‘‘ปญฺจ อุปฺปลหตฺถา จ, จาตุรา ฐปิตา มยา;

อาหุติํ ทาตุกาโมหํ, ปคฺคณฺหิํ วตสิทฺธิยา [ปุตฺโตมฺหิ หิตสิทฺธิยา (สฺยา.)]ฯ

[20]

‘‘สุวณฺณวณฺณํ สมฺพุทฺธํ, คจฺฉนฺตํ อนฺตราปเณ;

พุทฺธรํสีหิ ผุฏฺโฐสฺมิ [พุทฺธรํสฺยาภิผุฏฺโฐมฺหิ (สี.), พุทฺธรํสาภิฆุฏฺโฐสฺมิ (ก.)], ปูเชสิํ ทฺวิปทุตฺตมํฯ

[21]

‘‘ทฺเวนวุเต อิโต กปฺเป, ยํ ปุปฺผมภิปูชยิํ;

ทุคฺคติํ นาภิชานามิ, พุทฺธปูชายิทํ ผลํฯ

[22]

‘‘อิโต เตรสกปฺปมฺหิ, ปญฺจ สุสภสมฺมตา;

สตฺตรตนสมฺปนฺนา, จกฺกวตฺตี มหพฺพลาฯ

[23]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา ปญฺจหตฺถิโย เถโร อิมา คาถาโย อภาสิตฺถาติฯ

ปญฺจหตฺถิยตฺเถรสฺสาปทานํ จตุตฺถํฯ

5. อิสิมุคฺคทายกตฺเถรอปทานํ

[24]

‘‘อุเทนฺตํ สตรํสิํว, ปีตรํสิํว [สิตรํสิํว (สี.)] ภาณุมํ;

กกุธํ วิลสนฺตํว, ปทุมุตฺตรนายกํฯ

[25]

‘‘อิสิมุคฺคานิ ปิสิตฺวา [อิสิสุคฺคานิ ปิํเสตฺวา (สี.), อิสิมุคฺคํ นิมนฺเตตฺวา (สฺยา.)], มธุขุทฺเท อนีฬเก;

ปาสาเทว ฐิโต สนฺโต, อทาสิํ โลกพนฺธุโนฯ

[26]

‘‘อฏฺฐสตสหสฺสานิ, อเหสุํ พุทฺธสาวกา;

สพฺเพสํ ปตฺตปูเรนฺตํ [ปตฺตปูรํ ตํ (สี.)], ตโต จาปิ พหุตฺตรํฯ

[27]

‘‘เตน จิตฺตปฺปสาเทน, สุกฺกมูเลน โจทิโต;

กปฺปานํ สตสหสฺสํ, ทุคฺคติํ นุปปชฺชหํฯ

[28]

‘‘จตฺตาลีสมฺหิ สหสฺเส, กปฺปานํ อฏฺฐติํส เต;

อิสิมุคฺคสนามา [มหิสมนฺตนามา (สฺยา.)] เต, จกฺกวตฺตี มหพฺพลาฯ

[29]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา อิสิมุคฺคทายโก เถโร อิมา คาถาโย อภาสิตฺถาติฯ

อิสิมุคฺคทายกตฺเถรสฺสาปทานํ ปญฺจมํฯ

6. โพธิอุปฏฺฐากตฺเถรอปทานํ

[30]

‘‘นคเร รมฺมวติยา, อาสิํ มุรชวาทโก;

นิจฺจุปฏฺฐานยุตฺโตมฺหิ, คโตหํ โพธิมุตฺตมํฯ

[31]

‘‘สายํ ปาตํ อุปฏฺฐิตฺวา, สุกฺกมูเลน โจทิโต;

อฏฺฐารสกปฺปสเต, ทุคฺคติํ นุปปชฺชหํฯ

[32]

‘‘ปนฺนรเส กปฺปสเต, อิโต อาสิํ ชนาธิโป;

มุรโช [ทมโถ (สฺยา.)] นาม นาเมน, จกฺกวตฺตี มหพฺพโลฯ

[33]

‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ

อิตฺถํ สุทํ อายสฺมา โพธิอุปฏฺฐาโก เถโร อิมา คาถาโย อภาสิตฺถาติฯ

โพธิอุปฏฺฐากตฺเถรสฺสาปทานํ ฉฏฺฐํฯ

7. เอกจินฺติกตฺเถรอปทานํ

[34]

‘‘ยทา เทโว [เทวา (ก.)] เทวกายา, จวเต [จวนฺติ (ก.)] อายุสงฺขยา;

ตโย สทฺทา นิจฺฉรนฺติ, เทวานํ อนุโมทตํฯ

[35]

‘อิโต โภ สุคติํ คจฺฉ, มนุสฺสานํ สหพฺยตํ;

มนุสฺสภูโต สทฺธมฺเม, ลภ สทฺธํ อนุตฺตรํฯ

[36]

‘‘‘สา เต สทฺธา นิวิฏฺฐาสฺส, มูลชาตา ปติฏฺฐิตา;

ยาวชีวํ อสํหีรา, สทฺธมฺเม สุปฺปเวทิเตฯ

[37]