‘‘‘กาเยน กุสลํ กตฺวา, วาจาย กุสลํ พหุํ;

มนสา กุสลํ กตฺวา, อพฺยาปชฺชํ [อพฺยาปชฺฌํ (สฺยา.), อปฺปมาณํ (อิติวุตฺตเก 83)] นิรูปธิํฯ

[38]

‘‘‘ตโต โอปธิกํ ปุญฺญํ, กตฺวา ทาเนน ตํ พหุํ;

อญฺเญปิ มจฺเจ สทฺธมฺเม, พฺรหฺมจริเย นิเวสย’ฯ

[39]

‘‘อิมาย อนุกมฺปาย, เทวา เทวํ ยทา วิทู;

จวนฺตํ อนุโมทนฺติ, เอหิ เทว ปุนปฺปุนํ [เทวปุรํ ปุน (สฺยา.)]ฯ

[40]

‘‘สํเวโค เม [สํวิคฺโคหํ (สฺยา.)] ตทา อาสิ, เทวสงฺเฆ สมาคเต;

กํสุ นาม อหํ โยนิํ, คมิสฺสามิ อิโต จุโตฯ

[41]

‘‘มม สํเวคมญฺญาย, สมโณ ภาวิตินฺทฺริโย;

มมุทฺธริตุกาโม โส, อาคจฺฉิ มม สนฺติกํฯ

[42]

‘‘สุมโน นาม นาเมน, ปทุมุตฺตรสาวโก;

อตฺถธมฺมานุสาสิตฺวา, สํเวเชสิ มมํ ตทาฯ

[43]

‘‘ตสฺสาหํ วจนํ สุตฺวา, พุทฺเธ จิตฺตํ ปสาทยิํ;

ตํ ธีรํ อภิวาเทตฺวา, ตตฺถ กาลํกโต อหํฯ

[44]

‘‘อุปปชฺชิํ ส [อุปปชฺชิสฺสํ (สี.)] ตตฺเถว, สุกฺกมูเลน โจทิโต;

กปฺปานํ สตสหสฺสํ, ทุคฺคติํ นุปปชฺชหํฯ

[45]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกจินฺติโก เถโร อิมา คาถาโย อภาสิตฺถาติฯ

เอกจินฺติกตฺเถรสฺสาปทานํ สตฺตมํฯ

8. ติกณฺณิปุปฺผิยตฺเถรอปทานํ

[46]

‘‘เทวภูโต อหํ สนฺโต, อจฺฉราหิ ปุรกฺขโต;

ปุพฺพกมฺมํ สริตฺวาน, พุทฺธเสฏฺฐํ อนุสฺสริํฯ

[47]

‘‘ติกณฺณิปุปฺผํ [กิํกณิปุปฺผํ (ก.)] ปคฺคยฺห, สกํ จิตฺตํ ปสาทยิํ;

พุทฺธมฺหิ อภิโรเปสิํ, วิปสฺสิมฺหิ นราสเภฯ

[48]

‘‘เอกนวุติโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[49]

‘‘เตสตฺตติมฺหิโต กปฺเป, จตุราสุํ รมุตฺตมา;

สตฺตรตนสมฺปนฺนา, จกฺกวตฺตี มหพฺพลาฯ

[50]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ติกณฺณิปุปฺผิโย [กิํกณิกปุปฺผิโย (ก.)] เถโร อิมา คาถาโย อภาสิตฺถาติฯ

ติกณฺณิปุปฺผิยตฺเถรสฺสาปทานํ อฏฺฐมํฯ

9. เอกจาริยตฺเถรอปทานํ

[51]

‘‘ตาวติํเสสุ เทเวสุ, มหาโฆโส ตทา อหุ;

พุทฺโธ จ โลเก นิพฺพาติ, มยญฺจมฺห สราคิโนฯ

[52]

‘‘เตสํ สํเวคชาตานํ, โสกสลฺลสมงฺคินํ;

สพเลน อุปตฺถทฺโธ, อคมํ พุทฺธสนฺติกํฯ

[53]

‘‘มนฺทารวํ คเหตฺวาน, สงฺคีติ [สณฺหิตํ (สี.), สงฺคิตํ (สฺยา.)] อภินิมฺมิตํ;

ปรินิพฺพุตกาลมฺหิ, พุทฺธสฺส อภิโรปยิํฯ

[54]

‘‘สพฺเพ เทวานุโมทิํสุ, อจฺฉราโย จ เม ตทา;

กปฺปานํ สตสหสฺสํ, ทุคฺคติํ นุปปชฺชหํฯ

[55]

‘‘สฏฺฐิกปฺปสหสฺสมฺหิ, อิโต โสฬส เต ชนา;

มหามลฺลชนา นาม, จกฺกวตฺตี มหพฺพลาฯ

[56]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา เอกจาริโย เถโร อิมา คาถาโย อภาสิตฺถาติฯ

เอกจาริยตฺเถรสฺสาปทานํ นวมํฯ