เมนู

1. ตมาลปุปฺผิยตฺเถรอปทานํ

[1]

‘‘จุลฺลาสีติสหสฺสานิ , ถมฺภา โสวณฺณยา อหู;

เทวลฏฺฐิปฏิภาคํ, วิมานํ เม สุนิมฺมิตํฯ

[2]

‘‘ตมาลปุปฺผํ ปคฺคยฺห, วิปฺปสนฺเนน เจตสา;

พุทฺธสฺส อภิโรปยิํ, สิขิโน โลกพนฺธุโนฯ

[3]

‘‘เอกตฺติํเส อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, พุทฺธปูชายิทํ ผลํฯ

[4]

‘‘อิโต วีสติเม กปฺเป, จนฺทติตฺโตติ เอกโก;

สตฺตรตนสมฺปนฺโน, จกฺกวตฺตี มหพฺพโลฯ

[5]

‘‘ปฏิสมฺภิทา จตสฺโส, วิโมกฺขาปิ จ อฏฺฐิเม;

ฉฬภิญฺญา สจฺฉิกตา, กตํ พุทฺธสฺส สาสนํ’’ฯ

อิตฺถํ สุทํ อายสฺมา ตมาลปุปฺผิโย เถโร อิมา คาถาโย อภาสิตฺถาติฯ

ตมาลปุปฺผิยตฺเถรสฺสาปทานํ ปฐมํฯ

2. ติณสนฺถารกตฺเถรอปทานํ

[6]

‘‘ยทา วนวาสี [ยํ ทายวาสิโก (สี.)] อิสิ, ติณํ ลายติ สตฺถุโน;

สพฺเพ ปทกฺขิณาวฏฺฏา [ปทกฺขิณาวตฺตา (สี. สฺยา.)], ปถพฺยา [ปุถวฺยา (สี.)] นิปติํสุ เตฯ

[7]

‘‘ตมหํ ติณมาทาย, สนฺถริํ ธรณุตฺตเม;

ตีเณว ตาลปตฺตานิ, อาหริตฺวานหํ ตทาฯ

[8]

‘‘ติเณน ฉทนํ กตฺวา, สิทฺธตฺถสฺส อทาสหํ;

สตฺตาหํ ธารยุํ ตสฺส [ตตฺถ (สฺยา.)], เทวมานุสสตฺถุโนฯ

[9]

‘‘จตุนฺนวุติโต กปฺเป, ยํ ติณํ อททิํ ตทา;

ทุคฺคติํ นาภิชานามิ, ติณทานสฺสิทํ ผลํฯ

[10]

‘‘ปญฺจสฏฺฐิมฺหิโต กปฺเป, จตฺตาโรสุํ มหทฺธนา;

สตฺตรตนสมฺปนฺนา, จกฺกวตฺตี มหพฺพลาฯ

[11]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติณสนฺถารโก เถโร อิมา คาถาโย อภาสิตฺถาติฯ

ติณสนฺถารกตฺเถรสฺสาปทานํ ทุติยํฯ

3. ขณฺฑปุลฺลิยตฺเถรอปทานํ

[12]

‘‘ผุสฺสสฺส โข ภควโต, ถูโป อาสิ มหาวเน;

กุญฺชเรหิ ตทา ภินฺโน, ปรูฬฺโห ปาทโป [ปรูฬฺหปาทโป (สี.), สํรูฬฺโห ปาทโป (สฺยา.)] ตหิํฯ

[13]

‘‘วิสมญฺจ สมํ กตฺวา, สุธาปิณฺฑํ อทาสหํ;

ติโลกครุโน ตสฺส, คุเณหิ ปริโตสิโต [ปริโต สุโต (ก.)]

[14]

‘‘ทฺเวนวุเต อิโต กปฺเป, ยํ กมฺมมกริํ ตทา;

ทุคฺคติํ นาภิชานามิ, สุธาปิณฺฑสฺสิทํ ผลํฯ

[15]

‘‘สตฺตสตฺตติกปฺปมฺหิ, ชิตเสนาสุํ โสฬส;

สตฺตรตนสมฺปนฺนา, จกฺกวตฺตี มหพฺพลาฯ

[16]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ขณฺฑผุลฺลิโย เถโร อิมา คาถาโย อภาสิตฺถาติฯ

ขณฺฑปุลฺลิยตฺเถรสฺสาปทานํ ตติยํฯ

4. อโสกปูชกตฺเถรอปทานํ

[17]

‘‘ติวรายํ [ติปุรายํ (สฺยา.)] ปุเร รมฺเม, ราชุยฺยานํ อหุ ตทา;

อุยฺยานปาโล ตตฺถาสิํ, รญฺโญ พทฺธจโร อหํฯ

[18]