมา คาถาโย อภาสิตฺถาติฯ
ติณสนฺถารกตฺเถรสฺสาปทานํ ทุติยํฯ
3. ขณฺฑปุลฺลิยตฺเถรอปทานํ
[12]
‘‘ผุสฺสสฺส โข ภควโต, ถูโป อาสิ มหาวเน;
กุญฺชเรหิ ตทา ภินฺโน, ปรูฬฺโห ปาทโป [ปรูฬฺหปาทโป (สี.), สํรูฬฺโห ปาทโป (สฺยา.)] ตหิํฯ
[13]
‘‘วิสมญฺจ สมํ กตฺวา, สุธาปิณฺฑํ อทาสหํ;
ติโลกครุโน ตสฺส, คุเณหิ ปริโตสิโต [ปริโต สุโต (ก.)]ฯ
[14]
‘‘ทฺเวนวุเต อิโต กปฺเป, ยํ กมฺมมกริํ ตทา;
ทุคฺคติํ นาภิชานามิ, สุธาปิณฺฑสฺสิทํ ผลํฯ
[15]
‘‘สตฺตสตฺตติกปฺปมฺหิ, ชิตเสนาสุํ โสฬส;
สตฺตรตนสมฺปนฺนา, จกฺกวตฺตี มหพฺพลาฯ
[16]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา ขณฺฑผุลฺลิโย เถโร อิมา คาถาโย อภาสิตฺถาติฯ
ขณฺฑปุลฺลิยตฺเถรสฺสาปทานํ ตติยํฯ
4. อโสกปูชกตฺเถรอปทานํ
[17]
‘‘ติวรายํ [ติปุรายํ (สฺยา.)] ปุเร รมฺเม, ราชุยฺยานํ อหุ ตทา;
อุยฺยานปาโล ตตฺถาสิํ, รญฺโญ พทฺธจโร อหํฯ
[18]